Gherip elliri xitay mehsulatlirining süpet ölchimini tekshürüsh xizmitini kücheytti

Amérika yémek ‏ - ichmek we dora - dermek bashqurush idarisining xitaydin amérikigha import qilinidighan yémekliklerning bixeterlik ölchimini tekshürüsh üchün tesis qilghan mexsus ish béjirish orni charshenbe küni resmiy ish bashlighan.
Muxbirimiz eqide
2008-11-19
Share
Sut-parashok-pajiesi3-305.jpg Xitaydiki bowaqlar süt parashokidin zeherlinish mesilisi éghir kirizis hasil qildi. Sürette, xitay anilar zeherlik madda bar süt parashokini qollirida kötürüp naraziliqini bildürmekte.
AFP Photo

Mana bu peyitte, yawropa ittipaqi xitay terep bilen xitay mehsulatlirining bixeterliki mesilisi üstide hemkarliq kélishimi tüzdi.

Amérika yémek ‏ - ichmek we dora - dermek bashqurush idarisining mes'uli, xitayning paytexti béyjingda tesis qilin'ghan, import qilinidighan yémekliklerning bixeterlik ölchimini tekshürüsh ishxanisining échilish murasimida söz qilip":amérika dora ‏ - dermek, yémek ‏ - ichmek idarisining xitayda uzun muddetlik bir ish béjirish orni qurushi, insaniyet dunyasigha qilin'ghan ziyankeshliklerning bir terep qilinishigha yardem körsitishtin ibaret "dégen. U sözide yene":amérika terep, xitay hökümiti hemde mehsulat ishlepchiqarghuchilar bilen hemkarliship, xitayda ishlepchiqirilghan mehsulatlarning amérikigha élip kélinishtin burun, amérika yémek ‏ - ichmek we dora - dermek bashqurush idarisi teripidin békitilgen qarar shuningdek bixeterlik hemde ishlepchiqirish ölchemlirige yetküzülüshini telep qilidu" dep tekitligen.

Amérika ilgiri, xitayning yémeklik we dora bixeterliki mesililiridin qattiq endishe hés qilghan bolup, bolupmu terkipide mélamin bolghan zeherlik süt parashoki bayqalghandin kéyin, bu mesilini jiddiy bir terep qilishqa alahide köngül bölgen idi. Hemmige melum bolghinidek,xitayning zeherlik süt parashoki setchiliki xitayning éksport sahesini alahide ziyan'gha uchratqandin sirt, xitayning abroyigha éghir nuqsan yetküzdi. Bolupmu her qaysi döletler bilen bolghan iqtisadiy munasiwitige selbiy tesir körsetti.

En'giliye b b s radi'o ‏ - téléwiziye shirkiti bu heqte maqale élan qilip, xitayning amérika yémek we dora bixeterlik xadimlirining béyjingda tekshürüsh élip bérishigha yol qoyushidiki sewebning, zeherlik yémekliklerning arqa ‏ - arqidin bayqilishi tüpeyli meydan'gha kelgenlikini otturigha qoydi.

Amérika sehiye we ammiwi mulazimet ministirliqi mes'ulining bildürüshiche, amérika bu yil xitaydin 2 tirilyon amérika dolliri qimmitide mehsulat import qilghan bolup, bu mehsulatlarning bixeterlikini bir terep qilishta, amérika choqum yéngi bir istratégiye tüzüshke mejbur bolidiken.

Shunga amérika terep, chégra éghizida élip baridighan addi tekshürüsh usuligha xatime bérip, amérikigha import qilin'ghan meyli yémek ‏ - ichmek, dora - dermek we yaki bashqa türlerdiki barliq mehsulatlarning süpet we ölchem jehettiki tekshürüsh xizmitini qedemmu - qedem we inchike élip bérish yolini tallashni qarar qilghan.

Amérika yémek ‏ - ichmek, dora - dermek bashqurush idarisining ish béjirish orni béyjingdin bashqa yene, xitayning gu'angju we shangxey sheherliride tesis qilin'ghan, biraq közetküchiler ilgiriki tejribe - sawaqlargha asasen xitayda amérika tesis qilghan bu qararlarning toluq ishqa ashurulishidin anche chong ümid kütmeydiken.

Bu arida yawrupa ittipaqi özining xitay bilen istimal mehsulatliri bixeterliki buyiche hemkarliq kélishimi tüzgenlikini élan qilip, kélishim buyiche xitayning her 3 ayda bir qétim xeterlik mehsulatlar üstide tekshürüsh dokladi hazirlash mejburiyitini üstige alghanliqini bildürdi.

Yawrupa istimalchilar komitéti, yawrupa ittipaqigha eza 27 döletning, mesile bayqalghan mehsulatlarning yérimidin köprekining xitayda ishlepchiqirilghanliqini ashkarilighanliqini otturigha qoyghandin sirt, metbu'atlargha xitay bilen mehsulatlarning bixeterliki jehette hemkarliq kélishimi tüzüshning nöwettiki eng muhim iqtisadiy istratégiye hésablinidighanliqini tekitlidi.

Xitay mehsulatlirida éghir mesile körülgendin kéyin, yawrupa ittipaqi bu yil 9 ‏- ayda xitayda ishlepchiqirilghan we mélamin maddisi bayqalghan zeherlik süt parashoki, balilar oyunchuqi we bashqa yémekliklerni import qilishni cheklidi.

Yawrupa ittipaqi yene, istimalchilar menpe'etini qoghdash komitéti bilen xitay arisidiki mehsulat we yémekliklerning bixeterlikini ashurush hemkarliqining küchiyishi, ikki terepning birlikte tekshürüsh élip bérishigha qolayliq élip kélish bilen birge, dunya istimalchilirining menpe'etini qoghdashqa shara'it hazirlaydighanliqini körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet