Shangxey partkom sékrétarining xiyanetchilikke chétilip qélish dilosi kéngeymekte

2006-09-27
Élxet
Pikir
Share
Print

Xitay merkizi intizam komitétining bash katipi gen yishing seyshenbe küni shangxey sheherlik partkom sékrétari chén lyangyüyning xiyanetchilik setchilikige chétilip qélish dilosi munasiwiti bilen élan qilghan bayanatida, "ilgirilep tekshürülse, bezi kishilerning bu dilogha chétilip qélish éhtimalini chetke qaqmaydighanliqini" bildürgen idi.

Roytérs axbarat agéntliqining xewer qilishiche, chén lyangyüyning xiyanetchilikke chétilip qélish setchilikining da'irisi kéngeymekte.

Shangxey sheherlik partkom siyasiy qanun komitétining bashliqi wu jiming merkizi intizam tekshürüsh komitétining xadimliri teripidin soraq qilin'ghan. Bu yil 54 yashlardiki wu jiming shangxey sheherlik jama'et xewpsizlik idarisining bashliqi, shangxeydiki qoralliq saqchi qisimlirining siyasiy komissari qatarliq muhim wezipilerni qoshumche üstige alghan bolup, u öz nöwitide yene xitay kompartiyisining pinsiyige chiqqan bash sékrétari jang zéminning jiyeni idi. Bu kishilerde wu jiming chén lyangyüyning xiyanetchilik dilosigha chétilip qalghan bolushi mumkin, dégen guman qozghimaqta.

Mutexessisler: xu jintawning jang zémin terepdarlirini tazilash herikiti

Shangxey sheherlik hökümettiki weqedin xewerdar erbaplarning roytérs axbarat agéntliqigha eskertishiche, wu jiming hazirche wezipisini ötewatqan bolsimu, lékin u merkizi intizam tekshürüsh komitéti teripidin "soraq qilin'ghan" we bu jeryanda "chén lyangyüyning ikki tuqqini qolgha élin'ghan. "Siyasi analizchilar mezkur diloni xitay dölet re'isi xu jintawning jang zémin terepdarlirini tazilash, partiye ichide hoquqini kücheytip, kéler yili kompartiye 17 - qurultiyini muwapiqiyetlik ötküzüshke kapaletlik qilish yolidiki hoquq kürishi, dep muhakime qildi.

Sin'gapor dölet uniwérsitétining sherqiy asiya tetqiqatchisi doktor. Bi jyenxey, "xu jintawning shangxey guruhidikilerge bergen ejellik zerbisi uning hakimiyet sorighan 4 yil mebeynide hoquqini mustehkemligenliki, özige ishench turghuzghan we 17 - qurultayda orunlashturush élip barmaqchi boluwatqanliqini körsetmekte " deydu. Lékin shangxeylik öktichi adwukat jén énlongning eskertishiche, eger bu heriket 17- qurultayning teyyarliqi üchün élip bérilghan bolsa, u halda buning puqralargha chong paydisi tegmeydiken. U, "emdiki mesile partiye ichide buninggha qandaq pozitsiye tutidighanliqida qaldi. Eger bu heriket peqet shangxey guruhini wezipisidin élip tashlash, kéler yili chaqirilidighan 17 - qurultaygha teyyarliq körüsh üchünla élip bérilghan bolsa, u halda buning puqralargha chong paydisi yoq" deydu.

Chén lyangyüy, shangxey shehirining ijtima'iy sughurta fondini talan - taraj qilish, tonush shirket we tuqqanlirining menpe'etige chogh tartish bilen eyiblenmekte. U, béyjing sheherlik partkomning sékrétari chén shitong 1995 - yili xiyanetchilik bilen eyiblinip wezipisidin élip tashlan'ghan we türmige solan'ghandin kéyin pash qilin'ghan tunji siyasiy byuro ezasi.

Chén lyangyüy dilosi bilen chétishliqi bar emeldarlarning erkin sayahet qilishi cheklen'gen

Nöwette xitay merkizi intizam tekshürüsh komitétining 100 din artuq tekshürgüchi xadimi shangxey shehirining ijtima'iy sughurta fondidiki 10 milyard yü'en pulni qanunsiz yötkesh we meblegh qilip ishlitish weqesi üstidin tekshürüsh élip barmaqta. Bezi metbu'atlar diloda yéngi ilgirilesh bolghanliqini we chén lyangyüy setchiliki xitay merkizi komitét siyasiy byurosining da'imiy ezasi xu'ang jüyning a'ile - tawabatigha chétilidighanliqini ilgiri sürmekte. Lékin seyshenbe küni béyjingda muxbirlargha "intizamni buzghan her bir partiye ezasining sürüshtürülidighanliqini" tekitligen merkizi intizam tekshürüsh komitétining bash katipi gen yishing, fransiye axbarat agéntliqi muxbirining chén lyangyüy setchiliki xu'ang jüy a'ilisige chétilamdu, dégen su'aligha "weqe resmiy élan qilin'ghanni asas qilidu" dep jawab bergen.

Shangxeylik adwukat jén énlong, xu'ang jüyning özini qutquzush üchün chén lyangyüyni satidighanliqini bildürdi. U, "méning qarishimche xu'ang jüy emdi chén lyangyüyni pash qilidu. Chünki u shangxey shehirining partkom sékrétari bolup turghan yillarda shangxeyning pul - mu'amilisi nahayiti qalaymiqan idi. Shu yillarda chén lyangyüy pudong rayonining bashliqi bolghan. Xung jüy, chén lyangyüyni shu yillarda nurghun eski ishlarni qilghan, dep eyiblishi mumkin" deydu.

Xongkongda chiqidighan "dagong" gézitining ashkarilishiche, xitay hökümiti chén lyangyüy dilosi bilen chétishliqi bar emeldarlarning chet'elge qéchip kétishini tosash üchün shangxey ayrodromi we déngiz portigha alahide xadimlarni orunlashturghan. Nazaret derijilik emeldarlarning pasport we sayahet ruxsetnamilirini yighiwélip, sheher rehberliri chet'elge chiqmaqchi bolsa, merkizi intizam tekshürüsh komitéti we merkizi teshkilat bölümining ruxsitini élish tüzümini yolgha qoyghan. (Erkin)

Pikirler (0)
Share
Toluq bet