Xitayning tibbi saheside élip barghan islahati meghlup boldi


2005.12.21

2005 ‏- Yilining axiri, xitay hökümiti 1989 ‏- yildin buyan tibbi saheside élip bériwatqan islahatining meghlup bolghanliqigha resmi iqrar bolup, xitaydiki dawalash sistémisining heqiqeten kishini endishige qoyuwatqanliqini melum qildi.

Xitay sehiye ministirliqining bashliqi gaw chyangning bildürüshiche, xitayning sehiye sahesidiki tereqqiyat yéterlik bolmighan, sehiye qurulmisida élip bériliwatqan islahat arqida qalghan, bolupmu yézilardiki sehiye mesilisi ta hazirgha qeder bir terep qilinmighanliqtin, déhqanlar késel bolup qalsa doxtur yoq, sheherdiki doxturxanilargha yügreydighan ehwal yenila mewjut bolup turghan.

Dawalinish kapalitige érishelmigenler nisbiti yuqiri

Xitay dölet ministiri wén jyabaw yéqinda bérilgen bir qétimliq xizmet doklatida, xitayda mewjut bolup turiwatqan sehiye mesiliside toxtilip, hökümetning aldi bilen bolupmu yéza rayonliridiki xelqning dawalinish mesilisige alahide köngül bölüshi kéreklikini tekitligen.

Xitay emgek we ijitma'iy kapalet ministirliqi istraxowaniye tetqiqat bölümining bashliqi wu jichang yéqinda xitayda échilghan 2005 ‏- yilliq islahat élip bérish yighinida, her qaysi derijilik hökümet orunlirining sehiye sahesige salghan meblighining nahayiti az ikenlikini tekitlep, hazir xitayning omumiy sehiye xirajitining 60% i puqralar teripidin yighilidighanliqini, sheher xelqning 44% i dawalash kapalitige ige bolalmaywatqanliqini, yéza xelqi arisida dawalash kapalitige érishelmeywatqanlarning nisbiti 80% ke yetkenlikini alahide otturigha qoyghan.

Xitay dölet kabénti tereqqiyat tetqiqat merkizidiki wu jinglyen ependi "kirimi töwen kishilerning dawalash heqqini hökümet kötürüshi kérek, bu hökümetning mes'uliyiti " dep körsetken.

Amérika xarward uniwérsitétining ammiwiy sehiye institutidiki proféssor shyaw chinlyen ependi xitaydiki sehiye mesilisining bu qeder éghir haletke yétishidiki seweb, hökümetning hedidin tashqiri chirikliship ketkenlikidin, sehiye orunliri bolsa öz menpetini közde tutup, heqiqiy islahat élip bérishni xalimighanliqtin shundaqla hökümetning doxturxanilarni yaxshi bashqurmay, ularning bimarlardin qalaymiqan pul yighishigha yol qoyghanliqidin " dep körsetti.

Namratliq bimarlarni doxturxanidin yiraqlashturmaqta

Radi'omizning heqsiz liniyisige kelgen téléfonlardin melum bolushiche, gerche xitay hökümiti yillardin buyan sehiye saheside nurghun siyaset we belgilimilerni békitken bolsimu, namrat déhqanlar buningdin héchqandaq behriman bolalmighan. Köp sandiki déhqanlar késel bolup qalsimu puli yoq doxturgha körünelmeydighan ehwal nahayiti omumliship ketken.

Bu heqte ziyaritimizni qobul qilghan qeshqerdiki bir déhqan ayal köpligen qeshqer déhqanliri gerche éghir késel bolup qalghan halettimu, namratliqtin doxturxana ishiki aldigha baralmaydighanliqini melum qildi.

Ziyaritimizni qobul qilghan bu déhqan ayal qeshqerdiki doxturxanilarning bimarlargha tutqan nachar pozitsiyisini shundaqla doxturlarning ilaji bar bimarlardin pul ündürüwélishqa urunidighanliqini ashkarilidi.

Radi'omizning heqsiz léniyisige téléfon qilghan bir Uyghurning bildürüshüshiche, hazir Uyghur élide mutleq köp sandiki kishiler peqet ilaji bolmighan shara'itta andin doxturxanigha baridiken.

Hayattin pul muhim

Ziyaritimizni qobul qilghan Uyghur élidiki ösme késellikler doxturxanisida ishleydighan bir doxtur hazir Uyghur élidiki doxturxanilarning hemmisi dégidek pütünley kompiyoturliship ketkenlikini, shunga bimarlar eger dawalinish jeryanida dawalash heqqini waqti - waqtida tölep turmisa, dawalash xizmitining aptomatik toxtap qalidighanliqini tekitlep, bu xil ehwal astida doxturlarmu héchqandaq amal qilalmaydighanliqini bildürdi.

Amérika xarward uniwérsitétining ammiwiy sehiye institutidiki proféssor shyaw chinlyen ependi xitay hökümitining dölet sehiye ministirliqigha buyruq chüshürüp, ammiwiy sehiye sahesige köplep meblegh sélishi kéreklikini körsetti. (Méhriban)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.