Gérmaniyide “Xitaydiki rehberlik özgirishi we buning Uyghurlargha bolghan tesiri” namliq yighin chaqirilidu

Bu qétimqi yighin toghrisida élan qilin'ghan chaqiriqta shundaq déyilgen:

- Ötken 63 yildin buyan, xitay kommunist hakimiyiti teripidin dawam qilip kéliwatqan siyasiy, iqtisadi, ijtima'iy, medeniyet we diniy zulumlar künséri téximu éghirlashmaqta, bolupmu yéqinqi yillardin buyan xitay dunyada “Iqtisadiy zor küch” bolup otturigha chiqish bilen, yillardin buyan perdazlap kelgen chümperdisini yirtip tashlap, Uyghur xelqini tüp yiltizidin qurutush siyasitini ashkara yolgha qoyushqa bashlidi. Nöwette Uyghur xelqning milliy mewjutluqi tarixta misliy körülmigen derijide zor bir xewpke we tehditke duch kelmekte.

Chaqiriqta yene shundaq déyilgen:

- Xitay merkizi hökümitining ichki qismida yüz bériwatqan éghir siyasiy küresh sewebidin, bu qétimqi qurultiyida yüz béridighan rehberlik özgirishi bilen xitayda yéngi bir siyasiy özgirishning yüz bérishi éhtimalliqi heqqide, meyli xitayning ichide bolsun yaki xelq'ara jama'etchilik arisida bolsun, küchlük mulahiziler élip bérilmaqta. Xitayda yüz béridighan herqandaq bir siyasiy özgirishning sherqiy türkistan'gha tesir qilishi muqerrerdur! xitaydiki herqandaq bir siyasiy özgirishlerge diqqet qilish we bu özgirishlerning Uyghurlargha élip kilidighan tesiri heqqide etrapliq mulahize élip bérish hem teyyarliq halitide turush milliy herikitimizning muhim wezipiliridin biridur!

Yawrupa sherqiy türkistan birliki teshkilati rehberlirining bergen melumatigha asaslan'ghanda, bu yighin'gha dunyaning herqaysi jayliridiki Uyghur siyasiy pa'aliyetchiler, tetqiqatchilar qatnashqandin sirt, gérmaniyidiki ikki chong partiyining wekilliri, xelq'aradiki xitay ishliri mutixessisliri, kishilik hoquq teshkilatlirining rehberliri bolup köp sanda kishi qatnishidiken.

Yawrupa sherqiy türkistan birliki teshkilatining re'isi abdujélil ependi bu munasiwet bilen ziyaritimizni qobul qilip, bundin kéyinki yillarda herxil ilmiy pa'aliyetlerni köpeytish arqiliq, yawrupa sherqiy türkistan birliki teshkilatining rolini téximu jari qildurush zörüriyiti toghrisida toxtaldi. U sözide, bu qétimqi pa'aliyetning asasi meqsiti heqqide uchur berdi.

Yawrupa sherqiy türkistan birliki teshkilatining re'isi abdujélil ependi sözide, gérmaniyide hakimiyetke qatnishiwatqan ikki chong partiyining birla waqitta Uyghurlar mesilisini tengla qollishining tunji qétimliq ish ikenlikini, buning, Uyghurlarning uzun yillardin béri élip barghan siyasiy pa'aliyetlirining gérmaniye hökümet we partiye saheside belgilik tesir peyda qilghanliqining netijisi ikenlikini tekitlidi.

Bu qétimqi yighinda xitay we Uyghurlar mesilisi muhakime qilin'ghandin sirt, Uyghur dewasini gérmaniye we yawrupa teweside yenimu küchlendürüshning chare - tedbirliri muzakire qilinidiken. Teshkilat re'isining bildürüshiche, yighinning 3 - küni, yeni 10 - ayning 1 - küni yighin ehli xitaygha qarshi namayish élip baridiken.