Уйғурларда әйдиз вируси шиддәт билән тарқалмақта


2007-12-04
Share

Хитай ахбарат вастилириниң хәвиридин мәлум болушичә, 1995 ‏- йили уйғур елидә тунҗи қетимлиқ әйдиз кесили билән юқумланғучи байқалғандин һазирға қәдәр болған қисқиғина 12 йил ичидә уйғур илидики әйдиз кесили вируси билән юқумланғанлар сани шиддәт билән көпийип, 2007 ‏- йили 9 ‏- айниң 30 ‏- күнигичә тизимликтики сани 20 миң 890 гә йәткән.

Тәтқиқатчиларниң қаришичә, 2004 ‏- йили 5 ‏- айдин буян һөкүмәт уйғур илидики әйдиз кесили вируси билән юқумланғучиларниң мөлчәрдики санини 60 миң дәп елан қилип кәлгән болсиму, америкида тибби тәтқиқат билән шуғуллиниватқан доктор мәмәт имин әпәндиниң қаришичә, өзиниң әйдиз кесили вируси билән юқумланғанлиқини билмигән вә яки һөкүмәт тизимликигә кирмигәнләрниң сани, юқириқи тизимликтики сандин 5. 6 Һәссә юқири болуши йәни пүтүн уйғур илидики әйдиз кесили вируси билән юқумланғанларниң әмәлий сани 100 миңдин артуқ болуши мумкин икән.

Йеқинда биз или вилайитиниң қорғас наһийиси сүйдуң базири долқун мәһәллисидила бир йил ичидә арқа ‏- арқидин 16 уйғур яшниң әйдиз кесили билән һаятидин айрилғанлиқидин хәвәр таптуқ. Долқун мәһәллисидики 41 яшлиқ вәлиниң әйдиз вируси билән юқумланғанлиқи ениқланғандин кейин, вәли яхши давалинишқа еришәлмәй 9 айдин кейин өлүп кәткән. Биз униң ачиси вә бурунқи аяли билән униң немә сәвәбтин әйдиз вирусини юқтурувалғанлиқи һәққидә сөһбәт елип бардуқ. Сөһбәттин кейин, һөкүмәтниң әйдиз понкитидин вәлигә 9 ай ичидә пәқәт бирла қетим дора тарқитип бәргәнлики вә 50 йүәнлик ярдәм пули алғанлиқидин хәвәрдар болдуқ.

Бирләшкән дөләтләр тәшкилати вә дуня сәһийә тәшкилати һәр йили уйғур илиға мәлум дәриҗидә иқтисадий ярдәмдин сирт, әйдиз вирусиға тақабил туридиған дориларни йәткүзүп бәрмәктә. Әмма кишиләр буларниң һәммисиниң уйғур илиға толуқ йәткүзүлүшигә гуман билән қаримақта. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт