5‏-Июлдин кейин из-дерәксиз ғайиб болғанлар аилә-тавабиатиниң кәчүрмишлири (6)

Ғайиблар аилә-тавабиатлири рози һейт вә йәрмәнкә мәзгилидә үрүмчидин кетип турушқа зорланмақта.
Мухбиримиз шөһрәт һошур
2012-08-21
Share
alim-we-memet.jpg Солда мәмәт барат, оңда алимҗан
RFA

Һәр қетимлиқ һейт-байрам, йәрмәнкә яки қурултай мәзгиллири 5-июлдин кейин пәрзәнтлири ғайиб болуп кәткән аилиләр үчүн йәнә бир дишварчилиқ мәзгили һесаблиниду. Чүнки, мана бу мәзгилләрдә хитай сақчилири уларниң босуғисида пәйда болуп, уларни йүк-тақилирини теңишқа вә бир мәһәл юртлирида туруп келишкә буйруйду. Аилиләр болса өзлириниң ата-бовилиридин башлап бу земинда яшап келиватқанлиқини вә өзлириниңму җуңго пуқраси икәнликини билдүрүп, үрүмчидин кетип турушни рәт қилиду. Буниң билән икки тәрәп арисида ағзаки талаш-тартиш башлиниду, бу талаш-тартиш иттириш-сүрүшүшкә өзгириду, ақивәттә аилиләр, яки сақчихана яки қамақханида өзини көриду. Һөрмәтлик радио аңлиғучилар, бу йәрдә тәсвирлиниватқини қайси бир кино филиминиң көрүнүши әмәс, бу пәқәт түнүгүн вә үлүшкүн үрүмчидә йүз бәргән вәқәләр.

“ миллий дөләтләр, демократик һакимийәтләр өз хәлқлиридин қорқмайду. Мәйли байрам күнлири болсун, мәйли йиғин мәзгиллиридә болсун, қойнини өз тәвәликидики барлиқ кишиләргә тәң ачиду. Кимләрнидур чәткә қақмайду, кимләрнидур өйидин қоғлимайду. Пәқәт мустәмликичи дөләтләр, диктатор һакимийәтләрла, байрам вә йәрмәнкә мәзгиллиридә, өз чавилириниң читқа йейилип қелишидин қорқиду, өз тәбиитиниң дуняға ашкарилинип қелишидин әнсирәйду. Шуниң үчүн улар, өз тәвәликидики һәқсизлиққа учриған пуқралириға үстиләп йәнә бир қетим һәқсизлиқ қилиду.” юқириқилар бир уйғур көзәткүчиниң җәмийәт қанунийәтлири һәққидики тәсират хатирилиридин бир парчә, төвәндә бу қанунийәтниң пакитлирини диққитиңларға сунимиз.

Роза һейттин икки күн бурун хотән қарақаштики хитай сақчилири билән үрүмчи бахуляң сақчиханисиниң хадимлири, үрүмчи булақбешида олтурушлуқ гүлниса ханимниң өйидә пәйда болған. Улар гүлниса ханимға, 1-сентәбир күни үрүмчидә явро-асия йәрмәнкиси өткүзүлидиғанлиқини уқтуруп, уни йәрмәнкә ахирлашқучә, юрти хотәнгә қайтип шу йәрдә туруп турушқа буйруған. Гүлниса ханим оғли мәмәт баратниң үрүмчидә тутқун қилинған вә үрүмчидә ғайиб болғанлиқини, оғлиниң учурини алмай туруп юртиға қайтмайдиғанлиқини ейтқан.

Сақчилар йәрмәнкә мәзгилидә җәмийәтниң тинчлиққа еһтияҗи барлиқини, шуңа бу аилиләрниң дөләтниң мәнпәитини ойлишини вә дөләтниң сақчилириға маслишишини тәләп қилған. Гүлниса ханим болса, дөләтниң аввал өз пуқралириниң соал вә тәләплиригә җаваб бериши керәкликини билдүрүп қайтишни рәт қилған. Сақчилар гүлниса ханимға бирнәччә күн ойлиниш пурсити берип кетип қалған. Алдинқи күни йәнә хитайниң үрүмчидики сақчилири ғайиблар аилә-тавабиатидин, қурбангүл ханимниң қорусиға йетип кәлгән. Улар алдимиздики күнләрдә қәшқәрдин сақчи келидиғанлиқини вә у сақчиларниң қурбангүл ханимни вақитлиқ юртиға қайтуруп әкитидиғанлиқини, шуңа униң қайтишқа тәйярлиқ қилишини ейтқан.

Қурбангүл ханим өзиниң үрүмчидә тиҗарәт қиливатқанлиқини, юртиға қайтса, йол чиқимидин башқа йәнә күнлүки 200йүәндин пулдин қуруқ қалидиғанлиқини ейтип, сақчиларниң буйруқини рәт қилған. Қурбангүл ханим йәнә өзиниң ичкири өлкидин кәлмигәнликини, шуңа еһтияҗи туғулғанда қәшқәргә асан берип келәләйдиғанлиқини әскәрткән. Һейтниң биринчи күни үрүмчидики хитай сақчилири, ғалиблардин алим һелаҗиниң аилисигә берип, һелаҗини йүк -тақисини теңишқа вә әтиси қәшқәргә қарап йолға чиқишқа буйруған.

Хитай сақчилириниң йолсизлиқ вә зораванлиқлирини 3йилдин буян көп қетим көргән һелаҗи, хитай сақчилириниң буйруқиға пәрва қилмиған. Һелаҗи өзиниң бир җуңго пуқраси икәнликини, өзиниң җинайәтчи әмәсликини, бәлки бир пәрзәнтини йоқитип қойған зиянкәшликкә учриғучи икәнликини баян қилип, юртиға қайтишни рәт қилған. Хитай сақчилириниң қопал муамилисигә лайиқида җаваб қайтурғини үчүн, у үрүмчидики бахуляң сақчиханисиға апирилип тәһдит селинған. Һелаҗи өзиниң һәрқандақ ақивәткә-тутулушқа, солинишқа һәтта етилишқиму көңлидә тәйярлиқи барлиқини ейтип, үрүмчидин кәтмәйдиғанлиқини вә үрүмчидә яшайдиғанлиқини баян қилған. Сақчилар һелаҗиғиму ойлиниш пурсити бәргән. Нөвәттә мәзкур аилиләр хитай сақчилириниң буниңдин кейинки тәһдит вә агаһландурушиға қарита роһий җәһәттин тәйярлиқ көрмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт