Jenubiy koriyide memliket boyiche étish meshiqi bashlandi

Amérika prézidénti barek obama bügün etigen sa'et 6 de, téléfon arqiliq xu jintawgha 'xitayning ittipaqdishi shimaliy koriyining ighwagerchilikini chekleydighanliqini ochuq -ashkara jakarlishi kérek' dep körsetti.
Muxbirimiz weli
2010-12-06
Share
Koriye-bomba-atom-sinaq-305 Shimaliy koriye 5‏ - yanwarda élip barghan rakéta siniqidin bir körünüsh.
AFP Photo

Bu waqitta jenubiy koriyining hemme yéride étish meshiqi bashlinip ketken we jenubiy koriye mudapi'e ministiri kim kwanjin jenubiy koriye herbiy qisimlirigha qayturma zerbe bérish hoquqini ishlitish heqqide alliqachan buyruq chüshürüp bolghan idi.

Roytrs agéntliqining si'uldin bayan qilishiche, bügün jenubiy koriyide memliket boyiche étish meshiqi bashlinip ketken. Aldi bilen jenubiy koriye herbiy qisimliri koriye yérim arilining gherbi, sherqi we jenub terepliridiki 29 jayda, birla waqitta paraxotlardin we quruqluqtin qayturma hujumgha ötidighan étish meshiqini bashlighan. Bügün jenubiy koriyide pütün memliket boyiche keng kölemde qanat yayghan bu étish meshiqining, shimali koriye 11‏- ayning 23 ‏- küni jenubiy koriyining yunpyung arilini topqa tutup, bu aralda turushluq 1500 ahalini yurtni tashlap musapir bolushqa mejbur qilghan weqege qayturulghan omum xelq inkasi ikenliki éniq.

Jenubiy koriye mudapi'e ministiri qayturma hujum hoquqini ishlitish buyruqi chiqardi

Xewerde éytilishiche, jenubiy koriyining yéngidin teyinlen'gen dölet mudapi'e ministiri kim kwanjin, bügün pütün memliket boyiche bir heptilik étish meshiqi bashlan'ghanda, herbiy qisimlargha qayturma zerbe bérish hoquqini ishlitish heqqide buyruq chüshürgen. U buyruqida, shimaliy koriyining her qandaq ighwagerchilikige qayturma zerbe bérishte, quruqluqtinla emes, déngizdin we hawadin birdek heriket qollinishni otturigha qoyghan.

Jenubiy koriye bash ministiri xelq turmushini eslige keltürüsh pilanini jakarlidi

B b s ning bayan qilishiche, jenubiy koriyining bash ministiri kim xu'angshik shimaliy koriye topqa tutqan jaylarda xelq turmushini eslige keltürüsh we yunpyung arilini öz ichige alghan aldinqi septiki töt nuqtida herbiy eslihelerni köpeytish üchün 3 milyard won meblegh ajratqanliqini jakarlighan. Jenubiy koriye bixeterlik komitéti yene, hazir ijra qiliniwatqan herbiy wezipe ötesh )mejburiyet( mudditini qisqartish heqqidiki belgilimini waqtinche ijra qilmasliqni jakarlighan.

Obama bügün xu jintawni shimaliy koriyining ighwagerchilikini ochuq-ashkara chekleshke chaqirdi

Birleshme agéntliqining bayan qilishiche, amérika prézidénti barak obama bügün etigen sa'et 6 de, téléfon arqiliq xu jintawgha 'xitay özining ittipaqdishi shimaliy koriyining ighwagerchilikini chekleydighanliqini ochuq -ashkara jakarlishi kérek' dep körsetken. Aqsaray bügün élan qilghan bayanatta éytilishiche, prézidént obama bügün téléfon arqiliq xu jintawni, bashqa döletler bilen birlikte ochuq-ashkara heriket qilip, koriye yérim arilidiki ensizlikni tügitishke, shimaliy koriyige süküt qilmasliqqa, shimaliy koriyini 2005‏- yili alte terep söhbitide bergen wedisige emel qildurup, uning ighwagerchilikini derhal toxtitishqa chaqirghan.

Emma, shinxu'a agéntliqi bügün bu heqte élan qilghan xewiride 're'is xu jintaw bügün teklipke bina'en amérika prézidénti obama bilen téléfon arqiliq sözliship, xitay- amérika munasiwiti we koriye yérim arili weziyiti heqqide pikir almashturdi. U sözide, shimaliy koriye bilen jenubiy koriye otturisida yüz bergen étishishta ziyan'gha uchrighan xelqqe we mülükke qattiq epsuslinimiz, eger bixeterlik weziyiti eng ajiz bolghan bu rayonning weziyiti kontrolluqni yoqatsa, her terepning menpe'itige ziyan yétidu, buninggha soghuqqanliq bilen mu'amile qilish lazim dep körsetti' dep bayan qildi.

Shimaliy koriye alte terep söhbitini qaytidin eslige keltürüshni telep qildi, emma amérikining ittipaqdashliri...

Roytrs agéntliqining washin'gtondin bayan qilishiche, bügün shimaliy koriye bayanat élan qilip, alte terep söhbitini qaytidin eslige keltürüshni telep qilghan. Bu waqitta amérika tashqi ishlar ministiri hélariy kilnton amérika dölet mejlisi binasida yaponiye we jenubiy koriye tashqi ishlar ministirliri bilen söhbet ötküzüp, shimali koriyige qaritilidighan istratégiyini muzakire qilghan. Amérikining ittipaqdashliri ötküzgen bu söhbetke xitayni qatnashturmighan.

Xewerde éytilishiche, bu üch dölet birdekla, shimaliy koriyining atom qoralliri pilani we jenubiy koriyini topqa tutup herikitini özgertidighan bérer emeliy ipade körülmigüche, alte terep söhbitini qaytidin eslige keltürmeydighanliqini, belki shimaliy koriyining heriketlirini cheklesh üchün xitaygha bésim ishlitidighanliqini ipadiligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet