Bérmudaning 4 Uyghurni qobul qilishi bérmuda bilen en'giliye arisi'ida arazchiliq peyda qildi

Bérmuda xeritisi

Bérmuda taqim aralliri, en'giliyining chet'eldiki térritoriyisi hésablinidu؛ bérmuda ichki ishlirida musteqil bolsimu, tashqi ishlar, dölet mudapi'esi we bixeterlik ishlirida en'giliyige béqinidu؛ shunga en'giliye hökümiti 4 Uyghurning bérmudagha yerlishish qararidin özlirining xewersiz qalghanliqigha naraziliq bildürmekte.

En'giliye tashqi ishlar ministirliqi bügün bayanat élan qilip, bérmudaning eslide bu ishta en'giliyining meslihetini élishi kéreklikini, bérmudaning bixeterlik ishlirida mes'uliyetning en'giliyide ikenlikini eskertken. Bérmuda bash ministiri brawn bügün muxbirlargha qilghan sözide, özining 4 Uyghur mesiliside qararni toghra bergenlikini tekitligen؛ buning bilen birlikte mezkur mesilide en'giliye terep bilen soghuq bir talash - tartish bolghanliqini ashkarilighan.

Bérmuda Uyghurlarni qobul qilghanda köchmen ishchi salahiyiti bilen qobul qilghan. Köchmen ishiliri bérmudaning ichki ishliri hésablinidu. Mana bu nuqtidin bérmuda 4 Uyghurni orunlashturush qararining en'giliye bilen arisi'idiki kélishimge xilap emeslikini otturigha qoymaqta؛ emma bu 4 Uyghurning bérmudagha yötkilishini amérika terep bilen birqanche hepte mu'azakirileshken؛ axirqi qararni charshenbe küni yeni 10 - iyun küni kechte bergen. Amérika terep peqet 4 neper Uyghur élip méngilghan ayropilan kubadin uchush aldidila, en'giliye terepke xewer bergen.

Washin'giton pochtisi gézitining xewer qilishiche, amérika tashqi ishlar ministiri hillariy klinton, tünügün en'giliye tashqi ishlar ministiri dawid miliban'gha téléfon qilip؛ en'giliye terepning naraziliqini peseytken؛ emma xewrde hillariy kilintonning konkrét nimilerni dégenliki bildürülmigen.

Nöwette közetküchiler, amérika terepning, xitay bilen en'giliye arisi'idiki munasiwetning buzulmasliqini nezerde tutup, 4 Uyghurni bérmudagha orunlashturushta en'giliyining meslihetini almighanliqini؛ kilintonning belkim bu nuqtida izahat bergenlikini texmin qilishmaqta.

4 Uyghurning bérmudagha orunlishishini qizghin tebrikligen teshkilatlardin biri, amérikidiki qanuniy hoquq merkizi namliq ammiwiy teshkilattur.

Teshkilat bayanatida mundaq deydu: "biz aldi bilen bu 4 Uyghurning erkinlikke érishkenlikini tebrikleymiz. Buning bilen birlikte, bérmuda hökümitining insanperwer meydanini qizghin qollaymiz."

Bayanatta yene bu 4 neper Uyghurning erkinlikke érishish we hayatini qaytidin bashlashtin bashqa arzusi yoqluqini, shunga bashqa döletlernimu, güentanamo mesiliside bérmudani ölge élishqa chaqirghan. Mezkur teshkilat 1966 ‏ - yili amérikidiki adwokatlar teripidin qurulghan. Bayanatta bildürülüshiche, nöwette güentanamoda tutup turuluwatqan, adil nuri, ehmed tursun, abdughappar we abdurazaq qatarliq 4 neper Uyghur mehbusning adwokatliri mana mushu teshkilatning ezaliridur.

Bérmudagha orunlashqan Uyghurlardin biri tünügün adwokati arqiliq bérmuda hökümitige mundaq minnetdarliq bildürgen: "biz kommunizm tüzümide ösüp yétilduq؛ biz uzundin béri, mana mushundaq ténch we erkin jem'iyette yashashni arzu qilip kelgen iduq؛ bügün siler bizge erkinlik ishikini achtinglar."

Hörmetlik radi'o anglighuchilar, yuqirida biz silerge 4 neper Uyghurning bérmudagha yerleshkenliki heqqide xelq'aradiki inkaslarni anglattuq.