D u q bayanatchisi dilshat rishit shinjang ni emeldin qaldurup sherqiy türkistanni eslige keltürüshni otturigha qoydi


2008-03-03
Share

Xitayda yilda bir échilidighan memliketlik siyasiy kéngesh yighini bügün 3 ‏- ayning 3 ‏- küni béyjingda échildi. Xitay kommunist partiye merkizi komitét siyasiy byurosining da'imiy ezasi, memliketlik siyasiy kéngeshning re'isi jachinglin bu yighinni 'junggo üchün töhpe yaritidighan yighin' dep atidi. 'Xitayning xelq géziti' obzor élan qilip, bu yighin ochuq -ashkara yighin bolidu, yighinda 30 yilliq islahat netijiliri xatirilinidu, béyjing olimpik musabiqisi bashlinish aldidiki memuri islahat layihisi közdin kechürülidu we yéngi rehberler saylap chiqilidu, dep bayan qildi.

Jem'iyet tertipini saqlash' dégen nam bilen bir milyon adem bu ikki yighinni qoghdashqa teshkillen'gen

B b s ning bayan qilishiche, siyasiy kéngesh yighini élan qilghan axbaratta 'bu yighinda siyasiy, iqtisadiy islahat, hawa kélimatining özgirishi, muhitni asrash, mal bahasi, turalghu, ishqa orunlishish, saghlamliq mesililiri buyiche otturigha qoyulghan layihiler muzakire qilinidu' dep bayan qilindi. Uchur wastiliri ashkarilap qoyushiche, xitay kommunist hökümiti bu qétimqi ikki yighinni qoghdash üchün béyjingdiki tyen'enmén meydanining 200 kilométir etrapidiki jaylarda saqchi, qoralliq saqchi qisim, béyjingda turushluq herbiy qisimlardin bashqa yene, hökümet teripidin 'jem'iyet tertipini saqlash' dégen nam bilen bir milyon ademni bu ikki yighinni qoghdashqa teshkilligen.

Onming erziyetchi ochuq xet yollap, xelqning qanuniy hoquqini qoghdashni telep qildi

Xewerde bayan qilinishiche yene, onming erziyetchi imza qoyup ikki chong yighin'gha ochuq xet yollap, bu qétimqi ikki chong yighinda xelqning qanuniy hoquqini qoghdaydighan qanun maqullashni telep qilghan. Bu erziyetchilerning ochuq xétide, hazir xitayda 'déhqanlarning yéri yoq, ahalilarning turalghusi yoq, ishchi- xizmetchilerning öz aldigha wezipe ada qilidighan hoquqi yoq, kesp ehlilirining kespi yoq, késel bolghanlarning dawalinishi kapaletke ige emes, qanun aldida adaletsiz délo soralmaydu, emma hazir olimpikni qoghdash' dégen nam bilen yuqirigha eriz yollighan kishilerni tutqun qiliwatidu, uchur wastilirining bundaq ré'al mesililerni ashkarilishigha hökümet tosqunluq qiliwatidu, ikki yighinning wekilliri xuddi chirayliq yasap parqiritip qoyulghan teshteklerge oxshaydu, emeliyette bu teshteklerning ichi chirip qurutlap ketken' dep bayan qilin'ghan.

'Memliketlik siyasiy kéngeshni tarqitiwétish kérek'

Xelq'ara kishilik hoquq teshkilatning orgini 'yéngi esr jurnili'da 3 ‏- ayning 3 ‏- küni xitayda bashlan'ghan ikki chong yighin heqqide élan qilin'ghan bir obzorda, xitaydiki xelq wekili' tüzümini 'sabiq sowét ittipaqidin import qilin'ghan tüzüm, xitaydiki xiyanetchi-chirikler üchün xizmet qilidighan démokratiyige qarshi tüzüm, bundaq organni tarqitiwétish kérek' dep körsitilgen.

Wéy ziyu ependi élan qilghan 'memliketlik siyasiy kéngesh yighinigha bir sowgha' dégen obzorda körsitilishiche, birinchidin, siyasiy kéngesh, xelq qurultéyi dégen bu ikki chong organning wekillirining héchqaysisini xelq saylap chiqmighan, ikkinchidin, bu ikki chong teshkilat bashtin ‏- axir xitayni démokratiyileshtürüshke tosqunluq qilip kéliwatidu, üchinchidin, bu ikki chong teshkilat xelq baj tapshurghan pulni israp qilidighan, emma xelqning emeliy menpe'etini eks ettürmeydighan teshkilat, tötinchidin, bu ikki chong teshkilatning xitaydiki ré'al mesililerni hel qilishta kommunist partiye bilen kéngishidighan emeliy roli yoq, beshinchidin, xitaydiki bu ikki chong teshkilat amérika qatarliq démokratik döletlerdiki kéngesh palatasi we dölet mejlisi dégen teshkilatlardek rol oynimaydu.

'Shinjang' ni emeldin qaldurup, sherqiy türkistanni eslige keltürüsh kérek

Bügün xitayda ikki chong yighin bashlan'ghanda, dunya Uyghur qurultéyining bayanatchisi dilshat rishit bayanat élan qilip, bu yilqi ikki chong yighinda xitayda bashqa milletlerning özining teqdirini özi belgilesh hoquqini kapaletke ige qilidighan qanun tüzülüshi kéreklikini, Uyghur xelqi uzundin buyan qobul qilmay kéliwatqan 'shinjang' dégen namni özgertip, sherqiy türkistan dégen namni eslige keltürüshni otturigha qoydi. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet