Shangxeylik dewager béyjingda saqchilar teripidin urup öltürüldi

• Muxbirimiz méhribanning bu heqtiki melumati
• Download story audio

Bundin ilgiri biz shangxeylik aka ‏- singil du'en xüymin we du'en chünfangning béyjinggha bérip yuqirilap erz qilmaqchi bolghinida, saqchilarning ularning aldini tosup, du'en xüyminni qattiq urup zexmilendürgenliki hemde uni qolgha élip, qamap qoyghanliqi heqqide xewer bergen iduq.

Yéngi yilliq "sowgha"

Mezkur weqe yüz bergendin kéyin, du'en xüyminning singlisi du'en chünfang we uning 80 yashtin ashqan ata -anisi birlikte béyjinggha kélip du'en xüyminni qoyup bérishni telep qilghan. Bu yil 12 ‏- ayning axiriliri biz béyjingda dawa qilip yürgen du'en chünfangni ziyaret qilghinimizda, u akisi du'en xüymin saqchilar teripidin urup zexmilendürülgendin kéyin, qamaqta yétish jeryanida uninggha héchqandaq dawalinish pursiti bérilmigenlikini melum qilghan.

Du'en chünfangning bildürüshiche, eyni chaghda akisi du'en xüymin uni qoghdash üchün saqchilar teripidin urulghan we intayin éghir yarilan'ghan hemde ta ikki aygha qeder éghiz, burun we qulaqliridin qan toxtimighan. Gerche u köp qétim dawalinishni telep qilghan bolsimu, saqchilar uning ölüp -tirilishi bilen qilche kari bolmighan. Ular uni ölüshtin ikki kün burun yeni 31 ‏- dékabir küni singlisi du'en chünfangning öyige ekilip tashlighan. Saqchilar hetta du'en xüymin ölüshtin ikki kün ilgiri, uning qoligha uni bir yilliq qamaq jazasigha höküm qilghan qeghezni tapshurup bergen. Pütün bedini qan'gha boyalghan du'en xüymin yéngi yil küni doxturxanigha apirilghandin kéyin, etisila jan özgen.

Seyshenbe küni doxturxanigha bérip du'en xüyminni yoqlighan dawager ju dungxüy radi'omizning ziyaritini qobul qilip, özining du xüyminni körgen chaghdiki uning échinishliq halitini sözlep berdi.

Dawager ju dungxüy sözide "u körünüsh bekmu échinishliq, uning qosiqi köpüp ketken, köz, qulaq, éghiz -burun hemme yéridin qan éqip turghan. Men bekmu chöchüp kettim. Doxturlarning déyishiche, eger eyni chaghda del waqtida doxturxanigha ekelgen bolsa, uni qutquzup qalghili bolattiken. Chünki uning ménge we ich - baghri hemmisige qan uyughan bolup, waqitning uzirishi bilen uyughan qan pütün bedenni kardin chiqarghan" dep bildürdi.

Du'en xüyminning inisining éytqanliri

Du'en xüyminning inisi du'en rofiy charshenbe küni radi'omizning ziyaritini qobul qilip, akisining ölüsh aldida qilghan wesiyitini sözlep kélip, saqchilarning akisigha intayin rehimsizlik qilghanliqini melum qildi.

Du'en rofiy sözide "saqchilar 4 ‏- noyabir küni akamni urup yarilandurghandin kéyin, akam shangxey xu'ang pu jama'et xewpsizlik idarisige köp qétim iltimas qilip, dawalinishni telep qilghan iken. Lékin uning telipi pütünley ret qilin'ghan. Saqchilar hetta uning yétip uxlishighimu ruxset qilmay, uni olturghan péti oxlashqa mejburlaptu. Bu xil qiynashqa berdashliq bérelmigen akam künséri ajizlap axiri hoshidin ketken. Bu xil ehwalni körgen saqchilar 28 ‏- dékabir küni uni türme doxturigha körsetkende, türme doxturi saqchilargha akamni derhal qoyup bérish kéreklikini hemde uning peqet 3 - ‏4 künla waqti qalghanliqini bildürgen iken. Shuning bilen saqchilar 31 ‏- dékabir küni öler halette qalghan akamni singlimning öyige ekilip tashlaptu" dep bildürdi. Du'en xüyminning inisi du'en rofiy radi'omizning ziyaritini qobul qiliwatqan shu peytte, uning 80 yashtin ashqan anisi we singlisining yégha awazi anglinip turatti:

Biz shangxey xu'ang pu jama'et xewpsizlik idarisige téléfon qilip, mezkur weqeni sürüshtürmekchi bolduq. Lékin qarshi terep özlirining bu ish bilen héchqandaq munasiwiti yoq ikenlikini bildürdi. Du'en xüyminning a'ilisidikiler metbu'at orunliridin yardem sorap, memliket ichi we sirtidiki metbu'at orunlirining heqiqiy ehwalni ashkarilap, buningdin xu jintaw we win jyabaw qatarliqlarnimu xewerdar qilishni ümid qilmaqta. Ölgüchi du'en xüyminning inisi du'en rofiy özining xitay jem'iyitige bolghan qattiq nepritini bildürüp "bundaq jem'iyetni qandaqmu inaq jem'iyet dégili bolsun. Bu bir, adem aldaydighan, dunya xelqini aldaydighan adaletsiz jem'iyet! " dep körsetti. (Méhriban)