Д у қ баянатчиси дилшат ришит шинҗаң ни әмәлдин қалдуруп шәрқий түркистанни әслигә кәлтүрүшни оттуриға қойди


2008-03-03
Share

Хитайда йилда бир ечилидиған мәмликәтлик сиясий кеңәш йиғини бүгүн 3 ‏- айниң 3 ‏- күни бейҗиңда ечилди. Хитай коммунист партийә мәркизи комитет сиясий бюросиниң даимий әзаси, мәмликәтлик сиясий кеңәшниң рәиси җачиңлин бу йиғинни 'җуңго үчүн төһпә яритидиған йиғин' дәп атиди. 'Хитайниң хәлқ гезити' обзор елан қилип, бу йиғин очуқ -ашкара йиғин болиду, йиғинда 30 йиллиқ ислаһат нәтиҗилири хатирилиниду, бейҗиң олимпик мусабиқиси башлиниш алдидики мәмури ислаһат лайиһиси көздин кәчүрүлиду вә йеңи рәһбәрләр сайлап чиқилиду, дәп баян қилди.

Җәмийәт тәртипини сақлаш' дегән нам билән бир милйон адәм бу икки йиғинни қоғдашқа тәшкилләнгән

Б б с ниң баян қилишичә, сиясий кеңәш йиғини елан қилған ахбаратта 'бу йиғинда сиясий, иқтисадий ислаһат, һава келиматиниң өзгириши, муһитни асраш, мал баһаси, туралғу, ишқа орунлишиш, сағламлиқ мәсилилири буйичә оттуриға қоюлған лайиһиләр музакирә қилиниду' дәп баян қилинди. Учур вастилири ашкарилап қоюшичә, хитай коммунист һөкүмити бу қетимқи икки йиғинни қоғдаш үчүн бейҗиңдики тйәнәнмен мәйданиниң 200 километир әтрапидики җайларда сақчи, қораллиқ сақчи қисим, бейҗиңда турушлуқ һәрбий қисимлардин башқа йәнә, һөкүмәт тәрипидин 'җәмийәт тәртипини сақлаш' дегән нам билән бир милйон адәмни бу икки йиғинни қоғдашқа тәшкиллигән.

Онмиң әрзийәтчи очуқ хәт йоллап, хәлқниң қануний һоқуқини қоғдашни тәләп қилди

Хәвәрдә баян қилинишичә йәнә, онмиң әрзийәтчи имза қоюп икки чоң йиғинға очуқ хәт йоллап, бу қетимқи икки чоң йиғинда хәлқниң қануний һоқуқини қоғдайдиған қанун мақуллашни тәләп қилған. Бу әрзийәтчиләрниң очуқ хетидә, һазир хитайда 'деһқанларниң йери йоқ, аһалиларниң туралғуси йоқ, ишчи- хизмәтчиләрниң өз алдиға вәзипә ада қилидиған һоқуқи йоқ, кәсп әһлилириниң кәспи йоқ, кесәл болғанларниң давалиниши капаләткә игә әмәс, қанун алдида адаләтсиз дело соралмайду, әмма һазир олимпикни қоғдаш' дегән нам билән юқириға әриз йоллиған кишиләрни тутқун қиливатиду, учур вастилириниң бундақ реал мәсилиләрни ашкарилишиға һөкүмәт тосқунлуқ қиливатиду, икки йиғинниң вәкиллири худди чирайлиқ ясап парқиритип қоюлған тәштәкләргә охшайду, әмәлийәттә бу тәштәкләрниң ичи чирип қурутлап кәткән' дәп баян қилинған.

'Мәмликәтлик сиясий кеңәшни тарқитиветиш керәк'

Хәлқара кишилик һоқуқ тәшкилатниң оргини 'йеңи әср җурнили'да 3 ‏- айниң 3 ‏- күни хитайда башланған икки чоң йиғин һәққидә елан қилинған бир обзорда, хитайдики хәлқ вәкили' түзүмини 'сабиқ совет иттипақидин импорт қилинған түзүм, хитайдики хиянәтчи-чирикләр үчүн хизмәт қилидиған демократийигә қарши түзүм, бундақ органни тарқитиветиш керәк' дәп көрситилгән.

Вей зию әпәнди елан қилған 'мәмликәтлик сиясий кеңәш йиғиниға бир совға' дегән обзорда көрситилишичә, биринчидин, сиясий кеңәш, хәлқ қурултейи дегән бу икки чоң органниң вәкиллириниң һечқайсисини хәлқ сайлап чиқмиған, иккинчидин, бу икки чоң тәшкилат баштин ‏- ахир хитайни демократийиләштүрүшкә тосқунлуқ қилип келиватиду, үчинчидин, бу икки чоң тәшкилат хәлқ баҗ тапшурған пулни исрап қилидиған, әмма хәлқниң әмәлий мәнпәәтини әкс әттүрмәйдиған тәшкилат, төтинчидин, бу икки чоң тәшкилатниң хитайдики реал мәсилиләрни һәл қилишта коммунист партийә билән кеңишидиған әмәлий роли йоқ, бәшинчидин, хитайдики бу икки чоң тәшкилат америка қатарлиқ демократик дөләтләрдики кеңәш палатаси вә дөләт мәҗлиси дегән тәшкилатлардәк рол ойнимайду.

'Шинҗаң' ни әмәлдин қалдуруп, шәрқий түркистанни әслигә кәлтүрүш керәк

Бүгүн хитайда икки чоң йиғин башланғанда, дуня уйғур қурултейиниң баянатчиси дилшат ришит баянат елан қилип, бу йилқи икки чоң йиғинда хитайда башқа милләтләрниң өзиниң тәқдирини өзи бәлгиләш һоқуқини капаләткә игә қилидиған қанун түзүлүши керәкликини, уйғур хәлқи узундин буян қобул қилмай келиватқан 'шинҗаң' дегән намни өзгәртип, шәрқий түркистан дегән намни әслигә кәлтүрүшни оттуриға қойди. (Вәли)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт