Д у қ билән түрк тәшкилатлири рәһбәрлири сөһбәт елип барди


2007-01-08
Share

2007 – Йили 1 – айниң 5 – күни, д у қ рәһбәрлири билән германийидики төт чоң түрк тәшкилати болған "миллий көрүш", "түрк федератсийиси", "өлкә очиғи" вә "явропа түрк – ислам бирлики" тәшкилатлири рәһбәрлири арисида шәрқий түркистан мәсилиси вә д у қ һәққидә илмий сөһбәтләр елип берилди. Д у қ ниң мюнхендики баш шитабида елип берилған бу сөһбәткә түрк тәшкилатлири рәһбәрлири билән биргә, д у қ муавин рәиси әсқәрҗан, иҗраийә комитети муавин рәиси абликим идрис, д у қ баш катипи долқун әйса, ички ишлар комитети мудири абдуҗелил әмәт вә диний ишлар комитетиниң мудири турғунҗан алавудун башчилиқидики қурултай рәһбәрлири һәм әзалири иштирак қилғандин сирт, "сабаһ гезити" вә ATV телевизийә қанили мухпирлириму қатнашти.

Бу қетимқи сөһбәткә дахил болған түрк тәшкилатлири рәһбәрлири, 2 – нөвәтлик д у қ ниң ғәлибилик чақирилғанлиқини қизғин тәбриклиди, д у қ рәиси рабийә қадир ханимға болған чуңқур һөрмитини изһар қилди вә уйғурлар мәсилисиниң бүгүн хәлқаралиқ бир мәсилә дәриҗисигә көтүрүлгәнликини, д у қ ниң хәлқаралиқ бир тәшкилатқа айлинип, уйғурлар мәсилисиниң дуня сиясий сәһнисидә җиддий бир тема һалиға йетишигә түрткә болғанлиқини тәкитләп, д у қ рәһбәрлириниң әҗри вә төһпилиригә апирин ейитти.

Өзлириниң уйғурлар мәсилисигә изчил көңүл бөлүп келиватқанлиқини, һәр қачан, һәр йәрдә уйғурлар вә уйғур тәшкилатлири үчүн чами йәткән дәриҗидә ярдәм қоллирини сунидиғанлиқи, уйғурларниң дәрдини өз дәрди дәп билидиғанлиқини әскәртишти. Болупму, д у қ ниң хитайға қарши сиясий күрәшлири сепидин өзлириниңму бир кишилик орун елип, шәрқий түркистан хәлқиниң истиқлал арманиниң әмәлгә ешишиға һәссә қошуш арзулириниң барлиқини ипадә қилишти вә өз тәшкилатлириниң д у қ билән мүрини мүрүгә тирәп күрәш қилидиғанлиқини әскәртти.

Түрк тәшкилатлири мәсуллири, сөһбәтниң ахирида, д у қ ниң 2 – айниң 3 – күни, 5 – феврал ғулҗа вәқәси" ниң 10 йиллиқини хатириләш мунасивити билән, пүтүн дуняда хитайға қарши омуми йүзлүк наразилиқ һәрикәтлири қозғайдиғанлиқидин хәвәр тапқандин кейин, бу һәрикәткә өз тәшкилатлириниңму иштирак қилишни халайдиғанлиқини, бу һәрикәтни ялғуз мюнхенниң өзидила нәччә миң кишилик бир намайишқа айландуруп, уйғурларниң ялғуз әмәсликини дуняға җакарлашни арзу қилидиғанлиқи билдүрүп өтти. Буниң үчүн, һәр қайси түрк тәшкилатлири өз тармиқидики органлар вә әзалирини һазирдин башлап сәпәрвәрликкә кәлтүрүп, 2 – айниң 3 – күни миюнхен шәһәр мәркизидә елип берилидиған наразилиқ намайишиниң тәсирини йүксәк бир пәллигә көтүрүш үчүн һәссә қошудиғанлиқиға вәдиләр беришти.

Түрк тәшкилатлири билән д у қ арисида елип берилған бу қетимқи сөһбәттә, уйғурлар мәсилисиниң келәчәк тәрәққияти вә уйғурларниң истиқлал ғайисигә йетишиниң чарә – тәдбирлири һәққидә икки тәрәп оттурисида муһакимиләрни қанат яйдуруш һәмдә өз-ара һәмкарлиқни изчил давам қилиш тоғрисида келишимләр ипадә қилинди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт