بۇش تېررورچىلىققا قارشى ئۇرۇش توغرىسىدا نۇتۇق سۆزلىدى


2005-10-06
Share
bush-ned.jpg
ئامېرىكا پرېزىدېنتى بۇش ۋاشىنگتوندىكى رونالد رېگان بىناسىنىڭ يىغىن زالىدا ‎تېررورچىلىققا قارشى ‎ئۇرۇش توغرىسىدا نۇتۇق سۆزلىدى. ‎ئاقساراي رەسىمى

ئامېرىكا پرېزىدېنتى جورج ۋ بۇش پەيشەنبە كۈنى ئەتىگەن شەرقىي ۋاقىت سائەت 10 دىن 15 مىنۇت ‎ئۆتكەندە، ۋاشىنگتوندىكى رونالد رېگان بىناسىنىڭ يىغىن زالىدا تېررورچىلىققا قارشى ‎ئۇرۇش توغرىسىدا نۇتۇق سۆزلىدى. ‎

پرېزىدېنت بۇش سۆزىنىڭ بېشىدا 2001 - يىلى يۈز بەرگەن 11 -سېنتەبىر ۋەقەسىنى ئەسلەپ ئۆتۈپ، ‎ئامېرىكا ئەسكەرلىرىنىڭ بۇ ۋەقەنى سادىر قىلغۇچى ئەركىنلىكنىڭ دۈشمەنلىرىگە قارشى ‎كۆرەشكە تەييار ئىكەنلىكىنى ئېيتىپ مۇنداق دېدى:‎

‎ "بىز ئىنسانلار دۇچ كەلگەن بۇ ئەجەللىك خەتەرگە تاقابىل تۇرىمىز. بىز بۇ تېررورچىلىققا قارشى ‎ئۇرۇشتا يېڭىپ چىقمىغىچە، ھېرىپ قالمايمىز ۋە توختاپ قالمايمىز".‎

ئىسلام رادىكالچىلىرى ئىسلام دىنىنىڭ شۇنداقلا ئىنسانىيەتنىڭ دۈشمىنى

ئۇ سۆزىدە يەنە، 11 - سېنتەبىر ۋەقەسىنىڭ ئامېرىكا خەلقى ھەرگىزمۇ ئۇنتۇلۇپ قالمايدىغان ‎بىر ۋەقە ئىكەنلىكىنى، شۇنداقلا بۇ ۋەقەنى سادىر قىلغان ئىسلامىي رادىكال تېررورچىلارنىڭ ‎ھازىر ئىراق قاتارلىق ئەرەب دۆلەتلىرىدىلا ئەمەس، بەلكى ياۋروپا ۋە ئاسىيادىكى دۆلەتلەردىمۇ ‎تېررورچىلىق پائالىيەتلىرىنى ئېلىپ بېرىشقا ئۇرۇنۇپ، گۇناھسىز خەلققە زىيان يەتكۈزۈشنى ‎پىلانلاۋاتقانلىقىنى بىلدۈردى. ئۇ سۆزىدە، ئىسلام رادىكالچىلىرىنىڭ ئىدېئولوگىيىسىنىڭ ئىسلام ‎دىنىدىن تۈپتىن پەرقلىنىدىغانلىقىنى ئېيتتى. ئۇ مۇنداق دېدى:‎

‎"بۇ ئۇرۇشچىلار، ئامېرىكىنىڭ ياكى ئىراقنىڭلا دۈشمىنى ئەمەس. ئۇلار، ئىسلامنىڭ ھەمدە ‎پۈتۈن ئىنسانلارنىڭ دۈشمىنى".‎

بىز ئۆكتىچىلەر ۋە سۈرگۈندىكىلەر بىلەن بىرگە تۇرۇپ باستۇرمىچى ھاكىمىيەتلەرگە قارشى ‎تۇرىمىز. چۈنكى بىز بۈگۈنكى بۇ ئۆكتىچىلەرنىڭ، ئەتىكى كۈندە دېموكراتىك رەھبەرلەرگە ‎ئايلىنىدىغانلىقىنى بىلىمىز.

پرېزىدېنت بۇش نۇتۇقىدا، ئىسلام رادىكالچىلىرىنىڭ ئىدېئولوگىيىسى ھەققىدە بىر قانچە قېتىم ‎توختىلىپ، ئۇلارنىڭ كوممۇنىزم بىلەن بۇ جەھەتتە نۇرغۇن ئورتاقلىقلارغا ئىگە ئىكەنلىكىنى، ھەر ‎ئىككىلىسىنىڭلا مۇستەبىت ھۆكۈمرانلىق تىكلەشنى مەقسەت قىلىپ، ئۆزلىرىدىن باشقا ھەر قانداق ‎بىرىنىڭ ھوقۇققا ئىگە بولۇشىنى خالىمايدىغانلىقىنى بىلدۈردى. ئۇ مۇنداق دېدى:‎

‎"كوممۇنىزىمنىڭ ئىدېئولوگىيىسىگە ئوخشاش، بىزنىڭ بۇ يېڭى دۈشمىنىمىز ئەركىن ‎كىشىلەرنى كەمسىتىدۇ ھەمدە ئەركىن ياشاۋاتقان ئەر ۋە ئاياللارنى ئاجىز، چۈشكۈن دەپ ‎قارايدۇ".‎

بۇش سۆزىدە، 50 مىليون كىشىنى ئەركىنلىككە ئېرىشتۈرۈشنىڭ ئۆزىنىڭ باتۇرلۇق ‎ھېسابلىنىدىغانلىقىنى ھەمدە دېموكراتىيىنىڭ دۈشمىنىگە قارشى ھۇجۇمغا ئۆتۈشنىڭ ‎باتۇرلۇق ئىكەنلىكىنى ئېيتىپ، ئىسلامىي رادىكال دەل كوممۇنىزىمنىڭ بىر-بىرىگە زىت ئىدىيىسىگە ‎ۋارىسلىق قىلغان بولغاچقا، ئۇنىڭ چوقۇم مەغلۇبىيەتكە دۇچ كېلىدىغانلىقىنى ئەسكەرتتى.‎

تېررورچىلارغا ياردەمدە بولىۋاتقانلار يەنىلا بار

بۇش نۇتۇقىدا، ئامېرىكىنىڭ 11 - سېنتەبىر ۋەقەسىدىن كېيىن تېررورچىلارغا قارشى ئۇرۇش ‎سېپىگە ئۆتۈپ، بۇ تۆت يىل جەريانىدا ھەر قايسى دۆلەتلەرنىڭ ھەمكارلىقىدا نۇرغۇن نەتىجىلەرنى ‎قولغا كەلتۈرگەنلىكىنى، بولۇپمۇ ئەل قەئىدە تەشكىلاتىنىڭ 10 غا يېقىن تېررورلۇق سۈيقەستىنى ‎بىتچىت قىلغانلىقىنى بىلدۈردى. ئۇ يەنە، ئامېرىكىنىڭ تېررورچىلىققا قارشى ئۇرۇشىنى بىر قىسىم ‎دۆلەتلەر قوللاپ -قۇۋەتلىگەن بولسىمۇ، لېكىن سۈرىيە، ئىرانغا ئوخشاش بەزى دۆلەتلەرنىڭ ‎تېررورچىلارغا ياردەم قىلىۋاتقانلىقىنى ئەيىبلىدى. ئۇ مۇنداق دېدى:‎

‎"ئامېرىكا قوشما شىتاتلىرى، تېررورچىلىق قىلغۇچىلار بىلەن ئۇلارغا ياردەم قىلغۇچىلارنى ‎ۋە قانات ئاستىغا ئالغۇچىلارنى پەرقلەندۈرمەيدۇ. چۈنكى ئۇلار ھەر ئىككىلىسىلا قاتىلغا ‎ئوخشاشلا گۇناھكاردۇر".‎

شۇنداقلا ئۇ يەنە، رادىكال گۇرۇپپىلارنىڭ تېررورچىلارغا ياردەم قىلىشىغا، ئامېرىكىنىڭ ‎قەتئىي يول قويمايدىغانلىقىنى ئېيتتى. ‎

