Дуня уйғур қурултийи иҗраийә комитетидикиләр голландийидики паалийәтлирини башливәтти

Йиғиндин бир күн бурун, йәни 21-сентәбир күни рабийә қадир ханим башлиқ дуня уйғур қурултийи рәһбәрлири голландийә панаһлиқ тилигүчиләргә ярдәм бериш кеңиши билән сөһбәт елип барди. Бир саәтлик бу сөһбәттә панаһлиқ тилигүчиләргә ярдәм бериш комитети рәһбири дөләткә сунған доклатлириниң уйғур сәргәрданлирини вәтәнгә қайтурмаслиқ мәсилисидә актип рол ойниғанлиқини ейтип өтти вә бу һәқтә хизмәтлирини тонуштуруп өтти.

Дуня уйғур қурултийи рәиси рабийә қадир ханимниң бу қетимқи көрүшүши толиму муһим әһмийәткә игә. Чүнки, хитайлар уйғурларниң панаһлиқ тиләш мәсилисидә дуня уйғур қурултийи билән тиғму-тиғ күрәш қилиду. Буниңға қарши рабийә қадир ханимниң зиярәт қилғанлики дөләтләрниң муһаҗирлар органлири билән көрүшүп уйғур мәсилиси һәққидә музакирә елип бериши вә уйғурларниң тартиватқан зулумини, хитайларниң мустәмликичилик сияситини уларға чүшәндүрүши нәтиҗисидә, нурғун дөләтләр уйғур муһаҗирлириға қайтидин көңүл бөлгән. Алайлуқ, америкидики уйғур һәрикәтчилириниң хизмити нәтиҗисидә шветсийә һөкүмити бундин кейин панаһлиқ тилигән уйғурларни қайтурувәтмәйдиған болғаниди. Демәк рабийә қадир ханимниң голландийә панаһлиқ тилигүчиләргә ярдәм бериш кеңиши билән көрүшүши униң бу һәқтики хизмәтлириниң бир бөликидур.

Бу көрүшүш һәққидә техиму тәпсилий мәлуматларға игә болушни халисиңиз, диққитиңиз рабийә қадир ханим билән елип барған сөһбитимиздә болсун.