Берген шәһридә "ғулҗа вәқәси" дә қурбан болғанлар үчүн гүлчәмбирәк қоюлди


2007-02-07
Share

Паалийәттин бир көрүнүш

Һәрқайси дөләтләрдики уйғурлар "5-фәврал ғулҗа вәқәси" ниң 10 йиллиқи мунасивити билән һәр түрлук намайиш вә хатирләш паалийәтлирини өткүзүватқан бир пәйттә, норвегийә рафто фонди җәмийити вә норвегийә хәлқара кәчүрүм тәшкилати бирликтә берген шәһридә бир хатирләш паалийити өткүзуп, 10 йил бурунқи қанлиқ бастурушта һаятидин айрилған қурбанлар үчүн уйғурлар билән бирликтә һәмдәрдлик көрсәтти.

Бу паалийәт, 2-айниң 5-куни бергендики рафто фонди җәмийитиниң алдиға җайлашқан "кишлик һоқуқ мәйдани" да өткүзүлгән болуп бу паалийәткә қатнашқан бергендики уйғур җамаитиниң вәкили, норвегийә уйғур комитети милли тәлим-тәрбийә бөлүминиң мәсули кәрим қаримниң билдуришичә, хатирләш паалийити кишлик һоқуқ мәйданида елип берилған. Паалийәт қатнашчилири алди билән 5-фәврал ғулҗа вәқәсидә қурбан болған қәһриманлар үчүн бир минут сүкүттә туруп, уларға болған һөрмитини билдүргән вә уларға атап гүлчәмбирәк қойған. Гүлчәмбирәккә есилған ақ лентиға "ғулҗа қирғинчилиқида һаятидин айрилған қурбанлирини әсләймиз" дәп йезилған.

Андин кейин рафто фонди җәмийитиниң башлиқи Arne Lyngård әпәнди соз қилип, паалийәт қатнашчилириға 10 йил бурун юз бәргән феврал вәқәсиниң җәряни, кейинки ақивәтлирини сөзләп чүшәндүрүш билән биргә, уйғурларниң нөвәттики кишлик әһвали үстидиму кәң тохталған. У сөзидә, нөвәттә уйғурларниң кишлик һәқ-һоқуқлириниң қаттиқ дәпсәндә болуватқанлиқини, уйғур сияси мәһбусларға өлүм җазаси беришниң йән давам қиливатқанлиқини,уйғур яшлириниң ишсизлиқ мәсилси, уйғур милли маарипиниң мәҗбури хитайлаштурлуши мәсилси, рабийә қадир ханимниң түрмидики пәрзәнтлириниң мәсилиси вә башқа әһваллар тоғрилиқ тохтилип, рафто фонди җәмийитиниң уйғурларниң кишлик һоқуқ мәсилисигә көңүл болушни өз хизмәтлириниң муһим күн тәртиплиридин биригә айландургаһнлиқини, уйғурларниң кишлик һоқуқ вәзийитини яхшилаш үчүн уйғурлар билән бир сәптә туруп баһстин – ахир бошашмай көрәш қилидиғанлиқини билдүргән.

Arne Lyngård Әпәндидин кейин, бу хатирләш паалийитини тәшкилләшкә мәсул болған рафто фонди җәмийити хадими гунта ханим вә норвегийә хәлқара кәчүрүм тәшкилати берген шөбисиниң мәсули танҗа ханимлар соз қилип, бүгүнки хатирләш паалийитиниң әһмийити, шуниңдәк уйғурларниң нөвәттә дуч келиватқан кишлик һоқуқ мәсилилири тоғрилиқ оз пикирлирини баян қилған.

Палийәттин кейин гунта ханим зияритимизни қобул қилип, бергендә өткүзүлгән бүгүнки бу хатирләш паалийити һәққидә мундақ деди:

"Биз 2004-йилиқ рафто кишлик һоқуқ мукапатини рабийә қадир ханимға бәргәндин башлап, уйғурларниң кишлик һоқуқ мәсилисигә йеқиндин көңүл болуп келиватимиз. Бу қетим биз ғулҗа вәқәсиниң 10 йиллиқи мунасивити билән норвегийә, германийә, америка қатарлиқ дөләтләрдә кәң-көләмлик хатирләш паалийити елип берилидиғанлиқидин хәвәр тепип, норвегийә хәлқара кәчүрүм тәшкилати билән бирликтә бизму бу хатирләш паалийәтлиригә оз үлүшимизни қошушни қарар қилдуқ. Кишлик һоқуқ хизмити билән шуғулланғучи орун булуш сүпитимиз билән 10 йил бурун юз бәргән шу қирғинчилиқ қурбанлирини яд етиш вә хатирләш мәҗбурйитимиз бар дәп ойлидуқ".

Биз йәнә норвегийә хәлқара кәчүрүм тәшкилати берген шөбисиниң мәсули танҗа ханимни зиярәт қилдуқ:

"Бизниң бу хатирләш паалийитини өткүзүштин мәқситимиз, бир тәрәптин, 10 йил бурун йүз бәргән шу паҗиә қурбанлирини яд етиш үчүн болса йәнә бир тәрәптин, аридин 10 йил өткән болсиму җуңго һөкүмити тинч намйишчиларни қанлиқ бастурғанлиқини бойниға алғини, яки зиянкәшликкә учриғанларниң зийинини толдуруп бәргини йоқ, әксчә уйғурларға қаритилған бастурушлар йәнила давам қилмақта. Йәнә бир нуқтидин 2008 –йиллиқ бейҗиң олимпик мусабиқиси күнсайин йеқинлап келиватиду, биз барлиқ амаллар билән дуня җамаәтчилигигә җуңгодики кишлик һоқуқ дәпсәндичилик қилмишлириниң, болупму уйғурларға йүргүзүливатқан бесим вә бастурушниң техиму еғирлишиватқанлиқини аңлитишимиз керәк, бүгүнкидәк паалийәтләр бизгә шу имканийәтни һазирлап бериду".

Бу хатирләш паалийити 12:00 - 13:00 кичә бир саәт давам қилған болуп, паалийәткә рафто фонди җәмийити вә норвегийә хәлқара кәчүрүм тәшкилати берген шөбисиниң бир қисим әзалири вә берген шәһиридики уйғурлар иштирак қилған. (Абдусәмәт)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт