Iraqtiki al qa'ide teshkilatining yéngi rehbiri elmuhajir kim?

Iraqtiki elqa'ide teshkilatining, ötken hepte öltürülgen teshkilat rehbiri ebu musab elzerqawiyning ornigha ebu hemze elmuhajirning teyinlgenlikini élan qilishi, dunyadiki térrorchiliq mutexessisliri we axbarat teshkilatlirini heyran qaldurdi.

Iraqtiki elqa'ide teshkilatning intérnét tor bétide élan qilghan bayanatigha asaslan'ghanda, yanwar éyida elzerqawiy teripidin qurulghan we alte iraq qoralliq sünniy herikitidin teshkil tapqan mujahitlar kéngishi birdek awaz bilen ebu hemze elmuhajirni elzerqawiyning ornigha emir saylap chiqqan.

Deslepte bezi mulahizichiler, bu bayanatning yalghan ikenlikini, hetta ebu hemze elmuhajir isimlik bir kishining mewjut emeslikini bildürdi. Emma kéyinrek térrorchiliq mutexessisliri elmuhajir isimlik bir kishining mewjut ikenlikini, uning iraqtiki elqa'ide teshkilatning axbarat ishlirining bashliqi ikenlikini éniqlidi.

Bin ladin bilen alaqisi bar

Asiya waqti gézitining xewer qilishiche, radikal islamiy teshkilatlar bilen yéqin alaqisi bolghan misirliq adwokat we elqa'ide mutexessisi muntesir elzeyyat elmuhajirning bin ladin bilen birge pa'aliyet élip bérip, 1995 yilighiche sudanda bin ladin bilen birge turghanliqini, andin pakistanning pishawer shehirige köchüp bérip, u yerdin afghanistan'gha yötkelgenlikini we 2001 ‏- yili bolsa iraqqa kélip orunlashqanliqini bayan qilmaqta.

Xewerlerge qarighanda, ebu hemze elmuhajir, ebu musab elzerqawiyning yéqin ademliridin bolup, 2001‏- yilidin béri uning bilen birlikte pa'aliyet élip barghan. 1965 We yaki 1966 yilida tughulghan elmuhajir iraqning paytexti baghdadning 400 kilométir gherbiy shimali rayonigha jaylashqan suriyining kichik bir chégra shehiri bolghan elqayim shehiride turup, bu yerde yéngi kelgen militantlarni elqa'idening heriketliri we meqsetliri heqqide terbiyileydiken.

Emma yéqinda u suriyidin iraqning kerkük shehirige yötkelgen. Mutexessislerning bildürüshiche, eger elmuhajir hazirmu kerkük shehiride turuwatqan bolsa, seyshenbe küni kerkük shehiride yüz bergen partlashlarda uning qoli bar bolushi mumkin iken. Bu partlashlarda 24 kishi ölgen, 40 etrapida adem yarilan'ghan.

Dölet teweliki namelum

Elmuhajirning qaysi döletning puqrasi ikenliki melum emes. Bezilarning éytishiche, u liwiye puqrasi iken. Emma bashqilar uning yemen puqrasi ikenlikini bayan qilmaqta. Yene beziler uning afghanistan urushigha qatnashqan bir iraqliq ikenlikini bildürmekte.

Emma nurghun mutexessisler, uning iraq puqrasi ikenlikini ret qilmaqta. Ularning éytishiche, elzerqawiy héchqachan iraqliqlargha ishenmigen. Shunga öz etrapigha peqetla yemenlik, suriyilik, liwiyilik we se'udi erebistanliq militantlarni toplighan. Shuning üchün eger elmuhajir elzerqawiygha yéqin birkishi bolsa, uning iraqliq bolushi mumkin emes.

Emma bezi mulahizichiler, elmuhajirning, osama bin ladin teripidin iraqtiki elqa'ide teshkilatining rehberlikige teyinlen'gen bolushi mumkinliqini bildrümekte. Ularning bildürüshiche, usama bin ladin, elzerqawiyning rehberliki dewride iraqtiki qarshilashquchi küchler otturisida peyda bolghan ixtilaplarni we sunniyler bilen shiyeler arisidiki toqonushni azaytish üchün elzerqawiyning ornigha bir iraqliqni teyinligen bolushi mumkin. Yene bir tereptin emuhajirge oxshash tonulmighan bir kishining elzerqawiyning ornigha iraqtiki elqa'ide teshkilatining re'isi bolup teynlinishi, usama bin ladinning iraqtiki heriketlerge biwaste arilishishigha shara'i'it yaritip béridiken.

Ularning éytishiche, ebu hemze elmuhajir, elzerqawiygha oxshash iraqtiki herbiy heriketlerge aktip qatnashmighan, shunga u bir herbiy rehber emes, siyasiy ishlargha rehberlik qilishi mumkin. Herbiy ishlar saddam hüseyinning sabiq génirali 62 yashtiki ebu esil qatarliq kishiler teripidin élip bérilishi mumkin. Siyasiy istratégiye we künlük siyasiy pa'aliyetler elmuhajir hetta elqa'ide teshkilatining rehbiri usama bn ladin teripidin yüzgüzülüshi mumkin. (Qanat)