Prézidént bush amérikining dölet ehwali heqqide nutuq sözlidi


2007-01-24
Share

Amérika prézidénti jorji bush seyshenbe küni kechte dölet mejliside amérikining dölet ehwali heqqide doklat bermekte. AFP

Amérika prézidénti jorji bush seyshenbe küni kechte dölet mejliside amérikining dölet ehwali heqqide doklat bérip, amérikiliqlarni ichki we tashqiy mesililerde siyasi ittipaqliqqa chaqirdi. Bu jorji bushning amérika prézidénti bolup wezipe ötewatqandin béri 7 - qétim dölet mejliside amérikining dölet ehwalidin doklat bérishidur. Lékin bu qétimqi doklat démokratlar partiyisi amérika dölet mejlisining awam we kéngesh palatalirida üstünlükni igiligen shundaqla iraqtiki köngülsiz weziyet tüpeyli xelq rayini sinash netijiliride amérika xelqining prézidént bushni qollash nisbiti tarixtiki eng töwen sewiyige chüshüp qalghan ehwal astida élan qilindi.

Bush: bizning mes'uliyitimizde özgirish bolmidi

Prézidént bush nutuqida amérika puqralirini amérikining ichki we tashqi ghayisini ijra qilishta ittipaqlishishqa chaqirdi. Bush, démokratlar partiyisi köp sanliqni igileydighan dölet mejliside siyasi küchlerning tengpungluqidiki özgirish heqqide toxtilip, gerche dölet mejliside jumhuriyetchiler partiyisi köp sanliqni igilimeydighan bolsimu, lékin amérikining üstige alghan mejburiyitide özgirish bolmidi, dep körsetti. U, "dölet mejliside özgirish bolghan bolsimu, lékin bizning mes'uliyitimizde özgirish bolmidi. Bizning her birimizning öz aldigha tutqan yolimiz bar shundaqla biz bu yolimizda ching turushimiz kérek. Lékin bizning bu yaxshi niyetlik pilanimizgha xizmet qilidighan ortaq ölchimimiz bar. Bu bolsimu döletni téximu bayashatliqqa érishtürüsh, xelqning pulini aqilane yollargha ishlitish, mesililerni hel qilish we mesilini kéyinki ewlatlargha qoyup qoymasliqtur. Rezil küchlerge qarshi amérikini qoghdap, bizni qoghdash üchün ewetilgen kishilerge ishinishimiz kéreklikidur " deydu.

Shimaliy koriye we kishilik hoquq mesilisi

Bush amérika dölet mejlisidiki nutuqida yene shimaliy koriye mesilisi we kishilik hoquqni tilgha aldi. U, shimaliy koriye yadro mesilisi bolupmu shimaliy koriyini yadro qorallardin xali qilishta diplomatik tirishchanliqini dawamlashturidighanliqini bildürdi. Kishilik hoquqni qoghdash mesiliside bolsa bérma we sudan shundaqla kishilik hoquqi xatirisi kishilerni endishige séliwatqan dunyaning her qaysi jayliridiki mesililer heqqide toxtaldi. Bush, "biz xitay, yaponiye, rusiye we jenubiy koriye qatarliq shériklirimiz bilen birge koriye yérim arilini yadro qorallardin xali rayon'gha aylandurush yolidiki diplomatik tirishchanliqimizni dawamlashturimiz shundaqla biz kuba, bélurusiye, bérmigha oxshash döletlerni erkinlikke heydekchilik qilish bilen birge, dunyani darfur xelqini qoghdashqa oyghitishni dawamlashturimiz," dep körsetti.

Prézidént bush bu yilqi amérikining dölet ehwali heqqidiki nutuqida xitay kishilik hoquqi xatirisini biwaste tilgha almidi. Analizchilarning eskertishiche, amérika shimaliy koriye yadro qorallar söhbitide shundaqla iran we sudanning darfur rayoni mesiliside xitayning qollishigha éhtiyaj boluwatqan bir chaghda, béyjing hökümitining achighini keltüridighan sözlerni qilishtin özini qachurghan bolushi mumkin.

Iraq siyasiti

Prézidént bush nutuqida yene dölet mejlisidin bush hökümitining yéngi iraq istratégiysini qollashni we iraq mesilisde hökümetke purset bérishni telep qildi. Prézidént bush yéqinda iraqqa 21 ming kishilik yardemchi qoshun ewetidighanliqini jakarlighandin kéyin, dölet mejlisidiki démokratlarning shundaqla bir qisim jumhuriyetchilerning qarshi turushigha uchrighan. Bush seyshenbe künki nutuqida hökümetning iraqqa yardemchi qoshun ewetish pilanini qollashni telep qildi. U, "biz iraqta yéngi istratégiye yolgha qoyuwatimiz. Bu pilanda iraq hökümitining téximu köp tirishchanliq körsitishi telep qilin'ghan shundaqla ular bu pilanni ijra qilishta bizning qisimlirimizgha éhtiyaj tuymaqta. Bizning nishanimiz qanun bilen idare qilinidighan, öz xelqining hoquqigha hörmet qilidighan, ularni qoghdaydighan, térrorchiliqqa qarshi küreshtiki ittipaqchi we démokratik iraqtur " deydu. Bush, eger amérika qisimliri öz wezipisini tamamlashtin burun baghdattin chékinse, iraq hökümitini chékidin ashqan esebiy küchler tizginliwalidighanliqini shundaqla zorawanliqning iraq we ottura sherqte téximu kéngiyidighanliqini we buning amérikigha tehdit élip kélidighanliqini agahlandurdi. Iraq mesilisi amérika dölet mejlisidiki démokratlar bilen bush hökümiti arisida mewjüt nigizlik ixtilaplarning biri bolup hésablinidu.

Bushning nutiqigha inkaslar

Prézidént bushning dölet ehwali heqqidiki doklatigha amérika dölet mejlisidiki démokratlar bilen jumhuriyetchiler oxshimighan inkas qayturdi. Démokratlar partiyisining wirjiniye kéngesh palata ezasi jém web, bushning iraq siyasitini tenqid qilghuchi siyasetchilerning biridur. U, "bizning yéngi yölinishke éhtiyajimiz bar. Bu xelq'ara térrorchiliqqa qarshi küreshte arqigha chékin'genlik emes shundaqla bu alman - talman qoshun chékindürüsh we iraqta topilangning kéngiyish éhtimaligha köz yumghanliqmu emes. Bu dégenlik jiddiy burulush yasash, rayon xaraktérlik diplomatiyige yüzlinish, eskerlirimizni chékindürüsh, dégenliktur " deydu. Lékin jumhuriyetchi awam palata ezasi roy blunt, bushning dölet ehwali heqqidiki doklatidin kéyin bayanat élan qilip, kishi'ilerni prézidént bush we amérika armiyisining iraqtiki ghelibisini qollashqa chaqirdi. Lékin shundaqtimu iraq mesiliside jumhuriyetchiler partiyisining ichki qisimida pikir ixtilapi mewjüt bolup, kéngesh palatasi herbiy ishlar komitétining re'isi jon warnér, iraqta qoshun köpeytishke qarshi turuwatqan jumhuriyetchi kéngesh palata ezalirining biridur. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet