Шаяр наһийиси қайлу йезисидики җамаәтниң йеңи мәсчиткә игә болуш арзуси көпүккә айланди


2006-08-29
Share

Гәрчә җоңгу һөкүмити өз пуқралириға қарита кәң диний сиясәт йолға қойиватқанлиқини тәшвиқ қиливатқан болсиму, бирақ хәлқ өзлириниң диний бесимға дуч келиватқанлиқини билдүрүп, һөкүмәткә қарши өз наразлиқини ипадилимәктә.

Болупму, чәтәлләрдә кишилик һоқуқ, демократийә вә диний әркинлик үчүн паалийәт елип бериватқан уйғур тәшкилатлири, уйғур хәлқиниң диний кәмситишкә әң көп учраватқанлиқини, җоңгу даирилириниң уйғурларни ялғуз диний әркинликтә әмәс, бәлки башқа нурғун тәрәпләрдә қаттиқ қол сиясәт йүргүзүп, милләтни йоқ қилиш һәрикити елип бериватқанлиқини тәкитлиди.

Һәқиқәтән уйғурларниң диний әркинлики дәпсәндә қилиниватамду? бизниң бу суалимизға җавап бәргән кишиләрниң билдүришичә, һазир уйғур елида хизмәтчи кадирларниң намаз оқуши чәкләнгәнликини, али, оттура вә башланғуч мәктәпләрни өз ичигә алған барлиқ мәктәп оқуғучилириниң намаз оқуши, мәсчиткә кириши вә роза тутиши мәни қилинған.

Шаяр наһийси қайлу йеза аһалисиниң мәсчит қуруш арзуси, йеза башлиқи тәрипидин бикар қилинди

Йеқинда мундақ бир вәқә йүз бәргән болуп, шаяр наһийиси қайлу йезиси аһалиси, нәччә йилдин бери йеңи бир мәсчит селиш үчүн, нурғун мәбләх топлап мәсчит қурулишини башлиған. Мәсчит пүтүшкә аз қалғанда, йеза башлиқи мәмәт турап, мәсчит қурулишини тохтитиш һәққидә буйруқ чүшүргән.

Мәзкур вәқәдин хәвири бар бирақ өзини ашкарилашни халимиған бир кишиниң ейтишичә, мәмәт турап, һөкүмәтниң рухситигә еришкәндин кейин башланған мәзкур мәсчит қурулишини тохтитиштин сирт йәнә, 40 ‏- 50 йилдин буян қайлу йезисиниң имами болуп кәлгән 75 яшлиқ имин қари һаҗимни қаттиқ һақарәтлигән вә бир қанчә йилдин бери еғир кесәл тартқан йеза имамини қол көтүрүп урған.

Буниңдин хәвәр тапқан җамаәт, 7 ‏- айниң 7 ‏- күни җүмә намизидин тарқилип, 15 кишилик вәкилләр гурупписи тәшкилләп қайлу йезилиқ һөкүмәттин мәсчит қурулушиниң нимә үчүн тохтитилғанлиқи, йеза башлиқиниң яшанған кишини уруп һақарәтлигәнликиниң сәвәбини сүрүштә қилиду.

Йезилиқ һөкүмәт, йеза башлиқиниң йолсизлиқи вә һөкүмәтниң рухситигә еришкән қурулушниң тохтитилишиниң сәвәплирини сүрүштә қилиш уяқта турсун, бәлки вәқәни бастуруш позитсийиси билдүрүп, муса вә әхмәт исимлик икки кишини солап қойиду.

Имин қари һаҗим қаттиқ һақарәт вә таяқ дәстидин кесили қайта қозғулуп, дохтурханида йетип қалиду.

Қайлу аһалиси, йеза башлиқиниң қаттиқ бесими астида садир болған вәқәни сөзләп бериштин баш тартти

Биз бу вәқә һәққидә техиму ениқ мәлумат елиш үчүн, илгири шаяр наһийилик сақчи идарисиниң башлиқи һазир тәптиш идарисиниң башлиқи болуп хизмәт қиливатқан имин муһәммәтниң өйигә телефун урдуқ. Бир қанчә қетим телефун урған болсақму, униң аяли униң өйгә қайтип кәлмигәнликини ейтти.

Биз йәнә қайлу йезиси су понкитиниң башлиқиға телефун уруп, мәзкур вәқәни сүрүштә қилдуқ. У бу иштин хәвири йоқлиқини ейтти.

Биз, қайлу йезисида оқутқучилиқ қилидиған бир ханимдинму бу вәқәни сүрүштә қилдуқ. У ханимму бу иштин хәвири йоқлиқини ейтти.

Бизгә бу һәқтә мәлумат бәргән киши, қайлу йезисида йүз бәргән мәсчит қурулишидин келип чиққан вәқәдин пүтүн кишиниң хәвири барлиқини, әмма йеза башлиқи мәмәт турақтин чөчигән йеза аһалисиниң сүкүттә туриватқанлиқини билдүрди.

Өзини ашкарилашни халимиған кишиниң билдүришичә, мәмәт турапниң, қайлу йеза аһалисиниң өз иқтисадини теҗәп туруп йиққан 100 миң йүәндин артуқ пулини зиянға учратқан. Униң аяли шаяр наһийилик дохтурханиниң нурғун пулиға хиянәт қилған, гәрчә бир қанчә ай түрмидә ятқан болсиму, кейин ериниң йоли билән қутулуп чиққан, нөвәттә бу бир аилә кишилири хәлиқниң қаттиқ нәпритигә учримақта. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт