Д у қ америка дөләтлик ахбарат кулубида баянат елан қилди

Дуня уйғур қурултийи 26 - май күни, америка пайтәхти вашингитонға җайлашқан америка дөләтлик ахбарат кулубида, мухбирларни күтивелиш йиғини ечип, дуня уйғур қурултийиниң 3 - нөвәтлик вәкилләр қурултийиниң мувәппәқийәтлик тамамланғанлиқи мунасивити билән ахбарат елан қилди.
Мухбиримиз гүлчеһрә
2009-05-26
Share
National-Press-Club-Site-305 Америка дөләтлик ахбарат кулуби тор бетиниң баш бетидин бир көрүнүш.
www.press.org Дин елинди.

Мәзкур ахбарат елан қилиш йиғиниға америкидики бир қисим йәрлик һәм хәлқаралиқ ахбарат органлириниң мухбирлири қатнашти.

18 - Майдин башланған дуня уйғур қурултийиниң қурултай һәм муһакимә, сайлам қатарлиқ паалийәтлири 25 - майғичә америка пайтәхти вашингитонда бир һәптә давам қилған иди.

Дуня уйғур қурултийиниң барлиқ паалийәтлири мувәппәқийәтлик тамамланғанлиқи мунасивити билән бүгүн йәни 26 - май, вашингитондики дөләтлик ахбарат кулубида дуня уйғур қурултийиниң ахбарат елан қилиш йиғини болуп өтти.

Мәзкур ахбарат йиғиниға дуня уйғур қурултийи рәиси рабийә қадирға вакалитән, дуня уйғур қурултийиниң баянатчиси алим сейитоф әпәнди қатнишип, америкидики хәлқаралиқ телевизийә, радио һәмдә гезит, журналлардин кәлгән мухбирларға дуня уйғур қурултийиниң баянатини елан қилди вә мухбирларниң уйғурлар һәққидә сориған түрлүк соаллириға җаваб бәрди.

Баянатчи алим сейитоф әпәнди, дуня уйғур қурултийиниң бу қетим вашингитонда, 21 дөләттин кәлгән 112 нәпәр вәкилниң қатнишиши билән давам қилған бир һәптилик паалийәтлириниң мувәппәқийәтлик өткүзгәнликини шәрһилигәндин кейин баянат берип " дуня уйғур қурултийи вә униң тәркипидики барлиқ уйғур тәшкилатлири, қурултай рәиси рабийә қадирниң рәһбәрликидә уйғур дәвасини йәнила демократик принсиплар асасида тинчлиқ йоли билән давамлаштуриду" дәп җакарлиди.

Мәзкур ахбарат елан қилиш йиғиниға йәнә, гүәнтанамо һәрбий түрмисидики 17 нәпәр уйғурниң ичидә 6 нәпириниң адвокатлиқини өз үстигә алған сузан бакирмәниң һәмдә уйғур адвокат нури түркәл вә йәнә "әҗдиһа билән елишқан аял" намлиқ рабийә қадир ханимниң биогирафийисини нәшр қилғучи кеннис калес әпәндиләрму тәклип билән қатнашти.

Гүәнтанамода тутуп турлуватқан уйғурлар мәсилисиниң дуня ахбарат саһәсидә һәмминиң диққитини тартиватқан бир мәсилигә айланғанлиқи мәлум. Дуня уйғур қурултийиниң бүгүнки ахбарат елан қилиш йиғинидиму мухбирлар гүәнтанамодики 17 нәпәр уйғурниң тәқдири мәсилиси һәққидә көпләп соаллар сориди.

Мухбирларниң гүәнтанамодики уйғурлар немишқа һазирға қәдәр қоюп берилмәйду ? улар америкиға қоюп берилсә америкиға тәһдит пәйда қилиш еһтималлиқи барму ‏- йоқ дегәндәк соаллириға җаваб бәргән адвокат сузан бакирмәниң ханим интайин кәскин һалда " гүәнтанамо түрмисидики бу 17 нәпәр уйғур террорчи әмәс, улар һечқачан террорчи болғанму әмәс, худди сотта ақланғандәк, улар хата пәйттә, хата җайда туруп қалғанлиқи үчүнла, пакистандики бир қисим кишиләр тәрипидин америка әскәрлиригә хата учур билән сетип берилгән. Улар һечқачан америкиға хәтәр пәйда қилмайду, уларниң һәммиси биз билгән уйғурларға охшашла интайин тинчлиқпәрвәр кишиләр, улар алтә йил илгирила қоюп берилиши керәк иди, әпсус уларни қобул қилишқа үчинчи бир дөләт чиқмиғачқила һазирға қәдәр гүәнтанамода турушқа мәҗбур болмақта," деди.

Вә йәнә америка һөкүмитиниң уларни һечқачан хитайға қайтурмаслиқ һәққидә қарариниң ениқ икәнликини тәкитлиди.

Зияритимизни қобул қилған алим сейитоф, дуня уйғур қурултийиниң мәзкур ахбарат елан қилиш йиғинини уюштуруштики мәқсити һәққидә тохталди. Дуня уйғур қурултийи муавин рәиси әсқәрҗан әпәндиму мәзкур ахбарат елан қилиш йиғиниға қатнашқан болуп, ахбарат елан қилиш йиғини аяғлашқандин кейин әсқәрҗан әпәндини зиярәт қилдуқ.

Мәзкур ахбарат елан қилиш йиғинида йәнә, 21 - май күни тарқитилишқа башлиған рабийә қадир ханимниң инглиз тилида йезилған биогирафийиси " әҗдиһа билән елишқан аял " намлиқ китабни нәшир қилғучи кеннис калис әпәнди, китабта йезилған рабийә қадир ханим өз бешидин кәчүргән бәзи муһим вәқәләр шундақла рабийә ханимниң бәзи әслимилирини қисқичә сөзләп өтти һәмдә мәзкур китабниң дуня уйғур қурултийиниң 21 - күнидики ечилиш мурасимиға өлгүрүп тарқитилишқа башлиғанлиқини, бу китабниң бир қанчә тилларға тәрҗимә қилиниватқанлиқини тонуштурди.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт