Йеңи йил күни нәччә йүзлигән адәм бейҗиңда қолға елинди

• Мухбиримиз меһрибанниң бу һәқтики мәлумати
• Download story audio

Радиомизниң игилишичә, йеңи йил күни, яққа ютлардин бейҗиңға келип ши җинсән вә тйәнәнмин әтрапида намайиш өткүзмәкчи болған нәччә йүзлигән әрзи қилғучилар сақчилар тәрипидин қолға елинди.

Хәвәдә ейтилишичә, бейҗиң сақчилири өткән җүмә күнидин башлапла әрз қилғучилар турушлуқ җайларға берип, назарәт қилиш билән бир вақитта адәм тутуш һәрикитини башливәткән. Шундақтиму, әрз қилғучилар ши җинсән вә тйәнәнмин әтрапида намайиш өткүзүшни пиланлиған. Лекин намайиш башлина-башланмайла, алдин хәвәрдар болған сақчилар, намайишчиларниң һәммисини дегидәк қолға елип мәхсус әрз қилғучиларни солап қойидиған маҗя луға апирип қамап қойған. Сақчиларниң адәм тутушқа башлиғанлиқини көргән бир қисим наһайити аз сандики әрз қилғучилар қечип кәткән.

Намайиштин бурунқи тутқун

Зияритимизни қобул қилған бейҗиңдики әрз қилғучи думиңруң йеңи йил күни әтигәндә, намайиш өткүзмәкчи болғанлар тйәнәнмин мәйданиға берип намайиш өткүзүш алдида турғанда, алдин тәйярлиқ қилип турған сақчиларға йолуқуп қалғанлиқини сөзләп келип, "биз тйән ән мин мәйданиға кириштә, төт гуруппиға бөлүнүп кирмәкчи болған. Әтигән саәт 8 болиши биләнла биринчи гуруппа кирип кәткән, лекин улар техи дөләт байриқиниң алдиға бармай турупла, сақчилар тәрипидин тутулған. Иккинчи гуруппа техи машинидин чүшмәй турупла тосувелинған. Буни көргән 3 ‏- гурупписидикиләр, йәр асти каридор арқилиқ маңмақчи болған. Лекин улар техи хәлқ йиғин залиға йеқинлашмай турупла, сақчи машиниси келип уларниң алдини тосиған вә адәм тутушқа башлиған. Шуниң билән, бир амал қилип қечип кәткәнләрни һесабқа алмиғанда бир дәмниң ичидә 200 дин артуқ адәм қолған елинди", деди.

Радиомизниң зияритини қобул қилған ду миңруң сөзидә йәнә, йеңи йил күни әттигәндә, ши җинсән әтрапида намайиш өткүзмәкчи болған бир қисим әрз қилғучиларниңму сақчилар тәрипидин қолға елинғанлиқини мәлум қилип, бу қетимқи намайишларни орунлаштурғучи бейҗиң өзидики мәлум бир әрз қилғучи икәнликини лекин орунлаштурғучи өзиниң кимликини мәлум қилмай пәқәт уларға намайиш қилиш орунлириниң йол хәритисини бәргәнликини билдүрди.

Йеңи йил күни чүштин кейин саәт 4 ләр әтрапида, сақчилар тәрипидин қоюп берилгән җу фамилилик бир әрз қилғучи өзиниң әттигән саәт 9 болмайла ши җинсән әтрапида, сақчилар тәрипидин тутуп кетилгәнликини мәлум қилип, "сақчилар бизни тутуп апирип, кимлик кинишкилиримизни тәкшүрүш билән бир вақитта, бир - бирләп сорақ қилди һәмдә бизгә ‘фалунгуңчилар’ дегән қалпақни кийгүзүп, қаттиқ сүрүштә қилди" дәп билдүрди.

Әрздарлар бесим астида қалған

Радиомизниң зияритини қобул қилған бейҗиң шин җйеку районида турушлуқ кишилик һоқуқ паалийәтчиси ни йүлән, йиңи йил алдида, өзиниң мәзкур райондики өй ‏-зимин ширкити тәрипидин йезилған бир парчә хәтни тапшуруп алғанлиқини мәлум қилип "улар йеңи йилдин кейинла мән туриватқан өйни қақидиғанлиқини билдүргән. Улар йәнә 1 - числадин бурун чеқиш оқтурушни әвәтимиз дегән, улар өй чеқиш һәққидә һечқандақ шәрт -намиларни қоймастинла, мәҗбури чақидиғанлиқини билдүргән. Гәрчә һазирчә техи рәсмий уқтурушни тапшуруп алмиған болсамму, мән ишинимәнки уларниң бу хил лүкчәк характерлиқ миҗәзигә қариғанда, уларниң қолидин һәрқандақ бала келиду " дәп билдүрди:

Мунасивәтлик мәлуматларға қариғанда, бундин илгири венҗябав билән көрүшкән икки нәпәр әрз қилғучи интайин қаттиқ бесим астида қалған. Давамлиқ радиомизниң зияритини қобул қилип келиватқан ву тйәнлиму йеқиндин буян радио зияритимизни рәт қилишқа башлиди. (Меһрибан)