Chén shuybyenningdöletni birlikke keltürüshni axirlashturush qarari


2006-02-27
Share

Teywen prézidénti chén shuybyen 2 ‏- ayning 22 - küni, teywen dölet mudapi'e komitétining aliy yighinida döletni 'birlikke keltürüsh komitéti' dégen organni bikar qilidighanliqini élan qilghan idi, ‏- dep bayan qilinidu 'fransiye agéntliqi'ning 27 ‏-féwral küni bergen xeweride. Uningda éytilishiche, ‏- chén shuybyen bu qararni élan qilghanda yene 'döletni birlikke keltürüsh bash prinsipi' dégen prinsipmu buninggha qoshup teng bikar qilinidu dep eskertken. Bu qarar élan qilin'ghandin kéyinla, teywen bilen chong quruqluq arisidiki buninggha da'ir ishlargha kétidighan xirajet tuxtitilghan. Chén shuybyenning bu qararidin kéyin teywen- xitay-amérika munasiwetliride yéngi talash -tartish bashlan'ghan.

Xitayning inkasi

'B b s' ning xewer qilishiche, kommunist xitay hökümitining teywen'ge qaritilghan ikki chong orgini 26 ‏- féwral küni béyjingde bayanat élan qilip 'chén shuybyenning döletni birlikke keltürüshni bikar qilish qarari teywen boghizining tinchliqini buzdi' dep eyibligen.

'Roytrs agéntliqi' ning xewer qilishiche, xitay dölet kabinti teywen ishliri ishxanisining shinxu'a agéntliqi arqiliq élan qilghan bayanatida "chén shuybyenning 'döletni birlikke keltürüshni bikar qilish' dégen herikiti teywende asasiy qanun islahatini yolgha qoyup, teywenni musteqil qilishni közleydu. Chén shuybyenning teywen musteqilliqini derije örlitish üchün qollan'ghan bundaq herikiti teywen boghizi rayonida éghir krizis peyda qilidu we teywen boghizining tinch -muqimliqini buzidu" dep eyibligen. Bu bayanatta yene chén shuybyen'ge "derhal bundaq xeterlik yoldin keynige chékinishi kérek"dep agahlandurush bergen.

Teywenning inkasi

Xewerde bayan qilinishiche, teywenning chong quruqluq komitétimu kommunist xitay hökümitining eyiblishige jawaben bayanat élan qilip "kommunst xitay hökümiti bultur 3 ‏- ayda 'bölünüshke qarshi turush qanuni ' dégen bir qanunni özliri maqullap, shuningdin kéyin teywenning hazirqi halitini özgertish qedimini hedep tizli'itshke bashlidi. Xitay hökümiti bu qanun arqiliq ikki terep munasiwitini yaxshilashqa éghir tosqunluq qildi. Teywen xelqining dilini aghritti. Sherqiy asiyaning rayon da'irilik tinchliqigha éghir xewp yetküzdi. Teywenning kelgüsini teywendiki 23 milyon xelq özi belgileydu. Chong quruqluqtiki kommunist hökümitining buni belgilesh hoquqi yoq' dep qayta tekitlidi. Xewerde éytilishiche, teywen prézidénti chén shuybyen yéqinda yene 'birlikke keltürüshni bikar qilish'ning konkrét waqit jediwilini élan qilidiken.

'Amérika awazi'ning xewer qilishiche, teywen prézidénti chén shuybyen ötken heptide teywenning dölet mudapi'e komitétining aliy yighinida 'döletni birlikke keltürüsh komitéti' dégen organni we 'döletni birlikke keltürüsh bash prinsipi' dégen prinsipni bikar qilish qararini jakarlighandin kéyin, 27 ‏- féwral küni, teywen prézidént mehkimisining bash katibi chén tangsen bilen teywen dölet mudapi'e komitétining bash katibi chin yirénlar muxbirlarning su'allirigha jawap bergen.

Amérikining inkasi

Bu ikki bash katibning bayan qilishiche, teywen prézidénti chén shuybyen ötken heptide 'döletni birlikke keltürüsh komitéti' dégen organni we 'döletni birlikke keltürüsh bash prinsipi' dégen prinsipni bikar qilish'ni jakarlighandin kéyin, amérikning qattiq bésimigha duch kelgen. Chén shuybyen amérika dölet mejlisige bu qararning teywenning hazirqi halitini özgertidighan qarar emesliki heqqide tepsiliy izahat bergen. Axirqi hésabta amérika dölet mejlisi chén shuybyenning bu qararini tosalmighan. Emma chén shuybyen bu qarardiki 'döletni birlikke keltürüsh komitéti' dégen organni we 'döletni birlikke keltürüsh bash prinsipi' dégen prinsipni bikar qilish dégen sözni 'döletni birlikke keltürüsh komitéti' dégen organni we 'döletni birlikke keltürüsh bash prinsipi' dégen prinsipni ayaqlashturush ' dep atashqa özgertken. Qanun mutexessislirining éytishiche, bundaq atash qanuniy uqumgha toghra kélidiken.

Amérikining nyuyork shehiride turushluq siyasiy mulahizichi lin bawxu'a ependi bu heqte "yéngi esir zhurnili"da obzor élan qilip "peqet kommunist xitay hökümiti teywen'ge qaratqan döletni birlikke keltürüsh herikitini toxtatsila , andin teywenning hazirqi halitini özgertmeslikni emelge ashurghili bolidu" dep mulahize qilghan. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet