Xitay we Uyghur élide kélishim bahaliq doxturxanilar yolgha qoyulmaqta


2006.01.30
Share on WhatsApp
Share on WhatsApp

Yéqinda xitayda échilghan 2006 ‏- yilliq memliketlik sehiye xizmiti yighinida, xitay sehiye ministirliqining bashliqi gaw chyang " xitaydiki hökümetke qaraydighan herqaysi doxturxanilar choqum bimarlarning menpe'etini birinchi orun'gha qoyushi kérek, bolupmu késili éghir bolghan bimarlar üchün, aldi bilen bimarni qutquzup, andin hésabat qilish prinsipida ching turush kérek " dep körsetken. U sözide yene "hazirdin bashlap, memliketning her qaysi jaylirida kélishim bahaliq doxturxana we kélishim bahaliq dorixana sélinishi kérek, shundaq qilghandila kirimi töwen bolghan bimarlarning doxturgha körünüsh we dawalinish mesilisini hel qilghili bolidu " dep bildürgen.

Namratlarni qutquzush doxturxanisi

Munasiwetlik matériyallargha qarighanda, Uyghur élide bu xil kélishim doxturxanidin ikkisi bolup, ikkilisi ürümchi shehirige jaylashqan iken hemde kishiler bundaq doxturxanini "namratlarni qutquzush doxturxanisi" dep ataydiken.

Biz Uyghur élidiki kélishim bahaliq doxturxanilarning yeni namratlarni qutquzush doxturxanilirining ehwalini igilesh üchün, ürümchi sheherlik birinchi kélishim doxturxanisigha téléfon qilduq. Ziyaritimizni qobul qilghan melum bir doxturxana xadimining bildürüshiche, mezkur doxturxana 2004 ‏- yili qurulghan bolup, kirimi töwen bolghan we dawalinish sughurtisigha ige bolghanlar üchün échilghan iken.

Doxturxanilar wezipisini ijra qilmidi

Xitay yashlar gézitide élan qilin'ghan melumatta körsitilishiche, xitay sehiye ministirliqining bayanatchisi yéqinda "eslide hökümet doxturxanilirining özi kélishim doxturxanining rolini oynishi kérek idi. Lékin hazir hökümet doxturxaniliri öz wezipisini heqiqiy ijra qilmidi. Shunga sehiye ministirliqi kélishim doxturxana qurush arqiliq, kirimi töwen bolghan kishilerning doxturgha körünüsh we dawalinish mesilisini hel qilishni meqset qilghan" dep körsetti.

Mezkur bayanatchi sözide yene " kélishim doxturxanilarda dawalinish heqqi töwen bolghini bilen, süpiti yuqiri bolushi kérek hemde dawalash téxnikisi kapaletke ige bolushi kérek. Yerlik hökümet kélishim doxturxanilirini sélishta, aldi bilen köchmenlerning bolupmu sheherlerge kirip medikarliq qiliwatqan déhqanlarning éhtiyajini közde tutushi kérek " dep bildürgen.

Munasiwetlik melumatlarda körsitilishiche, kélishim doxturxanini qurushta, asasen yerlik hökümet meblegh sélishi kérek iken. Lékin qanchilik meblegh sélish heqqide, memliket ichide ta hazirghiche téxi bir ortaq ölchem bolmighan.

Nurghun qiyinchiliqlar mewjut

Ziyaritimizni qobul qilghan aptonom rayonluq birinchi kélishim doxturxanisida ishleydighan bir xizmetchi xadim doxturxana qurulghandin buyan, hökümetning mezkur doxturxanigha dep ajratqan pulining dawamliq kéchikip, waqtida yetküzüp bérilmeydighanliqini hemde bu xil seweb tüpeylidin, doxturxana öz shara'itini yaxshilashta nurghun qiyinchiliqlargha duch kéliwatqanliqini melum qildi.

Köpligen analizchilarning körsitishiche, gerche xitay hökümiti kélishim bahaliq doxturxana sélish pilanini otturigha qoyghan bolsimu, buni izchil halda dawamlashturalishi yenila natayin iken. Chünki hazirqi eng muhim mesile yenila meblegh mesilisi bolup, eger hökümet bu xil doxturxanigha zor derijide meblegh yetküzüp bermise, doxturxana taqilip qélishi mumkin iken. (Méhriban)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.