Шаңхәй партком секретариниң хиянәтчиликкә четилип қелиш дилоси кеңәймәктә

Хитай мәркизи интизам комитетиниң баш катипи гән йишиң сәйшәнбә күни шаңхәй шәһәрлик партком секретари чен ляңйүйниң хиянәтчилик сәтчиликигә четилип қелиш дилоси мунасивити билән елан қилған баянатида, "илгириләп тәкшүрүлсә, бәзи кишиләрниң бу дилоға четилип қелиш еһтималини чәткә қақмайдиғанлиқини" билдүргән иди.

Ройтерс ахбарат агентлиқиниң хәвәр қилишичә, чен ляңйүйниң хиянәтчиликкә четилип қелиш сәтчиликиниң даириси кеңәймәктә.

Шаңхәй шәһәрлик партком сиясий қанун комитетиниң башлиқи ву җимиң мәркизи интизам тәкшүрүш комитетиниң хадимлири тәрипидин сорақ қилинған. Бу йил 54 яшлардики ву җимиң шаңхәй шәһәрлик җамаәт хәвпсизлик идарисиниң башлиқи, шаңхәйдики қораллиқ сақчи қисимлириниң сиясий комиссари қатарлиқ муһим вәзипиләрни қошумчә үстигә алған болуп, у өз нөвитидә йәнә хитай компартийисиниң пинсийигә чиққан баш секретари җаң земинниң җийәни иди. Бу кишиләрдә ву җимиң чен ляңйүйниң хиянәтчилик дилосиға четилип қалған болуши мумкин, дегән гуман қозғимақта.

Мутәхәссисләр: ху җинтавниң җаң земин тәрәпдарлирини тазилаш һәрикити

Шаңхәй шәһәрлик һөкүмәттики вәқәдин хәвәрдар әрбапларниң ройтерс ахбарат агентлиқиға әскәртишичә, ву җимиң һазирчә вәзиписини өтәватқан болсиму, лекин у мәркизи интизам тәкшүрүш комитети тәрипидин "сорақ қилинған" вә бу җәрянда "чен ляңйүйниң икки туққини қолға елинған. "Сияси анализчилар мәзкур дилони хитай дөләт рәиси ху җинтавниң җаң земин тәрәпдарлирини тазилаш, партийә ичидә һоқуқини күчәйтип, келәр йили компартийә 17 - қурултийини мувапиқийәтлик өткүзүшкә капаләтлик қилиш йолидики һоқуқ күриши, дәп муһакимә қилди.

Сингапор дөләт университетиниң шәрқий асия тәтқиқатчиси доктор. Би җйәнхәй, "ху җинтавниң шаңхәй гуруһидикиләргә бәргән әҗәллик зәрбиси униң һакимийәт сориған 4 йил мәбәйнидә һоқуқини мустәһкәмлигәнлики, өзигә ишәнч турғузған вә 17 - қурултайда орунлаштуруш елип бармақчи болуватқанлиқини көрсәтмәктә " дәйду. Лекин шаңхәйлик өктичи адвукат җен енлоңниң әскәртишичә, әгәр бу һәрикәт 17- қурултайниң тәйярлиқи үчүн елип берилған болса, у һалда буниң пуқраларға чоң пайдиси тәгмәйдикән. У, "әмдики мәсилә партийә ичидә буниңға қандақ позитсийә тутидиғанлиқида қалди. Әгәр бу һәрикәт пәқәт шаңхәй гуруһини вәзиписидин елип ташлаш, келәр йили чақирилидиған 17 - қурултайға тәйярлиқ көрүш үчүнла елип берилған болса, у һалда буниң пуқраларға чоң пайдиси йоқ" дәйду.

Чен ляңйүй, шаңхәй шәһириниң иҗтимаий суғурта фондини талан - тараҗ қилиш, тонуш ширкәт вә туққанлириниң мәнпәәтигә чоғ тартиш билән әйибләнмәктә. У, бейҗиң шәһәрлик парткомниң секретари чен шитоң 1995 - йили хиянәтчилик билән әйиблинип вәзиписидин елип ташланған вә түрмигә соланғандин кейин паш қилинған тунҗи сиясий бюро әзаси.

Чен ляңйүй дилоси билән четишлиқи бар әмәлдарларниң әркин саяһәт қилиши чәкләнгән

Нөвәттә хитай мәркизи интизам тәкшүрүш комитетиниң 100 дин артуқ тәкшүргүчи хадими шаңхәй шәһириниң иҗтимаий суғурта фондидики 10 милярд йүән пулни қанунсиз йөткәш вә мәбләғ қилип ишлитиш вәқәси үстидин тәкшүрүш елип бармақта. Бәзи мәтбуатлар дилода йеңи илгириләш болғанлиқини вә чен ляңйүй сәтчилики хитай мәркизи комитет сиясий бюросиниң даимий әзаси хуаң җүйниң аилә - тавабатиға четилидиғанлиқини илгири сүрмәктә. Лекин сәйшәнбә күни бейҗиңда мухбирларға "интизамни бузған һәр бир партийә әзасиниң сүрүштүрүлидиғанлиқини" тәкитлигән мәркизи интизам тәкшүрүш комитетиниң баш катипи гән йишиң, франсийә ахбарат агентлиқи мухбириниң чен ляңйүй сәтчилики хуаң җүй аилисигә четиламду, дегән суалиға "вәқә рәсмий елан қилинғанни асас қилиду" дәп җаваб бәргән.

Шаңхәйлик адвукат җен енлоң, хуаң җүйниң өзини қутқузуш үчүн чен ляңйүйни сатидиғанлиқини билдүрди. У, "мениң қаришимчә хуаң җүй әмди чен ляңйүйни паш қилиду. Чүнки у шаңхәй шәһириниң партком секретари болуп турған йилларда шаңхәйниң пул - муамилиси наһайити қалаймиқан иди. Шу йилларда чен ляңйүй пудоң райониниң башлиқи болған. Хуң җүй, чен ляңйүйни шу йилларда нурғун әски ишларни қилған, дәп әйиблиши мумкин" дәйду.

Хоңкоңда чиқидиған "дагоң" гезитиниң ашкарилишичә, хитай һөкүмити чен ляңйүй дилоси билән четишлиқи бар әмәлдарларниң чәтәлгә қечип кетишини тосаш үчүн шаңхәй айродроми вә деңиз портиға алаһидә хадимларни орунлаштурған. Назарәт дәриҗилик әмәлдарларниң паспорт вә саяһәт рухсәтнамилирини йиғивелип, шәһәр рәһбәрлири чәтәлгә чиқмақчи болса, мәркизи интизам тәкшүрүш комитети вә мәркизи тәшкилат бөлүминиң рухситини елиш түзүмини йолға қойған. (Әркин)