Türkiyining herqaysi jaylirida merhum eysa yüsüp aliptékin eslep ötüldi

• Ixtiyari muxbirimiz erkin tarimning bu heqtiki melumati
• Download story audio

Merhum eysa yüsüp aliptékin ependi tibetlerning rohi dahiysi dalay lama bilen bille

12 - Ayning 17 - küni büyük siyasiyon, dölet erbabi, pidakar inqilabchi eysa yüsüp aliptékinning wapatining 11 -yilliq xatire künidur. Bu munasiwet bilen, sherqiy türkistan medeniyet we hemkarliq jem'iyiti qeysiri we enqere shehride, sherqiy türkistan wexpi bolsa istanbulda merhumning rohigha atap du'a tilawet qilish bilen birge, uning ish- pa'aliyetlirini xatirilesh yighilishi ötküzdi.

Enqerediki yighilish türkiye akadémiklar birliki yeni oqutquchilar birlikining zalida ötküzüldi. Bu pa'aliyetke enqerediki uniwérsitét oqutquchiliridin köp sanda kishi qatnashti. Yighin'gha gazi uniwérsitéti oqutquchisi proféssor, doktor shükür qoch ependi riyasetchilik qildi. Bu xatirlesh yighinida séyit tümtürk ependi "eysa yüsüf alptékin ependi" témisida, gazi uniwérsitéti oqutquchisi mehmet shahin'göz ependi bolsa "lédirimiz eysa yüsüf alptékin we sherqiy türkistan mesilisi" témisida söz qildi.

Yighinda, 94 yilliq hayatining töttin üch qismini Uyghur xelqining erkinliki, démokratiyisi we insaniy heq - hoquqliri yolidiki küreshke serp qilghan eysa ependi 20 -esirning 30 -yillirida yandurghan istiqlal mesh'ilini hayatining axirigha qeder öchürmey, muhajirettiki Uyghur milli herikitining bügünge qeder ulashturup, milli mujadilimizning ebediyliki üchün büyük töhpe qoshti, u yalghuz sherqiy türkistan xelqiningla emes, pütün türk dunyasining iptixari we ghururigha aylandi, déyildi.

Istanbulda sherqi türkistan wexpi teripidin uyushturulghan mehmut qeshqiri we sherqi türkistan témiliq ilmi muhakime yighinida mexsus waqit ajritilip merhum eysa yüsüp aliptékin eslep ötüldi. Uni yéqindin tonuydighan proféssor, doktor gülchin chandarli'oghli eysa yüsüp aliptékin heqqidiki eslimilirini sözlep ötti. Yighinda söz qilghan bilim ademlirining hemmisi sözide eysa yüsüp alptékinni eslep ötti.

Merhum eysa yüsüp aliptékin 1925 - yilliri özini Uyghur xelqining höriyitige atighan yashliq dewridin bashlap, 1995 - yili 17 - dékabir küni bu dunya bilen widalashqiche bolghan uzun bir zamanda, türk dunyasi, erep dunyasi we gherb dunyasida pütün imkanliri bilen Uyghur mesilisini anglitip, bügünki Uyghur dewasigha asas salghan we öchmes iz qaldurghan wetenperwer bir zat.

Biz eysa yusuf alptékinni xatirlesh pa'aliyetliri heqqide tepsili melumat élish üchün bu pa'aliyetni uyushturghan séyit tümtürk ependi bilen söhbet élip barduq.