Erkin aliptékin ependi amérika awam palatasining qararini alqishlidi

2007-09-20
Élxet
Pikir
Share
Print

Erkin-Rabiye.bmp
Rabiye qadir xanim bilen erkin aliptékin ependim birge. UAA Photo

17 - Séntebir küni chüshtin kéyin amérika awam palatasida, Uyghur kishilik hoquq pa'aliyetchisi rabiye qadir xanimning xitay türmisidiki perzentlirini we xitay türmiside yétiwatqan kanada puqrasi hüseyin jélilni derhal qoyup bérish heqqide xitay hökümitige bésim ishlitidighan 497 - nomurluq qararning maqullan'ghanliqi, barliq Uyghurlarni xushalliqqa chömdürdi.

D u q we wekaletsiz milletler teshkilatining sabiq re'isi, meshhur siyasiyon erkin aliptékin ependi bu munasiwet bilen ziyaritimizni qobul qilip, d u q re'isi, Uyghur milliy herikitining rehbiri rabiye qadir xanimgha bolghan teshekkürini bildürdi we rabiye qadir xanimgha yuqiri baha berdi.

Bu qarar Uyghur milliy herikiti üchün dewr bölgüch ehmiyetke ige

Erkin aliptékin ependi mundaq deydu: " Uyghurlarning meniwi anisi, Uyghur milliy herikitining rehbiri we dunya Uyghur qurultiyining re'isi möhterem rabiye qadir xanimgha yene bir mertiwe teshekkürümni bildürimen! möhterem rabiye qadir xanim 2005 - yili xitay turmisidin azat qilin'ghandin buyan, muhajirettiki Uyghur milliy herikiti tarixida körülüp baqmighan, büyük ghelibilerni wujudqa keltürdi. Dunyaning siyasitini belgilewatqan birleshken milletler teshkilatida, yawrupa parlaméntida we amérika konggréside Uyghurlar mesilisini eng janliq bir rewishte anglitip, bügün xitay zulumi astida mislisiz éghir zulum körüwatqan eziz millitimizge hésdashliq qilghuchi zor bir türküm dunya jama'et küchini barliqqa keltürdi. Amérika awam palatasining bu qétim maqullighan 497 - nomurluq qarari buning tipik misalliridin biri hésablinidu. Möhterem rabiye qadir xanimning tirishchanliqi bilen amérika hökümitining bu qararni qobul körüshi, Uyghur milliy herikiti üchün dewr bölgüch ehmiyetke ige hadise hésablinidu. Bu munasiwet bilen möhterem rabiye qadir xanimgha chungqur hörmitimni we rehmitimni izhar qilimen! "

Rabiye qadir xanim pütkül insan heqliri dunyasining bayraqdari hem qehrimani

Erkin aliptékin ependi yene, rabiye qadir xanimning dunya siyasiy sehnisi we Uyghur milliy herikitidiki ornigha yüksek baha bérip mundaq dédi: "elwette, amérikida élip barghan siyasiy küreshliri bilen amérika parlaméntigha küchlük tesir körsetken, amérika prézidénti bush ependining qobul qilishigha we medhiyisige sazawer bolghan möhterem rabiye qadir xanim, öz nöwitide yene birleshken milletler teshkilatida, yawrupa parlaméntida we gherb elliride élip barghan mujadilisi bilen, dunya siyasiy sehniside we Uyghur milliy herikiti musapiside özining yétilgen rehberlik iqtidarini namayen qilip, bextsiz millitimizni pütün dunyagha tonutti. Bu, muhajirettiki Uyghur milliy herikiti musapiside biz qolgha keltürüshke muyesser bolalmighan bir ghaye idi. Bügün rabiye qadir xanim yalghuz Uyghur milliy herikitining rehbiri, dunya Uyghur qurultiyining re'isi salahiyiti bilenla emes, belki pütkül insan heqliri dunyasining bayraqdari hem qehrimani süpitide cholpan kebi parlashqa bashlidi. Bu, barliq sherqiy türkistan xelqi üchün zor shan - sherep we büyük ghelibe ! "

"Men möhterem rabiye qadir xanimgha öz namimdin we aliptékin a'ilisi namidin teshekkür izhar qilish, téximu zor nusret tilesh bilen birge, hazirgha qeder bolup ötkinidek, aliptékin a'ilisining her qachan rabiye xanimning yénida ikenlikini we pütün imkanliri bilen qollap quwwetleydighanliqini tekitlep ötimen!"

Uyghur milliy herikitining bösüsh xaraktérlik yene bir ghelibisi

Erkin aliptékin ependi rabiye qadir xanim amérika prézidénti bush ependi bilen körüshkende yene bir muraji'et élan qilip, mundaq dégen idi: "xitay mustebit hökümiti sherqiy türkistandiki erkinlik, démokratiye we kishilik hoquq kürishini dehshetlik rewishte basturupla qalmay, muhajirettiki Uyghur milliy herikitini térrorizm töhmiti bilen ujuqturush, Uyghur milliy mujadilisining közge körün'gen rehberlirini yétim qaldurush üchün barliq siyasiy, iqtisadiy, déplomatik wasitilirige muraji'et qilip ténim tapmaywatqan bir peyitte, rabiye qadir xanimning amérika prézidénti G. W. Bush Ependi hem uning xanimi bilen xelq'araliq kishilik hoquq munbiride didar körüshüp, sherqiy türkistan xelqining dert - elemlirini eslitish pursitige érishkenliki bügünki zaman tariximizdiki Uyghur milliy herikitining bösüsh xaraktérlik yene bir nusritidur!"

"Rabiye qadir xanimning bu töhpisi muhajirettiki milliy kürishimizni yéngi bir dewrge bashlap kirdi. Uyghur milliy herikitige suwalghan qara daghni tazilidi. Sherqiy türkistan xelqining dert - elemlirini heqqaniyet dunyasigha tonutti. Uyghur millitining esli iradisini étirap qildurdi. Sherqiy türkistan dewasining heqliq dewa ikenlikini, 25 milyon xelqning bu muqeddes dewasining ebedilikini, Uyghur millitining öz teqdirini özi belgilesh kürishining muqerrer rewishte ghelibe qazinidighan küresh ikenlikini pütün dunyagha jakarlidi!"

"Men möhterem rabiye qadir xanimning Uyghur xelqige, sherqiy türkistan milliy mujadilisige ata qilghan bu shan - sherepliri üchün rehmet we apirin éytimen!" (ekrem)

Pikirler (0)
Share
Toluq bet