Ézilgen milletler we az sanliq xelqler üchün 4-nöwetlik xelq'araliq erkinlik yürüshi yawropaning 3 chong shehiride ötküzülmekchi

Merkizi italiyining paytexti rim shehiride turushluq erkin medeniyet jem'iyitining orunlashturushi bilen 10-ayning 22-küni chüshtin kéyin sa'et 3 te yawropaning eng chong sheherliridin fransiyining paytexti parizh, italiyining paytexti rim we gérmaniyining paytexti bérlin qatarliq sheherliride ézilgen milletler we az sanliq xelqler üchün 4-nöwetlik xelq'araliq erkinlik yürüshi ötküzülmekchi. Tinchliq shekilde élip bérilidighan bu namayishqa birmaliqlar, iranliqlar, tibetler, wyétnamliqlar, teywenlikler, démokrat xitaylar, falunggonglar we sherqiy türkistan Uyghur ammiwi teshkilatliri qatnashmaqchi.

“Sochi'eta libera”, yeni, erkin medeniyet jem'iyiti her insanning kishilik hoquqi we xelqlerning öz teqdirini özi belgilesh hoquqlirini öz ichige alghan erkinlik prinsipini qoghdash üchün yillardin béri her xil pa'aliyetlerni teshkillep kéliwatqan musteqil we terepsiz teshkilat bolup, bu pa'aliyetning aldinqi 3 qétimliqini italiyining rim shehiride ötküzgen iken. Ötken qétimliqigha dunya Uyghur qurultiyi re'isi rabiye qadir xanimmu qatnashqan bolup, bu yil ötküzülidighan 4-nöwetlikige dunya Uyghur qurultiyining chaqiriqi boyiche yawropada pa'aliyet élip bériwatqan köp sanda Uyghur teshkilatliri qatnashmaqchi.

Biz bu pa'aliyet heqqide téximu tepsiliy melumat élish üchün Uyghurlargha wakaliten bu pa'aliyetning teyyarliq komitétida wezipe ötewatqan dunya Uyghur qurultiyi yashlar komitéti mes'uli gheyyur qurban we fransiye Uyghur komitéti re'isi ekber yüsüp ependiler bilen söhbet élip barduq.