Бушниң йеңи ирақ истратегийисини ирақ һөкүмити қизғин қоллиди, әмма бониңға хитай һөкүмитиниң муамилиси соғуқ

Бирләшмә агентлиқиниң хәвәр қилишичә, америка президенти буш 10 ‏- январ күни кәчтә телевизийә нутқи елан қилип, ирақта йүз бәргән хаталиқларға өзи җавабкар болидиғанлиқини; һазир ирақтики қучқачтәк учқур топулаңларни тинҗитиш лазимлиқини; ирақтики һазирқи 132 миң әскәр санини 153 миңға көпәйтиш вә буниң үчүн 5 милярд 600 милйон америка доллири сәрп қилишни оттуриға қойди.

Америка дөләт мәҗлисини контрол қилип туруватқан демократлар президент бушниң йеңи ирақ сияситини тәнқидлиди

Һазир америка дөләт мәҗлисини контрол қилип туруватқан демократлар президент бушниң йеңи ирақ сияситини тәнқидлиди. Америка кеңәш палатасиниң әзаси харри рейт әпәнди 'президент буш буйил 11 ‏- айда елип берилған оттура мәвсүмлүк парламинт сайлиминиң нәтиҗисигә вә униң тәшәббуслириға писәнт қилмиди, икки партийә бирликтә қурған тәтқиқат гурупписи оттуриға қойған тәклипләргиму писәнт қилмиди' дәп наразилиқ билдүрди. Кеңәш палата әзаси барәк обама әпәнди 'америка ирақтики ички урушта бала баққучи болмаймиз, биз прерзидент бушниң ираққа әскәр көпәйтишини чәклишимиз керәк' деди.

Ирақ һөкүмити америкиниң йеңи истратегийисини тамамән қоллайду

Б б с ниң хәвәр қилишичә, ирақниң баш миниситири нури әл маликиниң баянатчиси наһир әпәнди ' ирақ һөкүмити америкиниң йеңи истратегийисини тамамән қоллайду, ираққа әскәр көпәйтишини қизғин қарши алиду, чүнки америка әскәрлири көпләп кәлсә, уларниң ираққа ярдими көп тегиду, ирақ қисимлириму көпләп һәрбий тәлим алиду' дегән. Хәвәрдә баян қилинишичә йәнә, шиәләрдин сайланған бир парламинт әзаси 'америкиниң ираққа әскәр көпәйтишиниң һаҗити йоқ' дегәндә, сүннийләрдин сайланған йәнә бир парламинт әзаси 'америкиниң әскәр көпәйтиши зөрүр, чүнки ирақ қисимлириниң уруш қилиш қабилийити төвән, униң үстигә бу қошунниң ичигә топулаңчилар суқунуп киривалған' дегән. Куртлардин сайланған бир парламнт әзасиму, өзиниң бушниң көз қаришиға қошулидиғанлиқини, бу пиланни әмәлийләштүрүш ирақ һөкүмитигә бағлиқ икәнликини билдүргән.

Хитай һөкүмити бушниң истратегийисигә соғуқ муамилә қилмақта

Америкиниң иттипақдашлиридин австралийә, японийә, корийә қатарлиқ дөләтләрдики учур вастилири һазир кәйни -кәйнидин баян қилип, америка президенти җорҗи бушниң йеңи ирақ истратегийисини қизғин қоллимақта. Әмма, хоңкоң телевизийә истансисиниң баян қилишичә, хитай һөкүмити буниңға соғуқ муамилә қилмақта. Хәвәрдә ейтилишичә, хитай ташқи ишлар миниситирлиқиниң баянатчиси лю җәнчав пәйшәнбә күни мухбирларниң суаллириға җаваб бәргәндә, хитай һөкөмити президент бушниң нутқиға деққәт қиливатиду, хитай һөкүмити ирақта вәзийәт давалғуп туруватиду вә ирақни қайтидин қуруш иши көп хил қейинчилиққа дуч келиватиду, дәп қарайду. Теги-тәктидин ейтқанда, ирақта тинчлиқ вә муқимлиқни ишқа ашуруш ирақлиқларниң өзиниң иши, ирақниң ишини ирақлиқлар өзи идарә қилиши керәк' дегән.

Кондилиза райс ханим 'америка ирақта муқимлиқни бузған дөләтләргә қарита тәдбир қоллиниду' дәп қайтидин тәкитлиди

Бирләшмә агентлиқиниң хәвәр қилишичә, америка президенти җорҗи буш йеқинда қилған бир сөзидә иран вә сүрийиләрни ирақниң муқимлиқини бузуватиду, дәп әйиблигән иди. Америкиниң ташқи ишлар миниситири кондилиза райс ханим бүгүн мухбирларниң суаллириға җаваб бәргәндиму 'америка ирақта муқимлиқни бузған дөләтләргә қарита тәдбир қоллиниду' дәп қайтидин тәкитлиди. Б б с ниң хәвәр қилишичә, бүгүн райс ханим бу сөзни қилиштин бир нәччә саәт бурунла, америка қисимлири һәрикәт қоллинип, иранниң ирақниң шимал тәрипидики әрбил шәһиридә туридиған әлчиханисидин 5 кишини қолға алған.

4000 Америка әскири ирақниң әнбар өлкисигә бариду

Америка авазиниң баян қилишичә, америка президенти җорҗи буш вә асаслиқ һөкүмәт әрбаблири америка һөкөмитиниң йеңи ирақ истратегийисигә болған қаршилиқларға рәддийә бәрди. Җорҗи буш бүгүн 'америка әскәрлириниң көпәйтилиши ирақтики зораванлиқ һәрикәтләрни тосайду, америкиниң ирақ һөкүмитигә бәргән вәдиси уларға мәңгү ярдәм қиливириш әмәс, америка бу йил ирақниң мудапиәсини тамамән ирақ қисимлириға өткүзүп бериду' деди. У чаршәнбә күни кәчтә елан қилған телевизийә нутқида, ираққа көпәйтип әвәтилидиған әскәрләрниң 4000 и әлқаидичиләрниң ирақтики әң чоң паалийәт мәркизи болған әнбар өлкисигә баридиғанлиқини тәпсилий ейтқан иди. (Вәли)