Gérmaniye dolqunliri radi'osida xitay majrasi

Bir qanche hepte ilgiri, gérmaniyidiki xitay yazghuchisi chong wéygu'ang, wang rongfén qatarliq sekkiz neper xitay ziyaliysi gérmaniye parlaméntigha ochuq xet yollap, gérmaniye dolqunliri radi'osi xitayche anglitish bölümi üstidin shikayet qilghan.
Muxbirimiz ekrem
2008-09-25
Share

Shikayette, mezkur bölümning mu'awin mudiri jang denxongning xitay kompartiyisige masliship, tetür teshwiqat tarqitiwatqanliqini pakitlar bilen ashkarilap, parlaménttin radi'oning xitayche anglitish bölümini üzül - késil islah qilishni telep qilghan idi.

Bu ochuq xet gérmaniye axbarat saheside küchlük tesir qozghap, türlük xewerlerdin sirt "fokus", "eynek" qatarliq dangliq siyasiy zhurnallarda her xil inkaslarni barliqqa keltürüpla qalmay, gérmaniye parlaménti xadimliri we gérmaniyidiki meshhur shexslerningmu jiddiy diqqitini tartqan.

Heq pikir qollashqa érishidu

"Eynek" heptilik jornili tor bétining 24 - siéntebirdiki "xitay teshwiqati" namliq mulahizisige asaslan'ghanda, bu ochuq xetke gérmaniye parlaméntidiki 59 neper wekil imza atqan.

Nobél edebiyat mukapatigha érishken imre kertéz, nobél tinchliq mukapatigha érishken mariyo wargas, baxman mukapatigha érishken lutiz zaylér we meshhur gérman yazghuchiliridin ralip gi'ordano hem arnulf baring qatarliqlarmu bu xetni qollap imza atqan.

Öz ichide xitaydek diktator kommunist hakimiyet üchün xizmet qilidighan bir xadimning peyda bolup qalghanliqi we bu setchilikning axbarat sahesige keng yéyilip ketkenliki gérmaniye dolqunliri radi'osigha chong bir zerbe bolghan.

Xitay muxbir hoquqidin élip tashlandi

Gérmaniye dolqunliri radi'osidin ansgar burghofning bildürüshiche, parlaméntning bésimi, hökümet we jem'iyettiki bu küchlük inkaslargha qarita, radi'o rehberliki deslepki qedemde xitayche anglitish bölümining mu'awin mudiri jang denxongning mudirliq hoquqini élip tashlighan. Uning diktorluq xizmitini waqtinche saqlap qalghan.

Jang denxongni dawamliq ishlitish yaki ishletmeslikni kéyin qarar qilidighanliqini bildürgen. Lékin bu xitay ayalgha nisbeten, radi'o xizmetchilirining ishenchining tamamen ölgenliki ochuq izahlan'ghan.

Jang denxongning xataliqi

30 Xil tilda anglitish béridighan gérmaniye dolqunliri radi'osining abroyini tökken xitay muxbir jang denxong zadi qandaq xataliq ötküzgen?

Xitay ziyaliyliri teripidin yézilghan ochuq xette, gérmaniye dolqunliri radi'osi xitayche anglitish bölümining mu'awin mudiri jang denxongning bir qanche türlük xataliqi tilgha élin'ghan bolup, bu xataliqlar eyni pakitliri bilen delilligen.

Tetür teshwiqat

Bularning biri, jang denxong béyjing olimpikining aldida we olimpik jeryanida xitay kompartiyisining teshwiqatigha masliship, köp qétim tetür teshwiqat élip barghan. Gherbning qimmet qarishigha, radi'oning erkinlik, démokratiye we kishilik hoquqni teshwiq qilishtin ibaret tüp prinsipigha xilapliq qilghan. Aq - qarini arilashturiwetken. Mesilen, olimpik mezgilide, chet'el muxbirlirigha keng erkinlik bérilidighanliqini asassizla keng teshwiq qilghan we xitaygha kirishi cheklen'gen gézit - zhurnallar hemde shehwaniy eserlerni xitayda sétishqa bolidighanliqini ashkare terghip qilghan.

Aldamchiliq

Ikkinchisi, jang denxong xitay kompartiyisini, xitay hökümitini aqlash meqsitide yalghan, oydurma xewerlerni tarqitip, gherb kishilirini we xitay puqralirini aldighan. Buning bilen gérmaniye dolqunliri radi'osining inawitige qattiq tesir yetküzgen. U élan qilghan "shinxu'a agéntliqining xewiri, xelq gézitining xewiri" dégendek xewerlerning menbesi éniqlanmighan.

Xitaydiki nurghunlighan xewer organliri, eksiche jang denxong élan qilghan xewerlerdin paydilinip teshwiqat élip barghan. Ular xewerning menbesige "gérmaniye dolqunliri radi'osidin élindi" dep eskertish bergen. Emeliyette, bu xewerlerning saxta xewerler ikenliki kéyin ashkarilinip qalghan.

Öktemlik

Üchinchisi, jang denxong radi'odiki mu'awin mudirliq hoquqidin paydilinip, xitay kishilik hoquq pa'aliyetchilirining, oxshimighan köz qarashtiki shexslerning, xitay kompartiyisige qarshi küchlerning we biterep xitay yazghuchilirining xewer, maqalilirini köp qétim basturup qoyghan.

Ditigha yaqmighan pikirni yaki özi yaqturmaydighan kishilerning eserlirini xalisa bérip, xalimisa bermeydighan öktemlikini dawamlashturghan.

Siyasiy salahiyitidiki guman

Tötinchisi, jang denxongning siyasiy salahiyiti gumanliq bolup, uning xitay kompartiyisi bilen bolghan munasiwitining zadi qandaqliqi éniq emes. U xalighanda xitaygha bérip - kélip turghan. Xitay emeldarlirining ziyapetlirige qatnashqan.

Gérmaniye dolqunliri radi'osining bir muxbirigha qoyulidighan telepke bina'en éytqanda, jang denxongning qilmishliri adilliqqa yatmaydu, bitereplikke toghra kelmeydu, toghra - durus ish emes, déyilgen.

Kompartiye meydanida ching turush

Ochuq xette yene, gérmaniye dolqunliri radi'osi xitayche anglitish bölümining xitay kompartiye hökümiti yaqturmaydighan erkinlik, démokratiye, kishilik hoquq qatarliq sahelerdiki xewerlirining intayin passip ikenliki, bermisimu bolidighan xewerlerning zorlap bérilip, bérishke tégishlik xewerlerning bérilmeydighanliqi yaki waqtida bérilmeydighanliqi pash qilin'ghan hemde jang denxongni " xitay kompartiye hökümitining meydanida ching turdi" dep eyibligen.

Bu eyibleshlerge gérmaniye dolqunliri radi'osi xitayche bölümining tor bétimu qisturulghan. Bu tor bétidin örnekler élip, jang denxongning qilmishlirini pash qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet