Dilmurat perhat :"men dilshat perhat we barliq Uyghur tor bet bashqurghuchiliri üchün adalet telep qilimen!"

Charshenbe küni " diyarim tor béti"ning chet'eldiki tor bashqurghuchiliridin biri bolghan, diyarim tor béti sahibi dilshat perhatning akisi dilmurat perhat inisi dilshat perhat, nijat azad, nur'eli obulqasim qatarliq Uyghur tor bet bashqurghuchilirining ürümchidiki melum sot teripidin mexpiy sotlan'ghanliqini radi'omiz arqiliq dunyagha anglatqan idi.
Muxbirimiz mihriban
2010.07.30
dilshat-perhat-305 Sürette dilshat perhat ependi (arqidiki ret, otturida) 2008 - yili échilghan, bu qétim sotlanghan nureli obulqasim we bashqa yashlar we hökümet xadimliri qatnashqan bir qétimliq yighinda.
Diyarim

Bügün u yene, muxbirimizning ziyaritini qobul qilip, hazirghiche Uyghur tor bet bashqurghuchiliri üstidin échilghan bu sotning peqet bir bashlinish ikenlikini, yene qalghan 100 din artuq Uyghur tor bet bashqurghuchilirining sotlinish alda turghanliqi, yaki mexpiy halda sotliniwatqan bolushi mumkinlikini ilgiri sürdi.

Dilmurat perhat, xitay da'iriliri élip barghan mexpiy sotning bir tereplime, adaletsiz sot ikenlikini ilgiri sürdi. U sözide bu qétim xitay qanun da'irilirining inisi dilshat perhat qatarliq Uyghur tor bet sahiblirigha " döletni parchilash", " qutratquluq qilish" qatarliq jinayetlerni artishining pütünley asassiz ikenlikini, buning hetta xitayning öz qanunida belgilen'gen puqralarning heq - hoquqliri qanunighimu xilap ikenlikini, da'iriler özlirining bu xil eyiblishining asassiz ikenlikini éniq bilgini üchün, bu sotni qanun resmiyetliri toluq bolmighan halda, xelqtin yoshurun halette, pütünley mexpiy élip barghanliqini tekitlidi.

Dilmurat perhat xitayning öziningmu qanunigha xilap halette élip bérilghan bu sotning hökümige, inisi dilshat perhat qatarliq yashlarning hem özining qayil bolmighanliqini, shunga özlirining naraziliq erzi sunidighanliqini bildürdi.

Dilmurat perhat yene, inisi qolgha élin'ghandin buyan, xitay qanun da'irilirining inisining ehwali toghriliq, a'ilisidikilerge üzlüksiz bésim ishlitip, özini en'giliyidin chet'el metbu'atlirigha uchur bermeslikke agahlandurghanliqini bildürdi. Dilmurat perhat yene, sot échilishning aldi - keynide, özining chet'elde turupmu xitay bixeterlik xadimliri we ularning ademliri teripidin, türlük tehditlerge uchrawatqanliqini, emma, özining Uyghur tor bet bashqurghuchiliri üchün adalet telep qilish iradisidin yanmaydighanliqini ipadilidi.

Yuqiridiki ulinishtin bu progirammining tepsilatini anglighaysiler.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.