Шаңхәйлик дәвагәр бейҗиңда сақчилар тәрипидин уруп өлтүрүлди

• Мухбиримиз меһрибанниң бу һәқтики мәлумати
• Download story audio

Бундин илгири биз шаңхәйлик ака ‏- сиңил дуән хүймин вә дуән чүнфаңниң бейҗиңға берип юқирилап әрз қилмақчи болғинида, сақчиларниң уларниң алдини тосуп, дуән хүйминни қаттиқ уруп зәхмиләндүргәнлики һәмдә уни қолға елип, қамап қойғанлиқи һәққидә хәвәр бәргән идуқ.

Йеңи йиллиқ "совға"

Мәзкур вәқә йүз бәргәндин кейин, дуән хүйминниң сиңлиси дуән чүнфаң вә униң 80 яштин ашқан ата -аниси бирликтә бейҗиңға келип дуән хүйминни қоюп беришни тәләп қилған. Бу йил 12 ‏- айниң ахирилири биз бейҗиңда дава қилип йүргән дуән чүнфаңни зиярәт қилғинимизда, у акиси дуән хүймин сақчилар тәрипидин уруп зәхмиләндүрүлгәндин кейин, қамақта йетиш җәрянида униңға һечқандақ давалиниш пурсити берилмигәнликини мәлум қилған.

Дуән чүнфаңниң билдүрүшичә, әйни чағда акиси дуән хүймин уни қоғдаш үчүн сақчилар тәрипидин урулған вә интайин еғир яриланған һәмдә та икки айға қәдәр еғиз, бурун вә қулақлиридин қан тохтимиған. Гәрчә у көп қетим давалинишни тәләп қилған болсиму, сақчилар униң өлүп -тирилиши билән қилчә кари болмиған. Улар уни өлүштин икки күн бурун йәни 31 ‏- декабир күни сиңлиси дуән чүнфаңниң өйигә әкилип ташлиған. Сақчилар һәтта дуән хүймин өлүштин икки күн илгири, униң қолиға уни бир йиллиқ қамақ җазасиға һөкүм қилған қәғәзни тапшуруп бәргән. Пүтүн бәдини қанға боялған дуән хүймин йеңи йил күни дохтурханиға апирилғандин кейин, әтисила җан өзгән.

Сәйшәнбә күни дохтурханиға берип дуән хүйминни йоқлиған давагәр җу дуңхүй радиомизниң зияритини қобул қилип, өзиниң ду хүйминни көргән чағдики униң ечинишлиқ һалитини сөзләп бәрди.

Давагәр җу дуңхүй сөзидә "у көрүнүш бәкму ечинишлиқ, униң қосиқи көпүп кәткән, көз, қулақ, еғиз -бурун һәммә йеридин қан еқип турған. Мән бәкму чөчүп кәттим. Дохтурларниң дейишичә, әгәр әйни чағда дәл вақтида дохтурханиға әкәлгән болса, уни қутқузуп қалғили болаттикән. Чүнки униң меңә вә ич - бағри һәммисигә қан уюған болуп, вақитниң узириши билән уюған қан пүтүн бәдәнни кардин чиқарған" дәп билдүрди.

Дуән хүйминниң инисиниң ейтқанлири

Дуән хүйминниң иниси дуән рофий чаршәнбә күни радиомизниң зияритини қобул қилип, акисиниң өлүш алдида қилған вәсийитини сөзләп келип, сақчиларниң акисиға интайин рәһимсизлик қилғанлиқини мәлум қилди.

Дуән рофий сөзидә "сақчилар 4 ‏- ноябир күни акамни уруп яриландурғандин кейин, акам шаңхәй хуаң пу җамаәт хәвпсизлик идарисигә көп қетим илтимас қилип, давалинишни тәләп қилған икән. Лекин униң тәлипи пүтүнләй рәт қилинған. Сақчилар һәтта униң йетип ухлишиғиму рухсәт қилмай, уни олтурған пети охлашқа мәҗбурлапту. Бу хил қийнашқа бәрдашлиқ берәлмигән акам күнсери аҗизлап ахири һошидин кәткән. Бу хил әһвални көргән сақчилар 28 ‏- декабир күни уни түрмә дохтуриға көрсәткәндә, түрмә дохтури сақчиларға акамни дәрһал қоюп бериш керәкликини һәмдә униң пәқәт 3 - ‏4 күнла вақти қалғанлиқини билдүргән икән. Шуниң билән сақчилар 31 ‏- декабир күни өләр һаләттә қалған акамни сиңлимниң өйигә әкилип ташлапту" дәп билдүрди. Дуән хүйминниң иниси дуән рофий радиомизниң зияритини қобул қиливатқан шу пәйттә, униң 80 яштин ашқан аниси вә сиңлисиниң йеға авази аңлинип туратти:

Биз шаңхәй хуаң пу җамаәт хәвпсизлик идарисигә телефон қилип, мәзкур вәқәни сүрүштүрмәкчи болдуқ. Лекин қарши тәрәп өзлириниң бу иш билән һечқандақ мунасивити йоқ икәнликини билдүрди. Дуән хүйминниң аилисидикиләр мәтбуат орунлиридин ярдәм сорап, мәмликәт ичи вә сиртидики мәтбуат орунлириниң һәқиқий әһвални ашкарилап, буниңдин ху җинтав вә вин җябав қатарлиқларниму хәвәрдар қилишни үмид қилмақта. Өлгүчи дуән хүйминниң иниси дуән рофий өзиниң хитай җәмийитигә болған қаттиқ нәпритини билдүрүп "бундақ җәмийәтни қандақму инақ җәмийәт дегили болсун. Бу бир, адәм алдайдиған, дуня хәлқини алдайдиған адаләтсиз җәмийәт! " дәп көрсәтти. (Меһрибан)