Президент буш, грузийиниң демократик қәдимигә юқири баһа бәрди


2005.05.10
Share on WhatsApp
Share on WhatsApp

Америка президенти җорҗ буш тифлистики әркинлик мәйданида, нәччә он миңлиған грузийә хәлқиниң алқиш - садалири ичидә нутуқ сөзләп "оттура асия билән оттура шәрқ район хәлиқлириниң һәммиси бирдәк әркинликкә еришишкә тәшна" дәп билдүрди.

Президент җорҗ буш сөзидә йәнә " силәрниң демократик ислаһат елип бериш җасаритиңлар, пүтүн дуняда ғул - ғула қозғиди" деди.

У йәнә "яшлар әркинликкә чиқишни тәләп қилиду, ундақкән улар чоқум әркинликкә еришиши керәк" дәп көрсәтти вә барлиқ дөләтләр грузийиниң земин пүтүнликини һөрмәт қилиши керәк дәп алаһидә тәкитлиди. Әнгилийә б б с радио - телевизийә ширкитиниң бу һәқтә бәргән хәвиридә көрситилишичә, униң бу сөзи русийигә қаритилған икән.

Буш, америкиниң афғанистан вә ирақта йүргүзгән сияситини грузийиниң йеқиндин қоллап қуввәтлигәнликидин интайин мәмнун икәнликини билдүрүп, грузийә хәлқиниң әркинлик йолида атқан һәр қәдимидә америкиниң биргә болидиғанлиқини оттуриға қойди.

Җорҗ буш, грузийидә йүз бәргән инқилабниң украинийидики , оттура шәрқтики вә һәтта пүтүн дунядики әркинликкә интилгән хәлқләр үчүн илһам қайниқи болғанлиқини көрситип "грузийә, бүгүн әркинликкә вә мустәқиллиққа еришкән бир дөләт болуш сүпити билән , әркинликкә тәшна хәлқләр үчүн бир мәшәл болди" деди.

Буш йәнә, һазир буниңға охшаш әркинлик арзусиниң кафкаслар вә оттура асияғиму өз тәсирини көрситиватқанлиқини, шуңа пүтүн дөләтләрниң грузийиниң земин пүтүнликигә һөрмәт қилиши керәкликини тәкитлиди.

Грузийиниң шималий атлантик әһди тәшкилати вә яврупа иттипақи билән йеқиндин мунасивәт қурушини тәшәббус қилған президент җорҗ буш , сөзини америка хәлқигә вакалитән рәхмәт ейтиш билән тамамлиди.

Мәтбуатларниң бу һәқтә бәргән мәлуматлириға қариғанда, америка президенти җорҗ бушниң нутқини аңлаш үчүн топланған он миңларчә хәлқниң алқишлири, шуниңдәк грузийә сәнәтчилириниң нахша - усуллири, ләпилдәп турған америка вә гирозийә байрақлири, тифлис әркинлик мәйданидики кәйпиятни интайин җанландурвәткән. Президент бушни күтүвелиш үчүн өткүзүлгән мәзкур мурасим, грузийиниң пайтәхтти тифлистә, 18 ай бурун партилиған қизил гүл инқилабидин кейин тунҗи қетим йүз бәргән дағ - дуғулуқ бир қетимлиқ паалийәт һисапланди.

Җорҗ буш, 2 - дуня уруши аяқлашқанлиқиниң 60 йиллиқи мунасивити билән москвада өткүзүлгән хатирләш мурасимиға қатнашқандин кейин, грузийигә қаратқан зияритини башлиған. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.