Әнқәрәдә уйғурлар һәққидә дүгиләк үстәл йиғини

7 - Айниң 25 - күни әнқәрә башкәнт университети истратегийә тәтқиқат мәркизи чақирған "шәрқий түркистан вә уйғур түрклириниң өтмүши вә бүгүни" мавзулуқ дүгиләк үстәл йиғинидин бир көрүнүш.

Бу йиғинға проф. Др. Абдулқадир вароғлу риясәтчилик қилди. У сөзлигән ечилиш нутқида, бу йиғинни ечиштики мәқсәтниң түркийиниң уйғур сияситини бәлгилишигә төһпә қошуштин ибарәт икәнликини, йиғинда дейилгән сөзләрни рәтләп бир доклат тәйярлап мутәхәссисләрниң пайдилинишиға сунилидиғанлиқини ейтти.

Йиғинда проф. Др. Уйғур тазәбай әпәнди, проф. Др. Алимҗан инайәт әпәнди, проф. Др. Султан мәхмут әпәнди, һаҗәттәпә университети оқутқучиси дотсент доктор әркин әкрәм әпәнди, чанқая университети оқутқучиси мәрйәм һаким ханим вә дуня уйғур қурултийи муавин башлиқи сейит түмтүрк әпәндиләр сөз қилди.

Йиғин икки бөлүмдин тәркип тапқан болуп, биринчи бөлүмдә уйғурларниң қисқичә тарихи, уйғур дияриниң бүгүнки вәзийити, үрүмчи вәқәсиниң келип чиқиш сәвәблири вә хитай һөкүмитиниң уйғурларға елип бериватқан сиясити һәққидә музакирә елип берилди. Иккинчи бөлүмдә мутәхәссисләр түркийиниң уйғур сиясити қандақ болуши керәк? түркийидики аммиви тәшкилатлар уйғурлар үчүн немиләрни қилип бериши керәк? дегәнгә охшаш темилар үстидә тохталди.

Бу йиғинға қатнашқан уйғур мутәхәссисләр нуқтилиқ һалда түркийә билән хитай оттурисидики мунасивәттә уйғур мәсилисигә алаһидә орун берилиши керәклики, уйғурларниң һәқ вә һоқуқини қоғдаш үчүн хитайға бесим ишлитиши керәклики һәққидә тохталди.

Проф. Др. Алимҗан инайәт әпәнди түркийиниң хитай сияситини тамамән өзгәртиши керәкликини, түркийә тәкитләп кәлгән хитайниң земин пүтүнлүкигә һөрмәт қилимиз дегән сөзини шәртлик һалда дейиши керәкликини, йәни хитай уйғурларниң һәқ вә һоқуқини қоғдиған тәқдирдә земин пүтүнлүкигә һөрмәт қилимиз дейиши керәкликини оттуриға қойди.

Әнқәрә башкәнт университетиниң түркийидики уйғур мутәхәссисләрни чақирип өткүзгән дүгиләк үстәл йиғиниға түркийә ташқи ишлар министирлики мутәхәссиси, әнқәрәдики һәрқайси университетлардин җәмийәтшунас вә хәлқара мунасивәтләр мутәхәссислири қатнашти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар