Bush térror gumandarlirigha munasiwetlik qanun layihisige qol qoydi


2006-10-18
Share
Amérika prézidénti jurj bush 10‏-ayning 17 - küni aq sarayda térror gumandarlirini soraq qilish usul we mitotlirini békitken talash tartishtiki bir qanun layihisige qol qoymaqta. Aqsaray resimi.

Amérika hökümet xadimlirining bildürüshiche, seyshenbe küni amérika prézidénti jurj bush teripidin imzalinip yolgha qoyulghan qanun layihisi, amérika hökümitining térror gumandarlirini muddetsiz tutup turushigha ruxset qilidiken.

Prézidént bush, aqsarayda mezkur qanun layihisini imzalash murasimida bergen bayanatida, bu qanun amérikigha qarshi térrorluq hujumliri élip bérilishining aldini alghan istratégiysini testiqlap, xald sheyx muhemmet qatarliq 11‏- séntebir térrorluq hujumlirining bash pilanlighuchilirini herbiy sotta sotlash yolini achidu, dédi. Bu qanunning amérika puqralirining hayatini qoghdaydighanliqini tekitligen prézidént bush, bundaq bir qanun'gha qol qoyghanliqi üchün özini bextiyar hés qilidighanliqini bildürdi.

Lékin amérika dölet mejlisidiki démokrat partiyisining wekilliri hemde kishilik hoquq teshkilatliri prézidént bush teripidin imzalan'ghan qanun layihisini qattiq tenqid qilmaqta.

Amérika dölet mejlisidiki démokrat partiye wekilliridin id murfi, prézidént bush teripidin imzalan'ghan qanunning amérika xelqini bixeter qilalmaydighanliqini tekitlep, bu qanun jenwe kélishimige xilap hemde amérika herbiy xadimlirining chet'ellerde sotqa tartilish xetirini köpeytip, urush jinayiti ishligen amérika emeldarlirigha özlirini qoghdash üchün shara'it yaritip bérishi mumkin, dédi.

Amérika puqralar hörlük we erkinlik ittipaqining mudiri, antoni romiro, mezkur qanunni qattiq tenqid qilip, emdi prézidént, dölet mejlisining testiqi bilen, kishilerni sotlimay mudedtsiz tutup turalaydu. Ularni pakitsiz deliller bilen sotqa tartalaydu hemde bu sotlarda urup iqrar qildurulghan shahitlar bergen melumatlargha asasen kishilerning ölüm jazasigha höküm qilinishi mumkin, dédi.

Amérikidiki Uyghur qanunshunas nuri türkel, prézidént bush teripidin seyshenbe küni imzalan'ghan qanunning eng nachar teripi gü'entanamoda tutup turuluwatqan xald sheyx muhemmet qatarliq 11‏- séntebir térrorluq hujumlirini pilanlighanlargha qanun aldida özini aqlash pursiti yaritip, Uyghurlargha oxshash gunahsiz tutup turuluwatqanlarning, özlirining néme üchün tutup turuluwatqanliqining seweblirini bilish üchün sotqa erz sunush hoquqining qolliridin élin'ghanliqi, deydu.

Bu heqtiki tepsili melumatlarni, muxbirimiz qanatning mexsus programmisidin anglang.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet