Буш террорчилиққа қарши уруш тоғрисида нутуқ сөзлиди

• Мухбиримиз пәридәниң бу һәқтики мәлумати
• Download story audio

Америка президенти буш вашингтондики роналд реган бинасиниң йиғин залида ‎террорчилиққа қарши ‎уруш тоғрисида нутуқ сөзлиди. ‎Ақсарай рәсими

Америка президенти җорҗ в буш пәйшәнбә күни әтигән шәрқий вақит саәт 10 дин 15 минут ‎өткәндә, вашингтондики роналд реган бинасиниң йиғин залида террорчилиққа қарши ‎уруш тоғрисида нутуқ сөзлиди. ‎

Президент буш сөзиниң бешида 2001 - йили йүз бәргән 11 -сентәбир вәқәсини әсләп өтүп, ‎америка әскәрлириниң бу вәқәни садир қилғучи әркинликниң дүшмәнлиригә қарши ‎көрәшкә тәйяр икәнликини ейтип мундақ деди:‎

‎ "Биз инсанлар дуч кәлгән бу әҗәллик хәтәргә тақабил туримиз. Биз бу террорчилиққа қарши ‎урушта йеңип чиқмиғичә, һерип қалмаймиз вә тохтап қалмаймиз".‎

Ислам радикалчилири ислам дининиң шундақла инсанийәтниң дүшмини

У сөзидә йәнә, 11 - сентәбир вәқәсиниң америка хәлқи һәргизму унтулуп қалмайдиған ‎бир вәқә икәнликини, шундақла бу вәқәни садир қилған исламий радикал террорчиларниң ‎һазир ирақ қатарлиқ әрәб дөләтлиридила әмәс, бәлки явропа вә асиядики дөләтләрдиму ‎террорчилиқ паалийәтлирини елип беришқа урунуп, гунаһсиз хәлққә зиян йәткүзүшни ‎пиланлаватқанлиқини билдүрди. У сөзидә, ислам радикалчилириниң идеологийисиниң ислам ‎динидин түптин пәрқлинидиғанлиқини ейтти. У мундақ деди:‎

‎"Бу урушчилар, америкиниң яки ирақниңла дүшмини әмәс. Улар, исламниң һәмдә ‎пүтүн инсанларниң дүшмини".‎

Биз өктичиләр вә сүргүндикиләр билән биргә туруп бастурмичи һакимийәтләргә қарши ‎туримиз. Чүнки биз бүгүнки бу өктичиләрниң, әтики күндә демократик рәһбәрләргә ‎айлинидиғанлиқини билимиз.

Президент буш нутуқида, ислам радикалчилириниң идеологийиси һәққидә бир қанчә қетим ‎тохтилип, уларниң коммунизм билән бу җәһәттә нурғун ортақлиқларға игә икәнликини, һәр ‎иккилисиниңла мустәбит һөкүмранлиқ тикләшни мәқсәт қилип, өзлиридин башқа һәр қандақ ‎бириниң һоқуққа игә болушини халимайдиғанлиқини билдүрди. У мундақ деди:‎

‎"Коммунизимниң идеологийисигә охшаш, бизниң бу йеңи дүшминимиз әркин ‎кишиләрни кәмситиду һәмдә әркин яшаватқан әр вә аялларни аҗиз, чүшкүн дәп ‎қарайду".‎

Буш сөзидә, 50 милйон кишини әркинликкә ериштүрүшниң өзиниң батурлуқ ‎һесаблинидиғанлиқини һәмдә демократийиниң дүшминигә қарши һуҗумға өтүшниң ‎батурлуқ икәнликини ейтип, исламий радикал дәл коммунизимниң бир-биригә зит идийисигә ‎варислиқ қилған болғачқа, униң чоқум мәғлубийәткә дуч келидиғанлиқини әскәртти.‎

Террорчиларға ярдәмдә боливатқанлар йәнила бар

Буш нутуқида, америкиниң 11 - сентәбир вәқәсидин кейин террорчиларға қарши уруш ‎сепигә өтүп, бу төт йил җәрянида һәр қайси дөләтләрниң һәмкарлиқида нурғун нәтиҗиләрни ‎қолға кәлтүргәнликини, болупму әл қәидә тәшкилатиниң 10 ға йеқин террорлуқ сүйқәстини ‎битчит қилғанлиқини билдүрди. У йәнә, америкиниң террорчилиққа қарши урушини бир қисим ‎дөләтләр қоллап -қувәтлигән болсиму, лекин сүрийә, иранға охшаш бәзи дөләтләрниң ‎террорчиларға ярдәм қиливатқанлиқини әйиблиди. У мундақ деди:‎

‎"Америка қошма шитатлири, террорчилиқ қилғучилар билән уларға ярдәм қилғучиларни ‎вә қанат астиға алғучиларни пәрқләндүрмәйду. Чүнки улар һәр иккилисила қатилға ‎охшашла гунаһкардур".‎

Шундақла у йәнә, радикал гуруппиларниң террорчиларға ярдәм қилишиға, америкиниң ‎қәтий йол қоймайдиғанлиқини ейтти. ‎

Ирақтики демократийә чоқум ғәлибә қилиду ‎

Буш сөзидә йәнә ирақниң нөвәттики вәзийитидә тохтилип, " бәзи кишиләр ирақтики һәр қайси ‎тәрәпләр оттурисидики талаш-тартишларға қарап, ирақ демократийисини давалғушта қалди ‎дәватиду , әмма дәл бу бәс-муназирә вә һәр хил пикирләрниң өзи демократийиниң ‎әмәлийлишиши һесаблиниду" дәп билдүрди. Шундақла у ирақниң кәлгүсигә үмид билән ‎қарайдиғанлиқини ипадилиди. У мундақ деди:‎

Биз инсанлар дуч кәлгән бу әҗәллик хәтәргә тақабил туримиз. Биз бу террорчилиққа қарши ‎урушта йеңип чиқмиғичә, һерип қалмаймиз вә тохтап қалмаймиз.

‎"Бизниң ишәнчимиз камил, бизниң қошунимиз вә һәр бир ирақ хәлқи өзлириниң ‎вәзиписини ада қиливатиду. Ирақтики демократийә чоқум ғәлибә қилиду".‎

Буш сөзидә, ирақта ғәлибә болмиғичә, тинчлиқ болмайдиғанлиқини, шуңа уларниң ‎пүтүн күчи билән бу ғәлибини қолға кәлтүридиғанлиқини ейтти. У йәнә, америкиниң ‎әркинлик, демократийини қоғдайдиған бир дөләт икәнликини вә бу йолда паалийәт ‎қилидиғанлар билән адаққичә бир йолда туридиғанлиқини тәкитлиди. У мундақ деди:‎

‎"Биз өктичиләр вә сүргүндикиләр билән биргә туруп бастурмичи һакимийәтләргә қарши ‎туримиз. Чүнки биз бүгүнки бу өктичиләрниң, әтики күндә демократик рәһбәрләргә ‎айлинидиғанлиқини билимиз". ‎

‎11 -Сентәбир вәқәсиниң 4 йиллиқи мунасивити билән елип берилған бу йиғин, америкидики ‎дөләтлик демократийини илгири сүрүш фонди җәмийити тәрипидин орунлаштурулған болуп, ‎йиғинға йәнә, америка ташқи ишлар министири кондолиза райс, дөләт мудапиә министири ‎доналд рамсфелд вә америка қораллиқ қисим баш шитаб рәиси генерал петер пейс қатарлиқ ‎әмәлдарлар қатнашти. (Пәридә)‎