Електир қуввитини симсиз йәткүзүш техникиси америкида синақтин өтти


2007.06.12

"Пән-илим" журнилиниң бу йил нәшр қилинған йеңи санида, америкиниң массачусетс штатидики санаәт-техника университетиниң физика факултетидики алимлар електир қуввитини симсиз йоллаш техникисини синақ қилип мувәппәқийәт қазанғанлиқи һәққидики доклат елан қилинди.

Бу доклатқа асасланғанда, буниңдин кейин, бундақ 'симсиз қуввәт' техникиси билән янфон, ян компютерларға, аилә ишлирини идарә қилидиған робатлар (електронлуқ адәм) , музика аңлайдиған MP3 әсваблири қатарлиқларға йирақтин симсиз ток қачилаш мумкин болиду.

Електир симлири билән хошлишидиған дәвр кәлмәктә

Франклин хәдлей әпәндиниң 6 ‏- айниң 7 ‏- күни бостон шәһиридики санаәт-техника университетидин хәвәр қилишичә, йеқинда америкида синақтин өткән електир қуввитини симсиз йоллаш техникиси, йеқин кәлгүсидә хәлқ турмуши үчүн мислисиз қолайлиқ елип келиду.

Америкида бундақ 'симсиз қуввәт' техникиси синақтин өткәндин кейин, һазир пүтүн дуня хәлқи үчүн електир симлири билән хошлишидиған бир йеңи дәвр йетип келишкә башлиди.

Йирақтин симсиз ток йәткүзүш синиқи

Америкиниң массачусетс штатидики санаәт-техника университети физика факултетиниң алимлири елан қилған илмий доклатта баян қилинишичә, улар йеқинда електир магнит долқунлири арқилиқ йирақтин ток йәткүзүш синиқида мувәппәқийәт қазанған. Дәсләпки синақта 60 ватлиқ електир ламписини икки метир йирақлиқтин симсиз йорутқан. Доклатта ейтилишичә, алимлар бундақ "симсиз қуввәт" техникисини синақ қилидиған әсвабни бултур лайиһиләп чиқип синаққа тәйярлиқ қилишқа башлиған икән.

Бу тәтқиқат гурупписиниң баян қилишичә, улар бу илмий синақни кәсмә қелинлиқи 60 миллиметирлиқ мис сим оралған икки сим ғалтики арқилиқ тамамлиған. Алимлар өзлири тәйярлиған мис сим ғалтикиниң долқун тарқитидиған бирини ток мәнбәсигә четип, қобуллайдиған йәнә бирини икки метир йирақлиқта қоюп, арилиқта һасил болған електир долқунлири арқилиқ 60 ватлиқ електир ламписини симсиз йорутқан. Електир мәнбәси билән қобуллиғучиниң арисини яғач яки метал билән тосқандиму, лампиниң йоруши тәсиргә учримиған.

‏-‏- Биз бу җәһәттики нәзәрийигә бурунла ишинәттуқ, әмма ахирқи һесабта, синақ арқилиқ испатлиниши лазим иди, ‏--- дәйду "симсиз қуввәт" тәтқиқат гурупписиниң әзаси профессор марин солячек. Доклатта баян қилинишичә, бу профессор йәнә, өзиниң янчуқидики янфон' ға һәр айда алтә қетим йирақтин симсиз ток қачилап уда мувәппәқийәт қазанған.

'Симсиз қуввәт' техникисиниң бихәтәрлики

Алимларниң қаришичә, төвән еқимлиқ електр магнит долқунлири бихәтәрликкә капаләтлик қилалайду. Мәсилән: икки гегбайт хертслик янфон ишләткәндә, униң долқунлири наһайити қисқа болғанлиқтин, униңда ток мәйдани билән магнит мәйдани бирла вақитта һасил болиду. Адәттики шараитта, униңда пәқәт магнит мәйданила қалиду.

Адәттә адәм бәдининиң електир мәйданиға қайтуридиған инкаси наһайити күчлүк болиду, мәсилән, микро долқунлар арқилиқ гөшни кавап қилғили болиду. Әмма адәм бәдининиң магнит долқунлириға болған инкаси йоқ дейәрлик һалда. Шуңлашқа електир магнит долқунлири арқилиқ орунлинидиған 'симсиз қуввәт' техникиси адәм бәдини үчүн ейтқанда бихәтәр.

‏-‏-‏- Әмма бу йеңи техникини турмушта қоллиниш бурун, йәнә техиму инчикиләп синақ қилишқа тоғра келиду, ‏-‏- дәйду профессор питер фишер. Униң ейтишичә, бу тәтқиқат гурупписиниң нишани електронлуқ әсвабларниң һәҗмини кичиклитиш, әмма униң иқтидарини өстүрүш, болупму кишилик турмушқа әң зор дәриҗидә қулайлиқ елип келидиған йирақтин симсиз қуввәт йәткүзүш техникисини реаллиққа айландуруштин ибарәт. (Вәли)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.