Bushning yéngi iraq istratégiyisini iraq hökümiti qizghin qollidi, emma boninggha xitay hökümitining mu'amilisi soghuq

Birleshme agéntliqining xewer qilishiche, amérika prézidénti bush 10 ‏- yanwar küni kechte téléwiziye nutqi élan qilip, iraqta yüz bergen xataliqlargha özi jawabkar bolidighanliqini؛ hazir iraqtiki quchqachtek uchqur topulanglarni tinjitish lazimliqini؛ iraqtiki hazirqi 132 ming esker sanini 153 minggha köpeytish we buning üchün 5 milyard 600 milyon amérika dolliri serp qilishni otturigha qoydi.

Amérika dölet mejlisini kontrol qilip turuwatqan démokratlar prézidént bushning yéngi iraq siyasitini tenqidlidi

Hazir amérika dölet mejlisini kontrol qilip turuwatqan démokratlar prézidént bushning yéngi iraq siyasitini tenqidlidi. Amérika kéngesh palatasining ezasi xarri réyt ependi 'prézidént bush buyil 11 ‏- ayda élip bérilghan ottura mewsümlük parlamint saylimining netijisige we uning teshebbuslirigha pisent qilmidi, ikki partiye birlikte qurghan tetqiqat guruppisi otturigha qoyghan tekliplergimu pisent qilmidi' dep naraziliq bildürdi. Kéngesh palata ezasi barek obama ependi 'amérika iraqtiki ichki urushta bala baqquchi bolmaymiz, biz prérzidént bushning iraqqa esker köpeytishini cheklishimiz kérek' dédi.

Iraq hökümiti amérikining yéngi istratégiyisini tamamen qollaydu

B b s ning xewer qilishiche, iraqning bash minisitiri nuri el malikining bayanatchisi nahir ependi ' iraq hökümiti amérikining yéngi istratégiyisini tamamen qollaydu, iraqqa esker köpeytishini qizghin qarshi alidu, chünki amérika eskerliri köplep kelse, ularning iraqqa yardimi köp tégidu, iraq qisimlirimu köplep herbiy telim alidu' dégen. Xewerde bayan qilinishiche yene, shi'elerdin saylan'ghan bir parlamint ezasi 'amérikining iraqqa esker köpeytishining hajiti yoq' dégende, sünniylerdin saylan'ghan yene bir parlamint ezasi 'amérikining esker köpeytishi zörür, chünki iraq qisimlirining urush qilish qabiliyiti töwen, uning üstige bu qoshunning ichige topulangchilar suqunup kiriwalghan' dégen. Kurtlardin saylan'ghan bir parlamnt ezasimu, özining bushning köz qarishigha qoshulidighanliqini, bu pilanni emeliyleshtürüsh iraq hökümitige baghliq ikenlikini bildürgen.

Xitay hökümiti bushning istratégiyisige soghuq mu'amile qilmaqta

Amérikining ittipaqdashliridin awstraliye, yaponiye, koriye qatarliq döletlerdiki uchur wastiliri hazir keyni -keynidin bayan qilip, amérika prézidénti jorji bushning yéngi iraq istratégiyisini qizghin qollimaqta. Emma, xongkong téléwiziye istansisining bayan qilishiche, xitay hökümiti buninggha soghuq mu'amile qilmaqta. Xewerde éytilishiche, xitay tashqi ishlar minisitirliqining bayanatchisi lyu jenchaw peyshenbe küni muxbirlarning su'allirigha jawab bergende, xitay hökömiti prézidént bushning nutqigha déqqet qiliwatidu, xitay hökümiti iraqta weziyet dawalghup turuwatidu we iraqni qaytidin qurush ishi köp xil qéyinchiliqqa duch kéliwatidu, dep qaraydu. Tégi-tektidin éytqanda, iraqta tinchliq we muqimliqni ishqa ashurush iraqliqlarning özining ishi, iraqning ishini iraqliqlar özi idare qilishi kérek' dégen.

Kondiliza rays xanim 'amérika iraqta muqimliqni buzghan döletlerge qarita tedbir qollinidu' dep qaytidin tekitlidi

Birleshme agéntliqining xewer qilishiche, amérika prézidénti jorji bush yéqinda qilghan bir sözide iran we süriyilerni iraqning muqimliqini buzuwatidu, dep eyibligen idi. Amérikining tashqi ishlar minisitiri kondiliza rays xanim bügün muxbirlarning su'allirigha jawab bergendimu 'amérika iraqta muqimliqni buzghan döletlerge qarita tedbir qollinidu' dep qaytidin tekitlidi. B b s ning xewer qilishiche, bügün rays xanim bu sözni qilishtin bir nechche sa'et burunla, amérika qisimliri heriket qollinip, iranning iraqning shimal teripidiki erbil shehiride turidighan elchixanisidin 5 kishini qolgha alghan.

4000 Amérika eskiri iraqning enbar ölkisige baridu

Amérika awazining bayan qilishiche, amérika prézidénti jorji bush we asasliq hökümet erbabliri amérika hökömitining yéngi iraq istratégiyisige bolghan qarshiliqlargha reddiye berdi. Jorji bush bügün 'amérika eskerlirining köpeytilishi iraqtiki zorawanliq heriketlerni tosaydu, amérikining iraq hökümitige bergen wedisi ulargha menggü yardem qiliwirish emes, amérika bu yil iraqning mudapi'esini tamamen iraq qisimlirigha ötküzüp béridu' dédi. U charshenbe küni kechte élan qilghan téléwiziye nutqida, iraqqa köpeytip ewetilidighan eskerlerning 4000 i elqa'idichilerning iraqtiki eng chong pa'aliyet merkizi bolghan enbar ölkisige baridighanliqini tepsiliy éytqan idi. (Weli)