Bush térrorchiliqqa qarshi urush toghrisida nutuq sözlidi


2005.10.06
bush-ned.jpg
Amérika prézidénti bush washin'gtondiki ronald régan binasining yighin zalida ‎térrorchiliqqa qarshi ‎urush toghrisida nutuq sözlidi. ‎Aqsaray resimi

Amérika prézidénti jorj w bush peyshenbe küni etigen sherqiy waqit sa'et 10 din 15 minut ‎ötkende, washin'gtondiki ronald régan binasining yighin zalida térrorchiliqqa qarshi ‎urush toghrisida nutuq sözlidi. ‎

Prézidént bush sözining béshida 2001 - yili yüz bergen 11 -séntebir weqesini eslep ötüp, ‎amérika eskerlirining bu weqeni sadir qilghuchi erkinlikning düshmenlirige qarshi ‎köreshke teyyar ikenlikini éytip mundaq dédi:‎

‎ "Biz insanlar duch kelgen bu ejellik xeterge taqabil turimiz. Biz bu térrorchiliqqa qarshi ‎urushta yéngip chiqmighiche, hérip qalmaymiz we toxtap qalmaymiz".‎

Islam radikalchiliri islam dinining shundaqla insaniyetning düshmini

U sözide yene, 11 - séntebir weqesining amérika xelqi hergizmu untulup qalmaydighan ‎bir weqe ikenlikini, shundaqla bu weqeni sadir qilghan islamiy radikal térrorchilarning ‎hazir iraq qatarliq ereb döletliridila emes, belki yawropa we asiyadiki döletlerdimu ‎térrorchiliq pa'aliyetlirini élip bérishqa urunup, gunahsiz xelqqe ziyan yetküzüshni ‎pilanlawatqanliqini bildürdi. U sözide, islam radikalchilirining idé'ologiyisining islam ‎dinidin tüptin perqlinidighanliqini éytti. U mundaq dédi:‎

‎"Bu urushchilar, amérikining yaki iraqningla düshmini emes. Ular, islamning hemde ‎pütün insanlarning düshmini".‎

Biz öktichiler we sürgündikiler bilen birge turup basturmichi hakimiyetlerge qarshi ‎turimiz. Chünki biz bügünki bu öktichilerning, etiki künde démokratik rehberlerge ‎aylinidighanliqini bilimiz.

Prézidént bush nutuqida, islam radikalchilirining idé'ologiyisi heqqide bir qanche qétim ‎toxtilip, ularning kommunizm bilen bu jehette nurghun ortaqliqlargha ige ikenlikini, her ‎ikkilisiningla mustebit hökümranliq tikleshni meqset qilip, özliridin bashqa her qandaq ‎birining hoquqqa ige bolushini xalimaydighanliqini bildürdi. U mundaq dédi:‎

‎"Kommunizimning idé'ologiyisige oxshash, bizning bu yéngi düshminimiz erkin ‎kishilerni kemsitidu hemde erkin yashawatqan er we ayallarni ajiz, chüshkün dep ‎qaraydu".‎

Bush sözide, 50 milyon kishini erkinlikke érishtürüshning özining baturluq ‎hésablinidighanliqini hemde démokratiyining düshminige qarshi hujumgha ötüshning ‎baturluq ikenlikini éytip, islamiy radikal del kommunizimning bir-birige zit idiyisige ‎warisliq qilghan bolghachqa, uning choqum meghlubiyetke duch kélidighanliqini eskertti.‎

Térrorchilargha yardemde boliwatqanlar yenila bar

Bush nutuqida, amérikining 11 - séntebir weqesidin kéyin térrorchilargha qarshi urush ‎sépige ötüp, bu töt yil jeryanida her qaysi döletlerning hemkarliqida nurghun netijilerni ‎qolgha keltürgenlikini, bolupmu el qe'ide teshkilatining 10 gha yéqin térrorluq süyqestini ‎bitchit qilghanliqini bildürdi. U yene, amérikining térrorchiliqqa qarshi urushini bir qisim ‎döletler qollap -quwetligen bolsimu, lékin süriye, iran'gha oxshash bezi döletlerning ‎térrorchilargha yardem qiliwatqanliqini eyiblidi. U mundaq dédi:‎

‎"Amérika qoshma shitatliri, térrorchiliq qilghuchilar bilen ulargha yardem qilghuchilarni ‎we qanat astigha alghuchilarni perqlendürmeydu. Chünki ular her ikkilisila qatilgha ‎oxshashla gunahkardur".‎

Shundaqla u yene, radikal guruppilarning térrorchilargha yardem qilishigha, amérikining ‎qet'iy yol qoymaydighanliqini éytti. ‎

Iraqtiki démokratiye choqum ghelibe qilidu ‎

Bush sözide yene iraqning nöwettiki weziyitide toxtilip, " bezi kishiler iraqtiki her qaysi ‎terepler otturisidiki talash-tartishlargha qarap, iraq démokratiyisini dawalghushta qaldi ‎dewatidu , emma del bu bes-munazire we her xil pikirlerning özi démokratiyining ‎emeliylishishi hésablinidu" dep bildürdi. Shundaqla u iraqning kelgüsige ümid bilen ‎qaraydighanliqini ipadilidi. U mundaq dédi:‎

Biz insanlar duch kelgen bu ejellik xeterge taqabil turimiz. Biz bu térrorchiliqqa qarshi ‎urushta yéngip chiqmighiche, hérip qalmaymiz we toxtap qalmaymiz.

‎"Bizning ishenchimiz kamil, bizning qoshunimiz we her bir iraq xelqi özlirining ‎wezipisini ada qiliwatidu. Iraqtiki démokratiye choqum ghelibe qilidu".‎

Bush sözide, iraqta ghelibe bolmighiche, tinchliq bolmaydighanliqini, shunga ularning ‎pütün küchi bilen bu ghelibini qolgha keltüridighanliqini éytti. U yene, amérikining ‎erkinlik, démokratiyini qoghdaydighan bir dölet ikenlikini we bu yolda pa'aliyet ‎qilidighanlar bilen adaqqiche bir yolda turidighanliqini tekitlidi. U mundaq dédi:‎

‎"Biz öktichiler we sürgündikiler bilen birge turup basturmichi hakimiyetlerge qarshi ‎turimiz. Chünki biz bügünki bu öktichilerning, etiki künde démokratik rehberlerge ‎aylinidighanliqini bilimiz". ‎

‎11 -Séntebir weqesining 4 yilliqi munasiwiti bilen élip bérilghan bu yighin, amérikidiki ‎döletlik démokratiyini ilgiri sürüsh fondi jem'iyiti teripidin orunlashturulghan bolup, ‎yighin'gha yene, amérika tashqi ishlar ministiri kondoliza rays, dölet mudapi'e ministiri ‎donald ramsféld we amérika qoralliq qisim bash shitab re'isi général pétér péys qatarliq ‎emeldarlar qatnashti. (Peride)‎

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.