ئىراقتىكى دېموكراتىيە چوقۇم غەلىبە قىلىدۇ ‎

بۇش سۆزىدە يەنە ئىراقنىڭ نۆۋەتتىكى ۋەزىيىتىدە توختىلىپ، " بەزى كىشىلەر ئىراقتىكى ھەر قايسى ‎تەرەپلەر ئوتتۇرىسىدىكى تالاش-تارتىشلارغا قاراپ، ئىراق دېموكراتىيىسىنى داۋالغۇشتا قالدى ‎دەۋاتىدۇ ، ئەمما دەل بۇ بەس-مۇنازىرە ۋە ھەر خىل پىكىرلەرنىڭ ئۆزى دېموكراتىيىنىڭ ‎ئەمەلىيلىشىشى ھېسابلىنىدۇ" دەپ بىلدۈردى. شۇنداقلا ئۇ ئىراقنىڭ كەلگۈسىگە ئۈمىد بىلەن ‎قارايدىغانلىقىنى ئىپادىلىدى. ئۇ مۇنداق دېدى:‎

بىز ئىنسانلار دۇچ كەلگەن بۇ ئەجەللىك خەتەرگە تاقابىل تۇرىمىز. بىز بۇ تېررورچىلىققا قارشى ‎ئۇرۇشتا يېڭىپ چىقمىغىچە، ھېرىپ قالمايمىز ۋە توختاپ قالمايمىز.

‎"بىزنىڭ ئىشەنچىمىز كامىل، بىزنىڭ قوشۇنىمىز ۋە ھەر بىر ئىراق خەلقى ئۆزلىرىنىڭ ‎ۋەزىپىسىنى ئادا قىلىۋاتىدۇ. ئىراقتىكى دېموكراتىيە چوقۇم غەلىبە قىلىدۇ".‎

بۇش سۆزىدە، ئىراقتا غەلىبە بولمىغىچە، تىنچلىق بولمايدىغانلىقىنى، شۇڭا ئۇلارنىڭ ‎پۈتۈن كۈچى بىلەن بۇ غەلىبىنى قولغا كەلتۈرىدىغانلىقىنى ئېيتتى. ئۇ يەنە، ئامېرىكىنىڭ ‎ئەركىنلىك، دېموكراتىيىنى قوغدايدىغان بىر دۆلەت ئىكەنلىكىنى ۋە بۇ يولدا پائالىيەت ‎قىلىدىغانلار بىلەن ئاداققىچە بىر يولدا تۇرىدىغانلىقىنى تەكىتلىدى. ئۇ مۇنداق دېدى:‎

‎"بىز ئۆكتىچىلەر ۋە سۈرگۈندىكىلەر بىلەن بىرگە تۇرۇپ باستۇرمىچى ھاكىمىيەتلەرگە قارشى ‎تۇرىمىز. چۈنكى بىز بۈگۈنكى بۇ ئۆكتىچىلەرنىڭ، ئەتىكى كۈندە دېموكراتىك رەھبەرلەرگە ‎ئايلىنىدىغانلىقىنى بىلىمىز". ‎

‎11 -سېنتەبىر ۋەقەسىنىڭ 4 يىللىقى مۇناسىۋىتى بىلەن ئېلىپ بېرىلغان بۇ يىغىن، ئامېرىكىدىكى ‎دۆلەتلىك دېموكراتىيىنى ئىلگىرى سۈرۈش فوندى جەمئىيىتى تەرىپىدىن ئورۇنلاشتۇرۇلغان بولۇپ، ‎يىغىنغا يەنە، ئامېرىكا تاشقى ئىشلار مىنىستىرى كوندولىزا رايس، دۆلەت مۇداپىئە مىنىستىرى ‎دونالد رامسفېلد ۋە ئامېرىكا قوراللىق قىسىم باش شىتاب رەئىسى گېنېرال پېتېر پېيس قاتارلىق ‎ئەمەلدارلار قاتناشتى. (پەرىدە)‎

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت