Amérika parlamént ezaliri xitay hökümitining diniy erkinlikke kengchilik qilishni teshebbüs qildi


2006.06.21
sam_brownback-200.jpg

Amérika dölet mejlisi ezasi, jumhuriyetchiler partiyisining re'isi Rick Santorum seyshenbe küni, dölet mejliside ötküzülgen diniy erkinlik toghrisidiki muhakime yighinida söz qilip": amérika dölet mejlisining 20 ‏- iyun künini diniy erkinlik küni qilip békitishidiki meqsiti, her qaysi sahelerning diqqitini, amérika hemde xelq'ara diniy erkinlik mesilisige merkezleshtürüshtin ibaret" dédi.

Mezkür yighin'gha qatnashqan mütexessisler , amérikining dölet ichidiki diniy erkinlik mesilisi bilen islam dunyasidiki köp tereplimilik étiqad mesilliri üstide muzakire élip bardi . Rick Santorum Yene, bir qisim mütexessislerni xitay ,shimaliy koriye, iran, hindistan, misir, wétnam, rusiye we se'udi erebistan qatarliq döletlerning dunya boyiche, diniy erkinlikke xilap heriketlerni élip bériwatqanliqi toghrisida chüshendürüsh bérishke teklip qildi.

Xitayda diniy erkinlikke qaratqan kontrolluq kündin - kün'ge éghirlashmaqta

Xitaydiki diniy mesiller heqqide toxtalghan "eysa eleyhssalam béyjingda" namliq kitabning meshhur yazghuchisi Aikman ependi": xitayda xirstyan dinigha étiqad qilghuchilar sani téz sür'ette köpeymekte, biraq, hökümetning ikki yildin buyan diniy erkinlikke qaratqan kontrolluqimu kündin - kün'ge éghirlashmaqta, xitay hökümiti üzlüksiz halda qolgha élish, hökümsiz solash we qiynash qatarliq usullar bilen falonggong muritlirini basturush herikiti élip bériwatidu ,xitayda ötken ikki yilda xristiyan diniy ölimalirini köplep qolgha élish, xristyan muritlirini solap qoyush heriketliri yüz bergen " dédi.

Aikman Ependining bildürüshiche, birleshken döletler teshkilatining doklatigha asaslan'ghanda, xitayning qanun ijra qilghuchi xadimlirining solap qoyush merkezliride kishilerni qiynash ehwali adetke aylan'ghan bolup, eslide xitay qanunida qiynash usuli men'iy qilin'ghan .

Diniy kitablarni neshr qilish mesilisi heqqide toxtalghan Aikman ning éytishiche, hazirgha qeder, puqralarning kitabxanidin " injil " sétiwilishi esla mumkin emes iken. Kishiler "injil " sétiwilish üchün choqum hökümet ruxset qilghan katolog yaki xristyan chérkawlirigha baridiken.

U yene , amérika prizédinti jorj bush ötken yili 11 ‏- ayda béyjingni ziyaret qilishtin burun, bir yer asti xristyan diniy teshkilatining rehbiri hökümet teripidin qolgha élinip solap qoyulghanliqini, buning sewebining bolsa , öz aldigha " injil " bésip , bashqilargha tarqatqan dégen jinayet we karxanichiliq qanunigha xilapliq qilghan dégen hökümler ikenlikini ashkarilidi.

Sam Brownback: Xitay hökümitining öz qanunlirini hörmet qilishini teshebbüs qilimen

Xitay hökümitining diniy erkinlikke tutqan pozitsiyisi toghrisida, muxbirlarning ziyaritini qobul qilghan amérika kéngesh palatasi kishilik hoquq ishliri re'isi Sam Brownback , xitay hökümitidin , diniy erkinlik étiqadining küchiyip kétishidin endishe qilmasliqini teshebbüs qildi.

U mundaq deydu": men, xitay hökümitining öz qanunlirini hörmet qilishini teshebbüs qilimen, xitay da'iriliri her bir insanning diniy erkinliktin behrimen bolushigha yol qoyush kérek, xitay hökümiti diniy étiqadtin wehime hés qilmasliqi kérek, diniy étiqad insanlarning aktipchanliq küchi we heqiqetning küchi bolup, insaniyet turmushigha yaxshiliqlar élip kélidu. Men chüshenmey qaldim, xitay hökümiti néme üchün diniy erkinlik étiqadidin qorqidu. Zamaniwiylashqan bir jem'iyetning üsüp yétilishi bilen teng xelqqe téximu köp erkinlikler bérilishi kérek. Xitay hökümiti del mushu xil yolni tallishi kérek, bolupmu eng aldi bilen xelqqe étiqad erkinliki bérishi kérek"

Amérika kéngesh palatasi, xitay ishlirigha mes'ul gurupining re'isi, jumhuriyet partiyisining ezasi Norm Coleman muxbirlarning ziyaritini qobul qilip": amérika da'iriliri xitaydiki diniy erkinlik mesilsini dawamliq türde közitidu" dédi.

U sözide mundaq deydu": diniy erkinlik, yalghuz amérika üchünla muhim bir mesile bolup qalmastin, pütün dunya üchünmu intayin muhim, biz choqum oylighanlirimizni ochuq ipadilesh bilen birge, bu ipadilirimizge bashqilarning ehmiyet bérishini ümid qilimiz, men xitay dölet re'isi xu jintaw , washin'gtonni ziyaret qilghan waqitta ular bilen uchriship, söhbetleshken idim. Amérika bir tereptin xitay bilen hemkarlishish pursitige ehmiyet berse , yene bir tereptin , diqqitini xitaydiki xelq hoquqi erkinliki bilen étiqad erkinliki mesililirige merkezleshtürdi. Amérika rehbelirining bu mesilige qarita öz qarashlirini otturigha qoyushi intayin muhim. Biz shuni éniq éytimizki, iqtisadni tereqqi qildurush intayin muhim, biraq buning bilen biz kishilik erkinlik mesilisige hergiz sel qarimaymiz " . (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.