Буш русийә президентигә ядро қораллар вә демократийә мәсилисидики сәзгүрликини әсләтти


2005-02-24
Share
SLOVAKIA-BUSH-PUTIN-200.jpg
Америка президенти буш (сол) билән русийә президенти владимир путин, 24-феврал славакийә пайтәхти братиславда мухбирларни күтүвелиш йиғинида.. AFP

Русийидики демократийә ислаһати, москваниң иран вә шимали корийә ядро қораллар мәсилиси, оттура - шәрқ вәзийити вә енергийә һәмкарлиқи қатарлиқ мәсилиләр, пәйшәнбә күни славакийә пайтәхти братиславда үчрашқан америка президенти җорҗи буш билән русийә президенти владимир путинлар оттурисидики сөһбәтниң муһим темисини игилигән. Иран мәсилиси путин билән бушниң сөһбитидики әң сәзгүр темиларниң бири болди.

Америка билән русийә ядро қоралларниң кеңийишини тосайду

Икки дөләт рәһбири сөһбәттин кейин өткүзгән мухбирларни күтүвелиш йиғинида, америка билән русийә иран билән шималий корийиниң ядро қоралларға игә болушиға йол қоюлмайдиғанлиқи тоғрисида ортақ пикиргә игилиқини җакарлиди. Буш " биз - америка билән русийә дуня миқясида ядро қораллар шундақла ядро матиряллирини кеңәйтмәсликкә капаләтлик қилишқа қошулдуқ. Мән буниң үчүн рәһмәт ейтимән," дәп көрсәтти.

Президент бушниң билдүрүшичә, улар шимали корийә вә иран ядро қоралларға игә бомаслиқи керәк, дигән тонушқа кәлгән. Русийә президенти өткән һәптә иранниң ядро қораллар ясаш нийити йоқлиқини әскәртип, иранни зиярәт қилидиғанлиқини билдүргән иди. Русийә иранниң бушер шәһиридики ядро рияктор қазинини ясаш пиланиға ярдәм қиливатқан болуп, москва билән теһранниң ядро әслиһәләр җәһәттики һәмкарлиқи америкини биарам қилмақта иди.

Президент буш русийидики демократийә һәққидә тохталди

Демократийә һәммигә ортақ болған нәрсә, бу қанун бойичә иш қилиш, көпчиликни қоғдаш, ахбарат әркинлики шундақла сияси өктичиликкә йол қоюш қатарлиқларни өз ичигә алиду

Җорҗи буш сөһбәт җәрянида, русийә демократийисиниң истиқбалидин туйған әндишилирини тилға алған. Күчлүк дөләтләрниң демократийигә муһтаҗлиқини тәкитлигән буш мундақ дәйду: " демократийә һәммигә ортақ болған нәрсә, бу қанун бойичә иш қилиш, көпчиликни қоғдаш, ахбарат әркинлики шундақла сияси өктичиликкә йол қоюш қатарлиқларни өз ичигә алиду." Буш, мәзкур универсал принсиплар бойичә русийә тоғрисидики әндишилирини шериклишиш нийитим барлиқини шундақла бу һәқтики әндишилирини иҗабий вә достанә йоллар билән уқтурғанлиқини билдүрди.

Владимир путин, ғәрб әллириниң бу мәсилидики әндишилирини орунсиз, дәп көрсәтти. У, русийиниң демократийини талливалғанлиқини әскәртип, " һәр қандақ шәкилдики диктатур түзүмгә қайтиш мүмкин әмәс," дәп тәкитлиди.

Буш, словакийиликләрниң дуняға демократийә тарқитишини үмид қилди

Президент буш шу күни братислав шәһиридики мәркизи мәйданда славакийә пуқралириға сөзлигән нутуқида, славакийиниң 1989 - йилдики демократийигә көчүш мусаписини махтап, славакийиликләрниң бу роһни демократик болмиған дөләтләргә тарқитишини үмид қилди. У мундақ деди: " силәр кичик бир дөләт болуш сүпитиңлар билән дуняға азадлиқни тарқитиш җәһәттә улуғ идийини яраттиңлар."

У, ирақниң һазирқи әһвали билән славакийиниң әйни йилларда демократийилишиш мусаписини селиштуруп, словаклар вә шәрқий явропалиқлар ирақни демократийиләштүрүшниң әһмийитини чүшиниду, дәп көрсәтти. Буш, " ирақлиқлар үчүн, бу уларниң 1989 - йили, улар әркинликни қолға кәлтүрүш йолида кимләрниң улар билән бир сәптә турғанлиқини әсләп туриду," диди.

Русийә билән америка террорчилиққа қарши һәмкарлиқни күчәйтиду

Брарислав, президент бушниң явропадики зияритиниң ахирқи бекити. Америка президенти билән русийә рәһбири братиславда учрушишниң сәл алдида икки тәрәп йеник типтики башқурулидиған бомбиларни контрол қилиш мәсилиси бойичә келишим түзгән. Терорчиларниң йеник типтики башқурулидиған бомбилар билән йолучилар айрупиланлириға һуҗум қилиш еһтимали америкини әндишигә селиватқан мәсилиләрниң бири.

Икки дөләт йәнә русийидики ядро әслиһәләрни қоғдашни күчәйтиш мәсилиси бойичә келишим имзалиған. Йеқинда америка мәркизи ахбарат идарисиниң қармиқидики органлар, русийидики ядро әслиһәләрдин радиактип матирялларниң оғурланғанлиқини илгири сүргән иди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт