Uyghurlar mesilisi yawropa parlaméntida


2007-02-08
Share

Wekaletsiz milletler teshkilatining 2007 - yili 1- nöwetlik ijra'iye komitéti yighini 2 - ayning 1 - künidin 3 - künigiche bélgiye paytexti bryusséldiki yawropa parlaméntining yighin zalida ötküzüldi. Yighin'gha Uyghurlargha wekaliten dolqun eysa ependi ishtirak qildi.

D u q bash katipi, yawropa sherqiy türkistan birliki teshkilatining re'isi dolqun eysa ependi, öz nöwitide yene UNPO (wekaletsiz milletler teshkilati) ning da'imi hey'et ezasi bolup hésablinidu. 2006 - Yili 11 - ayda, wekaletsiz milletler teshkilatining teywende chaqirilghan omumi qurultiyida, dolqun eysa ependi UNPO ning toqquz neper ijra'iye komitéti ezasining biri bolup saylan'ghan idi.

Uyghur mesilisige köngül bölüp kéliwatqan teshkilat

Dunyadiki 250 milyondin artuq insan'gha wekillik qiliwatqan UNPO bolsa yillardin béri Uyghurlar mesilisini eng aktip qollap kéliwatqan xelq'araliq teshkilatlardin biri bolup hésablinidu. D u q ning bash meslihetchisi we sabiq re'isi erkin aliptékin ependi UNPO ning qurghuchiliridin biri bolup, u bash katip bolup wezipe ötewatqan mezgilide, yawropa parlaménti we döletler parlaméntlirining sekkiz qétim Uyghurlar heqqide mexsus qarar qobul qilishigha türtke bolghan idi.

UNPO Ning bu qétimqi yighinida Uyghurlar mesilisi yene bir qétim nuqtiliq témilarning biri bolup otturigha qoyulghan. Yighinning 1 - künidiki échilish murasimigha yawropa parlaméntining millet wekilliri, libéral partiyining köpligen rehberlirimu ishtirak qilghan. UNPO Ning bash katipi Marino Basduchen ependi échilish murasimida qilghan sözide, yawropa parlaméntining millet wekili Nirj Deva ning xitayning aldam xaltisigha chüshüp, d u q we uning re'isi rabiye qadir xanim heqqide, shundaqla Uyghurlar mesilisi heqqide yawropa parlaméntining millet wekillirige sepsete tüsini alghan xata xetlerni yollighanliqini, buninggha qarshi UNPO ning derhal inkas qayturup, yawropa parlaméntining 700 din artuq millet wekilige xet yézip, d u q we rabiye qadir xanim heqqide chüshenche bergenlikini hemde Uyghurlar mesilisini qaytidin anglatqanliqini otturigha qoyghan. Bu seweblik yawropa parlaméntidiki 150 din artuq millet wekilining UNPO gha rehmet xéti yollap, Uyghurlarning, d u q we rabiye qadir xanimning heqiqi ehwalidin xewerdar qilghanliqigha teshekkür bildürgenlikini eskertip ötken.

Marinodin kéyin söz qilghan yawropa parlaméntining ezasi hem yawropa démokratiye we libéralizm ittipaqining re'isi Istvan Szent Ivanyi ependi, sözide nuqtiliq halda dunya Uyghur qurultiyi we rabiye qadir xanim heqqide toxtalghan. U sözide 2006-yili 11-ayda rabiye qadir xanim bilen yawropa parlaméntida körüshkenlikini, rabiye qadir xanimning özide chungqur tesirat qaldurghanlighini we rabiye qadir xanimning jasariti, gheyriti hem insaniy pezilitige heyran bolghanliqini, bundaq bir insanni térrorizm bilen baghlashqa urunushning intayin epsuslinarliq bir hadise ikenlikini, parlaminét ezasi Nirj Deva ning xitayning aldishigha ishinip, parlamént ezalirigha ewetken xétidin xewer tapqandin kiyin, derhal Nirj Deva ning xétige qarshi, Uyghurlarning tarixi we hazirqi weziyetlirini, heqiqi ehwalini eks ettürgen asasta xet teyyarlap, barliq parlamént ezalirigha ewetkenligini otturigha qoyup ötken.

Dolqun eysa ependi Uyghurlar heqqide doklat bergen

Bu xususta UNPO ijra'iye komitéti ezasi dolqun eysa ependi ziyaritimizni qobul qilip, yawropa parlaméntida chaqirilghan yighin heqqide tepsili melumat berdi. D u q re'isi rabiye qadir xanim aldinqi heptiliri Nirj Déva ning sepsetisige del waqtida jawap qayturup, Uyghurlar mesilisining yawropa parlaméntida yene bir qétim ghulghula qozghushigha sewepchi bolghan idi.

UNPO Ning yawropa parlaméntida chaqirilghan bu qétimqi yighinida, dolqun eysa ependi 5 - féwral ghulja weqesi heqqide melumat bergen we bu weqening 10 yilliqi munasiwiti bilen pütün dunyadiki Uyghur teshkilatlirining keng kölemlik xatirilesh pa'aliyetliri élip baridighanliqini eskertip ötken.

Buning bilen yighin ehli ghulja weqesini xatiriligen we shéhitlarning hörmiti üchün bir minut sükütte turghan. UNPO Ning bu qétimqi yighinida yene, UNPO bilen d u q ning 2007 - yilliq pa'aliyetlirining planliri muzakire qilin'ghan bolup, ikki teshkilatning öz-ara hemkarliship, Uyghurlar mesilisining dunya miqyasidiki tesir küchini yenimu ashurush heqqide kélishimler qobul qilin'ghan. (Ekrem)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet