Shenshi ölkiside 70 ming déhqan yerge özi menggu igidarchiliq qilidighanliqini jakarlidi

• Muxbirimiz welining bu heqtiki toluq melumati
• Download story audio

12 ‏- Ayning 8 ‏- küni xéylongjyang ölkisining fujin shehiridiki 72 kentte 40 ming déhqan awaz qoyup kent emeldarlirini wezipidin qaldurup, 'döletning' yaki 'kolléktipning' dégen nam bilen tartiwélin'ghan yerlerni qayturuwalghanliqini, uni hazir déhqanlarning özige qaytidin teqsim qilishqa bashlighanliqini jakarlighan idi. Buningdin 4 kün ötkende, 12 ‏- ayning 12 ‏- küni shenshi ölkisining dali, xu'ayin, tonggu'en nahiyiliridiki 76 kentte 70 ming déhqan intérnétte bayanat élan qilip, kommunistlar teripidin tartiwélin'ghan yerlirini qayturuwélip, uninggha özliri menggu igidarchiliq qilidighanliqini jakarlidi. Bu yetmish ming déhqan 'déhqanlar özining yerlirini qayturuwélip, buningdin kéyin uninggha özi menggu igidarchiliq qilidu we özining hayatliq yiltizi bolghan yer-zémin'ge tayinip, ma'arip, dawalinish sistémisi qatarliqlarni özliri qurup chiqidu" dep jakarlidi.

Xu'ayin nahiyisidiki déhqan wekili jang senmin "biz choqum yerlerni her bir déhqan a'ilisigiche teqsim qilip bérimiz " dédi

Shenshi ölkisidiki 76 kenttiki 70 ming déhqanning wekili déyilgen kishiler intérnétte élan qilghan téléfon nomurlargha asasen alaqe qilghinimizda, xu'ayin nahiyisidiki déhqan wekili jang senminning téléfoni ulandi. Gerche téléfon'gha kashila qiliwatqan gheyri awazlar küchlük bolsimu, yenila so'al -jawablarni oz-ara chüshinishke mumkin boldi. Bu kishi erkin asiya radi'osining ziyaritini qarshi aldi. U so'allirimizgha jawab bérip "téléfonda signal nachar... Bayanatimiz élan qilin'ghandin kéyin, uni gézitxanilarghimu ewettuq... Téléfonlar keldi... Hazir hökümet téxi inkas qayturmidi.... Men sizge dep qoyay... Biz choqum yerlerni her bir déhqan a'ilisigiche teqsim qilip bérimiz... Déhqan dégen yer tériydu... Yerde hökümetning hoquqi yoq... Déhqanning yérini bashqilargha bériwétish muwapiq emes... Hazir déhqanning tériydighan yéri yoq... Emdi déhqanlar hoquqni qayturuwalimiz.... Bu mesilide hemme déhqanning gépi bir... Bayanatqa hemme a'ile özi imza qoyghan... Xeyr xosh" ! dédi.

Shenshi ölkisining köchmenler ishigha mes'ul bir xadimi yerlik emeldarlarni pash qildi

Shenshi ölkisining senménsha su ambiri rayonidin köchürülgen köchmenler mesilisige mes'ul emeldarlardin li wenminning radi'omiz muxbirigha éytip bérishiche, junggo hökümiti 1986 ‏- yili su ambiri rayonidin köchürülgen déhqanlar üchün 300 ming mo yer buyrup bergen bolsimu, emma yerlik da'iriler uning yérimini déhqanlargha bermey, özliri ijarige bérip, söyünche élip tapawet qilishqa bashlighan. Déhqanlargha bérilgen yerlernimu, herxil nam bilen besh qétim 'kötüre' ge bérish jeryanida yene, déhqanlardin herbir mo yer üchün 400 yu'endin 600 yüen'giche pul yighiwalghan.

Yetmish ming déhqanning bayanatida otturigha qoyulghan mesile

Shenshi ölkisining dali, xu'ayin, tonggu'en nahiyiliridiki 70 ming déhqanning bayanatida, ötken esirning 50 ‏- yillirida bina qilin'ghan senménsha su ambiri üchün, hökümet déhqanlarning 800 ming mo yérini ötküzüwalghanliqi؛ yersiz qalghan déhqanlar uda 30 yil dewa qilghandin kéyin, hökümet 80 ‏- yillarda ulargha 300 ming mo yer buyrup bergen bolsimu, emma uningdin 150 ming mo yerni yerlik emeldarlar shexsi igiliwélip, her yili 40 milyon yu'endin 60 milyon yüen'giche tapawet qilip kéliwatqanliqi؛ buningdin kéyin bu yerni déhqanlar qayturuwélip, özliri menggu igidarchiliq qilidighanliqi؛ su ambiri rayonidin köchürülgen déhqanlar üchün, nechche on yillardin buyan hökümet chüshürüp bergen milyard xaniliq sandiki pulning hésabini xiyanetchilerdin alidighanliqi bayan qilindi.

Xéylungjyangda 40 ming déhqan bir niyetke kelgen jayda hökümet adem tutushqa jür'et qilalmighan

'Küzütüsh jurnili'da 12 ‏- ayning 13 ‏- küni élan qilin'ghan ikkinji qétimliq yer islahati dewri yétip keldi' dégen obzorda bayan qilishiche, xéylongjyang ölkisining fujin shehiridiki 72 kentte 40 ming déhqan yerge bolghan igidarchiliq hoquqini qayturup alghanliqini, uninggha özi menggu igidarchiliq qilidighanliqini jakarlighandin kéyin, déhqan wekili yü changwuni sheherge bir nerse alghili kirgende tutuwélin'ghan. Uning kentler bilen we a'ilisi bilen bolghan alaqisi üzüp tashlan'ghan. Uning xotuni radi'omizning muxbirigha éytip bérishiche, xitay hökümiti bir niyet - bir meqsetke kélip özining kishilik hoquqini qoghdawatqan 72 kenttiki 40 ming déhqan bar jaylargha téxi saqchi ewetmigen yaki déhqanlarning wekillirini 40 ming déhqan bar jayda tutushqa jür'et qilalmighan. Bu kentlerdiki hemme adem hazir jénini alqinigha élip qoyghan.

20 Yilliq ishikni échiwétish, islahat élip bérish jeryanida déhqanlar 3 tirilyon 900 milyard yü'enlik mülüktin mehrum qaldi

Xitay hökümiti 1979 ‏- yilidin 2003 ‏- yilighiche bolghan 20 yilliq ishikni échiwétish, islahat élip bérish jeryanida sana'etleshtürüsh dégen nam bilen igiliwélin'ghan térilghu yer sani texminen yüz milyon mo. Yéqinqi 4 yil ichidila sodigerler igiliwalghan yer sani 30 milyon mo. Herbir mo yerni 30 ming yu'endin hésablighanda déhqanlar mushu 20 yil ichide 3 tirilyon 900 milyard yüenlik mülüktin mehrum qaldi. Bu déhqanlar namratlashqanliqining bir muhim amili. (Weli)