Uyghur erzdar nurun'gül poxurluq qilghan xitayning edipini berdi

Nurun'gül xanim poxurluq qilghan xitayni öz gunahi üchün kechürüm sorashqa mejburlap we béyjing saqchiliridin bu xitayni jazalashni telep qilip, öz ghururini qoghdash yolida jasaritini körsetti.
Muxbirimiz méhriban
2012-05-18
Élxet
Pikir
Share
Print
Uyghur erzdar nurun'gül toxti balisi bilen. 2012-Yili may, béyjing.
Uyghur erzdar nurun'gül toxti balisi bilen. 2012-Yili may, béyjing.
RFA/Shohret Hoshur

Bolupmu béyjinggha kelgen ayal erzdarlar yuqiriqi tehditlerge taqabil turushtin bashqa, öz ar-nomusi hem ghururini qoghdashta téximu zor gheyret hem qehrimanliqini namayan qilmaqta. Béyjingdiki erzdar nurun'gül xanimning poxurluq qilghan xitayni öz gunahi üchün kechürüm sorashqa mejburlap, béyjing saqchiliridin bu xitayni jazalashni telep qilish yolida körsetken jasariti béyjingdiki erzdarlar arisida "Öz ghururini qoghdash yolidiki qehrimanliq" dep teriplenmekte.

Birnechche kündin buyan, béyjingdiki Uyghur erzdarlar arisida nurun'gülning öz ghururini qoghdash yolida, poxurluq qilghan xitayning edipini bergenliki heqqidiki hékaye tarqalghan. Radi'omiz bu uchurni alghandin kéyin weqening tepsilatini bilish üchün, nurun'gül xanimgha téléfon qilduq.

Shu küni yüz bergen weqeni bayan qilghan nurun'gül xanim, béyjingda erz qiliwatqan nurghunlighan Uyghur erzdarlarning saqchilarning qoghlap tutushidin saqlinish hem béyjingdiki méhmanxanilarda Uyghurlarning yataq élishi qiyin bolghan shara'itta, bir kéchiliki 10 yüen etrapidiki nechche on adem bir öyde qisilip yatidighan erzan bahaliq a'iliwi méhmanxanilarda yétishqa mejbur ikenlikini bildürüp, bundaq méhmanxanilarda yétishta erlerge qarighanda ayallarning téximu jasaretlik bolushi kéreklikini tekitlidi.

Nurun'gül xanimning bildürüshiche, uninggha poxurluq qilghan xitay deslep öz qilmishi üchün kechürüm sorashni xalimighan. Emma, nurun'gülning köktat aqlaydighan pichaqni uning gélige tenglep, uni öz qilmishi üchün kechürüm sorashqa mejburlishi netijiside bu xitay hem uning akisi nurun'gülning aldida tiz chöküp gunahini tiligen. Bir yataqtiki bashqa xitay erzdarlar awwal bu aka-uka xitaylargha bolushup, nurun'gülning saqchi chaqirish telipini ret qilghan bolsimu, emma kéyin nurun'gülning qet'iylikini körgendin kéyin, bu xitayni eyiblep, weqeni bésiqturushqa tirishqan. Ular yene weqeni bir terep qilish üchün yétip kelgen saqchilargha téléfon arqiliq yataqning toghra adrésini éytip bérishke mejbur bolghan.

Nurungul xanim yene özining xitay ölkiliride nechche on yil tirikchilik qilish jeryanidiki kechmishlirini bayan qilip, bir ayal hem yénida balisini egeshtürüp yashashqa mejburi bolghan ana bolush süpiti bilen, özini qoghdash üchün her waqit yénidin pichaq yaki beke qatarliqlarni ayrimaydighanliqini bildürdi.

Nurun'gül xanimning bayan qilishiche, weqe yüz bergen kéchisi, nurun'gülge qoshna bolghan yataqta yatqan ikki neper Uyghur yigitimu kéchidiki warang-churungni anglighandin kéyin, nurun'gül bar yataqqa kirip uninggha medetkar bolghan.

Bu ikki yigitining bir özini aqsuning kucha nahiyisidin dep tonushturdi. Bu Uyghur ziyaritimizni qobul qilip, béyjingdiki Uyghur erzdarliri arisida nurun'gülning uni bozek qilmaqchi bolghan xitayning edipini bergenliki heqqidiki xewer tarqalghandin kéyin, Uyghurlarning nurun'gülning jasaritige apirin oqughanliqini bildürdi.

Nurun'gül xanimning özige poxurluq qilghan xitayni edeplishi, nurghunlighan Uyghurlarni ghururlandurghan. Weqe yüz bergendin buyan, saqchixanida nurun'gülge hemrah bolup, uninggha qérindashliq méhrini yetküzgen kuchaliq Uyghur yigiti nurun'gül xanimgha bolghan hörmiti hem qayilliqini bildürüsh bilen bille, her bir Uyghur erkekning Uyghur bolush bolush süpiti bilen öz hemshirisi hem milletning aniliri bolghan Uyghur ayallirini qoghdash mejburiyiti barliqini tekitlidi.

Toluq bet