Bush türkiye re'is jumhuri abdullah gülge téléfon qilip sebir tilidi

Amérikining istanbul konsolosliqigha hujum qilip 3 saqchi shéhit qilin'ghandin kéyin amérika prézidénti bush, türkiye dölet re'isi abdullah gülge téléfon qilip abdullah güldin we abdullah gül arqiliq türk saqchilirining a'ililiridin sewire tilidi.
Muxbirimiz erkin tarim xewiri
2008-07-11
Share
Turkiye-3-shehit-depnisi-305 7 - Ayning 9 - küni amérikining istanbul konsolosliqida yüz bergen hujumda ölgen 3 saqchi shéhitlirining depine murasimidin körünüsh.
AFP Photo

 Bushning teziyisi

Türkiye re'is jumhurliqi sariyi axbarat merkizi élan qilghan bu heqtiki bayanatta mundaq déyilgen: "re'is jumhuri abdullah gül özige téléfon qilip izdigen bush bilen sözleshti. Bush türk hökümitining istanbuldiki amérika konsolosliqini qoghdash üchün qilghan xizmetliridin minnetdar ikenlikini, konsolosliqni qoghdaymen dep shéhit bolghan 3 saqchining a'ile tawabi'atlirigha, türkiye xelqighe amérika xelqi namidin rexmet éytish üchün téléfon qilghanliqini éytqandin kéyin, abdullah gülning bu teziyeni türk xelqighe we shéhitlerning a'ile tawabi'atlirigha yetküzüp qoyushini iltimas qilghan. Re'is jumhurimiz abdullah gülmu bushqa rexmet éytqandin kéyin, bushning teziyesini shéhit a'ililirige yetküzüp qoyidighanliqini éytti. Kéyin abdulla gül bushqa, térrorgha qarshi küreshte türkiyining amérika bilen élip bériwatqan hemkarliqning qanchilik muhim ikenlikinimu tekitligen. Shundaqla rayon xaraktérliq mesililer heqqidimu muzakiriler élip bérilghan."

4 Gumandarning hemmisi qolgha chüshürüldi

7 - Ayning 9 - küni amérikining konsolosliqigha élip bérilghan hujumda, térroristlar bilen saqchilar otturisidiki toqunushta hujum qilghan kishilerdin üchi nex meydanda öltürülgendin kéyin, biri kelgen mashinisi heydep qéchip ketken idi. Üch kün izdesh netijiside bügün bu gumandarmu istanbulda qolgha chüshürüldi.

Jebrayil qoshan aslan isimliq bu gumandar men qilmidim dep téniwalghan. Hazirghiche yene 10 gumandar türk saqchiliri teripidin qolgha élin'ghan bolup, bu kishilerning qaysi térror teshkilatigha eza ikenlikini éniqlashqa tirishiwatidu. Térror mutexessislirining beziliri türk metbu'atlirigha bergen bayanatida, bularning el qa'ide térror teshkilati bilen alaqisi barliqini ilgiri sürse, yene beziliri türkiyidiki bezi teshkilatlar bilen munasiwiti barliqini ilgiri sürüshmekte.

3 Saqchi shéhit öz yurtlirida depine qilindi

Quralliq étishish jeryanida shéhit bolghan mehmet sachmali'oghlu, erdal öztash we nedim chaliqlar üchün istanbul xewpsizlik idarisida depine murasimi ötküzüldi.

Bu murasimgha ministirler, parlamént ezaliri istanbul walisi we amérikining istanbul konsolosi we konsolosliqta ishleydighan amérikiliqlar bolup köp sanda kishi qatnashti.

Amérika elchisi wilson muxbirlargha bayanat bérip amérika hökümitige wakaliten qehriman türk saqchilirigha rexmet éytti. Kéyin bu shéhitlerning jinaziliri tughulghan yurtlirigha ewetilip on minglarche kishi qatnashqan jinaza murasimliri bilen depne qilindi.

Konsolosluqtiki amérikiliqlar türklerge yardem qildimu?

4 Térrorist türkiyining istanbul shehridiki amérika konsolosliqigha hujum qilghan waqitta, wiza élish üchün öchirette saqlawatqan köp sanda kishi bar iken. Del bu mezgilde térroristler amérika konsolosliqigha qaritip oq chiqirip konsolosluqqa kirishke temshelgende konsolosliqni qoghdawatqan saqchilar bilen yoldiki qatnash saqchiliri térroristlargha qarshi oq chiqirip étiship ölgen, beziliri yarilan'ghan. Bu weqeni nex meydanda körgen bezi kishiler amérikiliqlarning ishikini étiwélip sirtqa chiqmighanliqini ilgiri sürgen idi. Bu toghriliq türk metbu'atlirida keng kölemde munazire élip bérildi.

Bu heqte istanbul walisi muhammer güler bilen amérika konsulxanisi muxbirlargha bayanat berdi. Wali güler ependi yarilan'ghan saqchilargha néme üchün amérikiliqlar yardem qilmidi? dégen so'algha mundaq jawab berdi:"konsolosliq ichide amérikiliq qoghdighuchilar bar. Sin'alghu kasitliridin wiza üchün saqlawatqan türklerni amérikiliqlarning konsolosliq ichige kirgüziwalghanliqini körduq. Emma amérika konsolosluqining ishikliri térrorluq hujum kelgenliki signali kelgen haman aptomatik étilip qalidiken. Konsolosliq binasi térror hujumigha qarshi alahide lahiyilep 11 - séntebir weqesidin kéyin sélin'ghan bir bina iken."

Amérika konsolosining éytishiche amérikiliqlar türk saqchilirigha qolidin kélishiche yardem qilghan: "    türk saqchilirining nahayiti ching qa'idiliri bar. Biz türk saqchilirini qoghdashqa tirishtuq. Biz ulargha qolimizdin kélishiche yardem qilduq. Türk saqchisi hujumgha uchrighanda konsolos xadimlirimizdin bir qanche kishi sirtqa chiqip yarilan'ghan saqchilarni qutquzushqa tirishti. Türk saqchiliri bizni qoghdash üchün janlirini pida qildi. Biz ulargha rexmet éytimiz."
 
Xelq'ara qanun boyiche, amérikiliqlar konsolosliqning sirtigha chiqqanda türk zéminigha ayaq basqan bolidiken. Shunga bu xil ehwallarda amérikiliq qoghdighuchilarning qoligha qoral élip térroristlar bilen étishishi qanun'gha xilap iken.

Türkiyidiki pütün siyasiy partiyiler, ammiwi teshkilatlar bu hujumni qattiq eyiblidi.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.