Уйғур елиниң тибби саһәси кризисқа доч кәлмәктә


2006.02.01
Share on WhatsApp
Share on WhatsApp

Йеқинда хитайда ечилған 2006 ‏- йиллиқ мәмликәтлик сәһийә хизмити йиғинида, хитайниң тибби саһәсидә мәвҗут болуп туриватқан "давалиниш һәққи һәддидин ташқири юқири болғанлиқтин дохтурға көрүнүш тәс боливатқан мәсилиләр вә дохтурханиларда бимарниң һаятидин пулни әзиз көридиған әһваллар бир қәдәр ашкариланған. Хитай өлкилиридә мәвҗут болуп туриватқан тибби саһәсидики бу хил мәсилиләр уйғур елидә техиму еғир болуп, кишиләрниң наразилиқини қозғимақта.

Йеқинда хитайда елан қилинған аммивий сәһийә мәсилиси һәққидики бир доклатта, хитай һөкүмитиниң тибби саһәгә дәп аҗратқан сәһийә хираҗитиниң 80% и, омумий нопусниң 30 пирсәнтини игилигән шәһәр хәлқиғә тәқсим қилинған болуп, 70% ини игилигән йеза хәлқиғә берилгән пул пәқәт сәһийә хираҗитиниң 20% ни игилигән. Тиббий саһәсидики бу хил тәңпуңсизлиқ деһқанларниң қаттиқ наразилиқини қозғиған.

Деһқанларниң давалиниши тәс

Зияритимизни қобул қилған ғулҗа шәһиригә қарашлиқ йезидики бир деһқан аял мәзкур җайдики деһқанларниң дохтурға көрүнүшиниң интайин тәскә тохтайдиғанлиқини сөзләп келип, һөкүмәтниң деһқанлар үчүн беридиған сәһийә хираҗитиниң 20% киму йәтмәслики мумкин дәп қариған.

Зияритимизни қобул қилған бу деһқан аял мәзкур йезида һазир юқумлуқ кесәлләрниңму барғансери көпийиватқанлиқини, лекин һөкүмәтниң бу җәһәттә деһқанларға дегәндәк көңүл бөлмәйватқанлиқини, көңүл бөлгән һаләттиму пәқәт ишләпчиқириш қурулуш армийисидикиләргә етибар беридиғанлиқини мәлум қилди.

Тәңпуңсизлиқ еғир

Мунасивәтлик мәлуматларда көрситилишичә, хитай һөкүмитиниң тибби саһәсидики тәңпуңсизлиқни пәқәт сәһийә хираҗитиниң адил тәқсим қилинмиғанлиқидинла әмәс, бәлки пуқралар давалиништа дәриҗигә бөлүнүп, ортақ капаләткә игә болалмайдиғанлиқидинму көрүвалғили болидикән. Мәсилән, һазир хитайниң тиббий саһәдики мулазимәт хизмәтлиридә охшимиған дәриҗидики һөкүмәт хадимлири охшимиған дәриҗидә пайдилиналайдикән. юқири дәриҗилик һөкүмәт әмәлдарлири болса пүтүнләй һәқсиз давалиниш мулазимитигә игә болуп, адәттики һөкүмәт әмәлдарлириму охшимиған дәриҗидә һәқсиз мулазимәтләргә еришәләйдикән.

Зияритимизни қобул қилған ғулҗа шәһири достлуқ дохтурханисидики бир бимар өзиниң адәттики бир оқутқучи болуш сүпити билән давалиништа бир қисим капаләтләргә игә икәнликини мәлум қилиш билән бир вақитта, охшимиған дәриҗидики һөкүмәт хадимлириниң охшимиған дәриҗидә давалаш капалитигә игә болидиғанлиқини һәмдә өзиниң бу хил әһвалдин интайин нарази икәнликини билдүрди.

Мунасивәтлик мәлуматларға қариғанда, һазир хитайда, давалаш капалитигә игә болғучилар сани пәқәт омумий нопусниң 15 % нила игилигән болуп, омумий нопусниң 85% ни игилигән хәлқ һечқандақ давалаш капалитигә игә болалмиған. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт