Ghulja weqesi türkiyining herqaysi jaylirida xatirilendi


2007.02.05

gulja-weqsi-namayish-turkiy.jpg
Ghulja weqeside shéhit bolghan kishilerning janazisigha simwol qilin'ghan bir janaza xitay elchilikining aldigha qoyuldi. Janazining üstige qatil xitay, balilarning qatili, dep yézilghan idi.

Türkiyidiki sherqiy türkistan ammiwi teshkilatliri ghulja weqesining 10 yilliqini türlük pa'aliyetler bilen xatirilidi. Istanbulda pa'aliyet élip bériwatqan sherqiy türkistan yashlar birliki bashliqi tibet ependining orunlashturushi bilen 2-ayning 3-küni zeytunburnu rayonida bir konfirans chaqirildi. Konfransta proféssor abdulqadir donuk, doktor ömer kul we arslan aliptékin qatarliq kishiler qatnashti we söz qildi. 2-Ayning 4-küni sherqiy türkistan medeniyet we hemkarliq jem'iyiti we sherqiy türksitan yashlar birliki ortaqliship xitay xelq jumhuriyitining istanbulda turushluq konsulusliqining aldida namayish ötküzdi. Namayishqa sherqiy türkistan ma'arip hemkarliq jem'iyitining ezaliri bilen birlikte köp sanda Uyghur qatnashti. 2-Ayning 5-kuni bolsa enqerediki xitay elchiliki aldida keng kölemlik bir namayish ötküzüldi.

Soghuq qish künide xitay xelq jumhuriyitining enqerede turushluq elchixanisining aldida yüzdin artuq Uyghur we türk xelqi 5 -yanwar küni yüz bergen ghulja weqesining 10 yilliqi munasiwiti bilen namayish ötküzdi. Bu namayishni sherqiy türkistan medeniyet we hemkarliq jem'iyiti enqere shöbisi uyushturghan bolup, namayishqa qeyséri we enqeredin kelgen Uyghurlar shundaqla türkiyidiki eng chong ammiwi teshkilatlardin biri bolghan türkiye kadirlar uyushmisi ezaliri we keng Uyghur dostliridin teshkil tapqan namayishchi amma qatnashti. Ular hemmisi qollirida türkiyining ay yultuzluq qizil bayriqi bilen ay yultuzluq kök bayraqni tutushup, xitaylar sherqiy türkistandin yoqal, sherqiy türkistan Uyghurlarning tupriqi, xitaylar qatil, yoqalsun xitay kommunist partiyisi, türkiye hökümiti qérindishinggha ige chiq, dégen'ge oxshash shu'arlarni towlashti.

gulja-wqsi-namayish-turk2.jpg
Namayishtin bir körünüsh

Kéyin, sherqiy türkistan medeniyet we hemkarliq jem'iyiti bashliqi séyit tümtürk ependi metbu'at bayannamisini oqudi. Bayannamida mundaq déyilgen:

1997-Yili 2-ayning 5-künidiki weqe bolup aridin 10 yil ötti. Soghuq bir qish küni qoli qan bilen boyalghan xitay hökümitining elchxanisining aldigha yighilip ghulja weqeside qetli qilin'ghan sherqiy türkistanliqlar üchün xitaygha naraziliqimizni bildürüp kelgilimu 10 yil boldi. Bügün silerge ghulja weqesining némilikini chüshendürmekchi emesmen. Chünki, biz silerge barin, ghulja we xoten weqelirini chüshendürüwatqan künimizde yéngi qirghinlar bulargha qoshulup mangdi. Qimmetlik axbarat xadimliri, ammiwi teshkilat mes'ulliri we Uyghur dosti qérindashlirimiz, bizni yalghuz qoymighanliqinglar üchün silerge köptin köp rexmet éytimiz. Sherqiy türkistan xelqining peryadigha qulaq sélinglar. Pütün türk xelqige bu zulumni anglitinglar. Men buyerde ghulja weqeside shéhit bolghan pütün shéhitlirimizge allahtin rehmet tilesh bilen birlikte barliq türk xelqini sherqiy türkistan xelqige ige chiqishqa, yardem qilishqa chaqirimen".

Kéyin, ghulja weqeside shéhit bolghan kishilerning janazisigha simwol qilin'ghan bir janaza xitay elchilikining aldigha qoyuldi. Janazining üstige qatil xitay, balilarning qatili, dep yézilghan idi. (Erkin tarim)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.