Yéngi yil küni nechche yüzligen adem béyjingda qolgha élindi


2007.01.02

Radi'omizning igilishiche, yéngi yil küni, yaqqa yutlardin béyjinggha kélip shi jinsen we tyen'enmin etrapida namayish ötküzmekchi bolghan nechche yüzligen erzi qilghuchilar saqchilar teripidin qolgha élindi.

Xewede éytilishiche, béyjing saqchiliri ötken jüme künidin bashlapla erz qilghuchilar turushluq jaylargha bérip, nazaret qilish bilen bir waqitta adem tutush herikitini bashliwetken. Shundaqtimu, erz qilghuchilar shi jinsen we tyen'enmin etrapida namayish ötküzüshni pilanlighan. Lékin namayish bashlina-bashlanmayla, aldin xewerdar bolghan saqchilar, namayishchilarning hemmisini dégidek qolgha élip mexsus erz qilghuchilarni solap qoyidighan majya lugha apirip qamap qoyghan. Saqchilarning adem tutushqa bashlighanliqini körgen bir qisim nahayiti az sandiki erz qilghuchilar qéchip ketken.

Namayishtin burunqi tutqun

Ziyaritimizni qobul qilghan béyjingdiki erz qilghuchi dumingrung yéngi yil küni etigende, namayish ötküzmekchi bolghanlar tyen'enmin meydanigha bérip namayish ötküzüsh aldida turghanda, aldin teyyarliq qilip turghan saqchilargha yoluqup qalghanliqini sözlep kélip, "biz tyen en min meydanigha kirishte, töt guruppigha bölünüp kirmekchi bolghan. Etigen sa'et 8 bolishi bilenla birinchi guruppa kirip ketken, lékin ular téxi dölet bayriqining aldigha barmay turupla, saqchilar teripidin tutulghan. Ikkinchi guruppa téxi mashinidin chüshmey turupla tosuwélin'ghan. Buni körgen 3 ‏- guruppisidikiler, yer asti karidor arqiliq mangmaqchi bolghan. Lékin ular téxi xelq yighin zaligha yéqinlashmay turupla, saqchi mashinisi kélip ularning aldini tosighan we adem tutushqa bashlighan. Shuning bilen, bir amal qilip qéchip ketkenlerni hésabqa almighanda bir demning ichide 200 din artuq adem qolghan élindi", dédi.

Radi'omizning ziyaritini qobul qilghan du mingrung sözide yene, yéngi yil küni ettigende, shi jinsen etrapida namayish ötküzmekchi bolghan bir qisim erz qilghuchilarningmu saqchilar teripidin qolgha élin'ghanliqini melum qilip, bu qétimqi namayishlarni orunlashturghuchi béyjing özidiki melum bir erz qilghuchi ikenlikini lékin orunlashturghuchi özining kimlikini melum qilmay peqet ulargha namayish qilish orunlirining yol xeritisini bergenlikini bildürdi.

Yéngi yil küni chüshtin kéyin sa'et 4 ler etrapida, saqchilar teripidin qoyup bérilgen ju famililik bir erz qilghuchi özining ettigen sa'et 9 bolmayla shi jinsen etrapida, saqchilar teripidin tutup kétilgenlikini melum qilip, "saqchilar bizni tutup apirip, kimlik kinishkilirimizni tekshürüsh bilen bir waqitta, bir - birlep soraq qildi hemde bizge ‘falun'gungchilar’ dégen qalpaqni kiygüzüp, qattiq sürüshte qildi" dep bildürdi.

Erzdarlar bésim astida qalghan

Radi'omizning ziyaritini qobul qilghan béyjing shin jyéku rayonida turushluq kishilik hoquq pa'aliyetchisi ni yülen, yingi yil aldida, özining mezkur rayondiki öy ‏-zimin shirkiti teripidin yézilghan bir parche xetni tapshurup alghanliqini melum qilip "ular yéngi yildin kéyinla men turiwatqan öyni qaqidighanliqini bildürgen. Ular yene 1 - chisladin burun chéqish oqturushni ewetimiz dégen, ular öy chéqish heqqide héchqandaq shert -namilarni qoymastinla, mejburi chaqidighanliqini bildürgen. Gerche hazirche téxi resmiy uqturushni tapshurup almighan bolsammu, men ishinimenki ularning bu xil lükchek xaraktérliq mijezige qarighanda, ularning qolidin herqandaq bala kélidu " dep bildürdi:

Munasiwetlik melumatlargha qarighanda, bundin ilgiri wénjyabaw bilen körüshken ikki neper erz qilghuchi intayin qattiq bésim astida qalghan. Dawamliq radi'omizning ziyaritini qobul qilip kéliwatqan wu tyenlimu yéqindin buyan radi'o ziyaritimizni ret qilishqa bashlidi. (Méhriban)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.