Dunya Uyghur qurultiyi nur bekrining rabiye qadir heqqidiki sözlirige reddiye berdi


2007-01-08
Share

Rabiye qadir xanim 2006 – yili 6 – öktebir küni Virginia shtatidiki öyide. AFP

Uyghur aptonom rayoni partkomining mu'awin sékritari nur bekri aptonom rayonluq teshwiqat bölüm bashliqliri yighini jeryanida Uyghur milliy herikitining rehbiri rabiye qadirgha hujum qilip, uni Uyghurlarning "anisi" dep atashqa qarshi ikenlikini bildürdi.

Xitay axbarat wasitiliridin biri hésablinidighan "junggo xewer agéntliqi" ning tor bétide (www.sina.com) Élan qilin'ghan uchurda körsitilishiche, nur bekri chet'ellerdiki siyasiy pa'aliyetchiler we Uyghur jama'itining rabiye qadirni "Uyghurlarning anisi" dep atishigha reddiye bérip, "bu bimenilik" dep körsetken.

Nur bekrining sözliri xitay hökümitining chet'ellerdiki Uyghurlarning we chet’ tel mentbu'atlirining rabiye qadirni "Uyghurlarning meniwi anisi" dep teriplishige nisbeten tunji qétim resmiy rewishte inkas qayturushi bolup hésablinidiken.

Bu munasiwet bilen dunya Uyghur qurultiyining bash katipi dolqun eysa nur bekrige reddiye bérip, rabiye qadirning Uyghurlarning rehbiri we meniwi anisi ikenliki hemde Uyghur xelqining buningdin héch qachan yanmaydighanliqini, dunya Uyghur qurultiyining rabiye qadir xanimni Uyghurlarning meniwi anisi dep atashni resmiy qarar qilghanliqini tekitlidi.

Dunya Uyghur qurultiyi bayanatchisi dilshat réshit bolsa, rabiye qadirning Uyghurlarning özliri saylighan wekili ikenliki, emma nur bekrining Uyghurlargha wekillik qilalamaydighanliqini, uning peqet xitay hökümitining Uyghurlarni basturush üchün ishlitidighan "gumashtisi" ikenlikini bildürdi shuningdek "nur bekrining rabiye qadir xanimgha qaratqan hujumi Uyghur siyasiy dewasining animizning rehberlikide xelq'ara sehnide künsayin yuqiri kötürüliwatqanliqigha chidimay qalghanliqining netijisi" dep körsetti.

Uyghur milliy herikitining rehbiri rabiye qadir amérikigha kelgendin buyan pütün küchi bilen Uyghur siyasiy dewasini xelq'ara sehnige élip chiqish üchün küresh qiliwatqan bolup, u köp qétim amérika dölet mejlisi uyushturghan ispat bérish yighinlirigha qatniship, Uyghurlarning insan hoquqi mesilisi heqqide guwahliqtin ötken hemde yawropa ittipaqigha eza memliketlerni ziyaret qilip, xelq'ara sehnide Uyghur mesilisini ünümlük tonushturghan, téxi yéqinda kanadani ziyaret qilghanda kanada bash ministiri stépan xarper bilen körüshken idi. Rabiye qadirning pidakarliqliri netijiside Uyghur jama'iti hem Uyghur teshkilatliri birdek halda uni "meniwi ana" dep atashni qarar qilghan.

Rabiye qadir nur bekrining sözige inkas qayturup, özining heqiqeten nur bekrige oxshash ademlerning anisi emeslikini, özining peqet azadliqqa intiliwatqan xelqning anisi ikenlikini, öz perzentliri millet söyer, öz milliti üchün jan pida qilidighan wetenperwer qilip terbiyiligenlikini körsitip, nur bekrining "rabiye hetta özining bir qanche balilirinimu yaxshi terbiyelelmigen adem, qandaq qilip, nechche milyon nopusluq Uyghur xelqining anisi bolalisun?" dégen sözlirige reddiye berdi. (Ümidwar)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet