Enqerediki xitay elchixanisi aldida 5-iyulni xatirilesh namayishi ötküzüldi

Bügün 7-ayning 5-küni 5- iyul ürümchi weqesining ikki yilliqi munasiwiti bilen enqerede naraziliq pa'aliyetliri ötküzüldi.
Ixtiyariy muxbirimiz erkin tarim
2011-07-05
Share
xitayning-enqere-elchixanisida-namayish-5-iyul-305.jpg Enqerediki xitay elchixanisi aldida 5-iyulni xatirilesh namayishi. 2011-Yili 5-iyul.
RFA/Erkin Tarim

Pa'aliyet türkiye waqti etigen sa'et 11 yérimida türkiyining paytexti enqere shehirining merkizige jaylashqan qughuli baghchisida bashlandi. Aldi bilen baghchigha toplan'ghan namayishchilar qollirida türkiyining bayriqi bilen sherqiy türkistanning bayriqini kötürgen halda xitayning enqerede turushluq elchixanisining aldigha qarap mangdi.

Namayishchilar qughuli baghchisidin xitay elchixanisighiche ikki kilométir yürüp, yol boyi “Türkler uxlima, qérindashliringgha ige chiq”, “Shinjang emes sherqiy türkistan” dégendek sho'arlarni towlashti. Namayishchilar enqerening eng awat kochiliridin biri bolghan argéntina kochisi bilen pelestin kochiliridin sho'ar towlap ötüwatqanda ikki yol etrapidiki shirket, idare-jem'iyet xadimliri ishiklirining aldigha chiqip Uyghurlarni qollap quwwetleydighanliqlirini ipadileshti.

enqere-quhulu-baghchisida-namayish-5-iyul-385.jpg
Enqere quhulu baghchisida namayish. 2011-Yili 5-iyul.
RFA/Erkin Tarim

20 Minut yol yürgendin kéyin xitayning enqerede turushluq elchixanisining aldigha yétip kelgen namayishchilar arqa-arqidin sho'ar towlap xitay hökümitini eyiblep türk hökümitini Uyghurlargha ige chiqishqa chaqirdi. Bu yerde dunya Uyghur qurultiyi mu'awin re'isi séyit tümtürk bilen bu pa'aliyetni uyushturghan sherqiy türkistan medeniyet we hemkarliq jem'iyiti enqere shöbisi bashliqi xeyrullah efendigil ependi muxbirlargha bayanat bergendin kéyin xitay elchixanisining derwazisigha qara gülchembirek qoyup ayrildi.

Bügünki bu namayishqa enqere we qeyserilik Uyghurlardin bashqa türkiyining eng chong ammiwi teshkilatliridin biri bolghan türkiye kadirlar uyushmisi bashliqi isma'il qonjuq ependi türkiye qanun instituti mudiri proféssor doktor aliy ependi, ezerbeyjanliqlar jem'iyiti mes'uli za'ur bayramli ependi qatarliq kishilermu qatnashti. Xitay elchixanisi aldida ötküzülgen bu namayishqa türk we chet'ellik muxbirlarning qiziqishimu yuqiri boldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet