Saqchilar erzdar hékim siyit bilen erzidin waz kéchish heqqide sodilashmaqta
Muxbirimiz shöhret hoshur
2009.02.05
2009.02.05
Oqurmenlirimiz ewetken 'yéngisarda déhqan bolmaq tes' namliq sin - alghudin élindi.
Yeni hékim siyitning erzide jawabkar ikki: biri nahiyilik partkom sékrétari yi shyawlyang, yene biri yéngisar nahiyilik saqchi idarisi. Hékim siyit mana bu ikki mesile üstide erz sunuwatqinigha 2 yil bolup qalghan bolsimu, nahiyilik hökümettin héchkim uning erzige qulaq salmay kelgen.
Peqet ikki heptidin béri, yeni uning " yéngisarda déhqan bolmaq tes" namliq shikayet filimi intérnét arqiliq dunyagha ashkarilan'ghandin buyan , saqchilar uni chaqirip deslep terbiye bérishken, kéyin erzidin waz kéchish heqqide sodilishishqa bashlighan. Saqchi terep hékim siyitqa bir qoro jayliq yer körsitip bergen hem anisi olturuwatqan qoroni rémont qilip béridighanliqini bildürgen.
Hékim siyit mesilining bu xil hel bolushigha razi emes, u jayliq yerdin quruq qalsimu, anisining öyi rémontsiz qalsimu razi emma, déhqanlarning 50 milyon yüenlik ziyini soraqsiz qalmasliqi kérek.
Shunga hékim siyit saqchilar üstidiki erzidin, yeni özining 15 kön naheq qamap qoyulghanliqi heqqidiki erzidin waz kécheleydighanliqini, emma déhqanlar tartqan ziyan üstidiki erzidin waz kéchelmeydighanliqini bildürgen.
Hékim siyit ikki yildin béri barliq mal - mülkini mezkur erz ishliri üchün serp qilghan. U qolida qalghan axirqi bisatinimu yene bu ish üchün serp qilmaqchi.
Yuqirida biz silerge yéngisar saqchilirining déhqan erzdar hékim siyitni erzidin waz kechtürüsh üchün uning bilen sodilishiwatqanliqi heqqide tepsiliy xewer berduq.