Хейлоңҗяң өлкисидики деһқанларниң йәр қайтурувелиш һәрикити иккинчи қетимлиқ йәр ислаһати дәп қаралмақта


2007-12-11
Share

Хейлоңҗяң өлкисиниң фуҗин шәһиридики 72 кәнттә 40 миң деһқан 12 ‏- айниң 8 ‏- күни, өзиниң йәр-земинға болған игидарчилиқ һоқуқи тоғрисида пүтүн мәмликәткә 6 маддилиқ баянат елан қилди. Бу баянатта 1994 ‏- йилидин буян 'дөләтниң еһтияҗи' дегән нам билән төвән баһада игиливелинған бир милйон 500 миң мо йәр кәнттики барлиқ деһқанларға қайтидин тәқсимләп берилиду, йәрниң игилик һоқуқи деһқанларниң өзигә мәнсуп, йәр-земин деһқанларниң һаятлиқиниң йилтизи, деһқанлар земинға игидарчилиқ қилалиғанда андин өзиниң һаятлиқини сақлап қалалайду, дөләтму тинч болиду, дәп җакарланған. Бу баянатта йәнә, коммунист әмәлдарлири билә тил бириктүрүвалған кәнт башлиқлири кәнт пуқралири чоң йиғинида авазға қоюш арқилиқ вәзипидин қалдуруш шәклини давамлиқ йолға қоюш; пүтүн мәмликәттә 'дөләт', 'коллектип' дегән намлар билән өзлири 'йәр игиси' болувалған коммунист әмәлдарлириниң қолидин йәрләрни қайтурувелип, деһқанларға бирдәк тәқсим қилип бериш тәшәббус қилинған (көзитиш журнилиниң 12 ‏- айниң 10 күнидики саниға қараң).

Хейлоңҗяң өлкисиниң фуҗин шәһиридики 72 кәнттә 'иккинҗи қетимлиқ йәр ислаһати' башлиған 40 миң деһқанниң вәкили йү чаңву әркин асия радиосиниң зияритини қубул қилғанда "әслидики йәр хәтлири қолимизда бар, бу земин бизниң" дәп сөзни башлиди. Униң баян қилишичә, йәр ишлитиш җәһәттә дөләтниң бәлгилимиси бар, йәрни бериш яки бәрмәсликни кәнттики %60 дин артуқ деһқан бәлгилиши керәк иди. Әмма бу җайдики бир милйон 500 миң мо йәрни һечкимдин соримай, бәрсәңму берисән, бәрмисәңму алимиз дәп еливалди. Биз өлкигиму бардуқ, мәзкәзгиму бардуқ, һечкимниң кари болмиди, ахир биз мәркәзниң һөҗҗитигә, баш министир вен җябавниң сөзигә асасән, алди билән кәнт әмәлдарлирини мәнсәптин қалдуривәттуқ. Һазир қайтидин йәр тәқсим қилиш башланди.

Хейлоңҗяң деһқанлири яратқан улуғ үлгә

Хейлоңҗяң өлкисиниң фуҗин шәһиридики 72 кәнттә йүз бәргән деһқанларниң өзлириниң игилик һоқуқини қоғдаш һәрикити 'демократийә мунбири' дегән тор гезитидә 12 ‏- айниң 6 ‏- күни елан қилинған обзорда 'улуғ деһқанлар һәрикити' дәп аталди. Бу обзорда баян қилинишичә, парихор коммунистлар деһқанларниң әвладму-әвлад игидарчилиқ қилип келиватқан йәрлирини тартивелип өзлириниң мүлкигә айландурувалғанлиқтин, деһқанлар қериғанда өзини беқиш, давалиниш, маарип қатарлиқ мәнпәәтлиридин тамамән мәһрум қалди.

Хейлоңҗяң өлкисидики 800 деһқан 12 ‏- айниң 3 ‏- күнидин башлап, кәнт йиғини ечип кәнт әмәлдарлирини мәнсәптин қалдуруп, қолдин кәткән йәрләрни қайтурувелип, уни деһқанларниң өзигә тәқсим қилип беришкә башлиди. Улар деһқанлар йиғинида "йәр бизниң, қолдин кәткән йәрләрни қайтурувелип, униңға өзимизниң игидарчилиқ қилимиз' дәп хитай қилди. Бу хейлоңҗяңдики деһқанлар яратқан бир улуғ үлгә.

Коммунист әмәлдарлириниң йиллиқ кирими һәққидики санлиқ мәлуматлар

Дөләт кабинити тәтқиқат ишханиси 2006 ‏- йили 7 ‏- айда елан қилған санлиқ мәлуматларға қариғанда,‏-‏ дәп баян қилиниду бу обзорда, ‏-‏җеҗяң, җяңсу, шаңхәй, сәндуң, гуаңдуңдин ибарәт бәш өлкидә назарәт башлиқи дәриҗилик коммунист әмәлдарлириниң йиллиқ кирими, уларниң параванлиқ, мукапат дегәндәк башқа қошумчә тапавәтлирини қошқанда 550 миң юәндин 1 милйон 50 миң юәнгичә. Өлкә башлиқи дәриҗилик әмәлдарларниң йиллиқ кирими бир милйон 250 миң юәндин икки милйон 500 миң юәнгичә.

Улар адәттә һәшәмәтлик туралғулириниң ток, газ сәрпияти үчүнла 250 миң юәндин артуқ пул сәрп қиливатиду. Уруқ-туғқанлирини болса алий миһманханиларда дөләт пули билән меһман қилиду. Бундақ адаләтсизлик алдида җенидин җақ тойған деһқанлар 'йәрлиримизни қайтуруп алимиз", "бизгә олимпик мусабиқиси өткүзүш әмәс, йәр керәк" дегән шуарни оттуриға қойди. Бу мәшәл әмди пүтүн мәмликәттә йениши мумкин.

Хейлоңҗяң өлкисидики деһқанларниң бу баянатини хәлқарадики хитайчә учур вастилири һазир хитайда башланған ' иккинчи қетимлиқ йәр ислаһати' дәп атимақта. Бурун коммунист партийә юқиридин төвәнгә қарита 'йәр ислаһати' елип берип, йәр-земинни хәлқтин тартивалған болса, бу қетим төвәндин юқириға қарита йәр ислаһати елип берип, хәлқ өзиниң йәр земиниға болған игидарчилиқ һоқуқини коммунист партийидин қайтурувелишни ишқа ашуридикән.

Тинч йол елип берилған һәрикәт пүтүн мәмликәттә қоллашқа еришиду

'Чоң пайдилиниш хәвәрлири'ниң баш муһәррири, сиясий обзорчи ву фән әпәндиниң баян қилишичә, коммунист партийә тәрипидин талан-тараҗ қилиниватқан деһқанлар бирлишип кәнт әмәлдарлирини мәнсәптин қалдуруветип, өзиниң йәргә болған һоқуқини әслигә кәлтүрүши бир яхши чарә. Коммунист сақчилири зораванлиқ қилса уни синалғуға елип деһқанларға териқчилиқ қилидиған йәр мәсилисидә вәдә бәргән вен җабавға көрситиш керәк, дуняға елан қилиш керәк. Мушундақ тинч йол билән елип берилған һәрикәт пүтүн мәмликәтниң қоллишиға еришиду. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт